တရုတ်နဲ့ အိန္ဒိယစီမံကိန်းတွေကို လက်နက်ကိုင်တွေက နှောင့်ယှက်မယ်မထင်

အာရက္ခတိုင်းမ်စ် (၁၈ ဇွန် ၂၀၂၆)

မြန်မာနိုင်ငံရှိ အင်အားကြီး အိမ်နီးချင်းနိုင်ငံတွေဖြစ်တဲ့ တရုတ်နဲ့ အိန္ဒိယတို့ရဲ့ အဓိက စီမံကိန်းကြီးတွေကို NUG-PDF အပါအဝင် လက်နက်ကိုင် အဖွဲ့အစည်းတွေအနေနဲ့ နှောင့်ယှက်မယ် မထင်ဘူးလို့ နိုင်ငံရေးလေ့လာသုံးသပ်သူတစ်ဦးက အာရက္ခတိုင်းမ်စ်ကို ပြောပါတယ်။

မြန်မာနိုင်ငံဟာ ပထဝီနိုင်ငံရေးအရ ဗျူဟာကျတဲ့ နေရာမှာ ရှိနေတဲ့အတွက် အိမ်နီးနားချင်း အင်အားကြီး နှစ်နိုင်ငံဖြစ်တဲ့ တရုတ်နဲ့ အိန္ဒိယဟာ သူတို့ရဲ့ ရည်မှန်းချက်ကိုယ်စီနဲ့ ကြီးမားတဲ့ အခြေခံအဆောက်အအုံ စီမံကိန်းတွေကို အမြန်ဆုံး အကောင်အထည်ဖော်နိုင်ဖို့ လက်ရှိမှာ တိုက်တွန်းလျက် ရှိနေတာပါ။

သက်ဆိုင်ရာ လက်နက်ကိုင် အဖွဲ့အစည်းတွေအနေနဲ့ အဲဒီ ၂ နိုင်ငံရဲ့ လုပ်ငန်းတွေ၊ စီမံကိန်းတွေကို ထိခိုက်တဲ့ တိုက်ပွဲမျိုးတွေလည်း လုပ်လာနိုင်ဖွယ်မရှိဘူးလို့ နိုင်ငံရေးလေ့လာသုံးသပ်သူတစ်ဦးက အာရက္ခတိုင်းမ်စ်ကို ပြောပါတယ်။

“စစ်ရေးက အဲဒါပေါ့ ဒီလုပ်ငန်းတွေ ဝင်လာပြီဆိုရင်တော့ ဒီလုပ်ငန်းတွေရဲ့ ပတ်ဝန်းကျင်မှာတော့ ဒီလုပ်ငန်းတွေ၊ ဒီ project တွေကို ထိခိုက်တဲ့ တိုက်ပွဲတွေ ဘာတွေတော့ ဝင်မှာမဟုတ်ဘူး။ အခု ကျနော်တို့ အရှေ့မြောက်မှာဆိုရင် တရုတ်ရဲ့ ရေနံပိုက်လိုင်း၊ ဓာတ်ငွေ့ပိုက်လိုင်းတစ်ဝိုက်မှာ ဘယ်အဖွဲ့အစည်းကမှ မထိရဲသလိုမျိုးပေါ့နော်။ အဲဒီနေရာတွေကတော့ အလုံခြုံဆုံးဖြစ်တာပေါ့။ အဲဒီလိုတော့ မြင်ရတယ်။ အဲဒီတော့ အိန္ဒိယတို့ ဟိုဟာတို့ကလည်း အင်အားကြီးနိုင်ငံကြီးတွေ ဖြစ်တော့ သူတို့ရဲ့ နိုင်ငံရေးအရ ရပ်တည်မှုကတော့ အရေးကြီးတဲ့အခါကြတော့ သက်ဆိုင်ရာ လက်နက်ကိုင် အဖွဲ့အစည်းတွေပေါ့နော်။ ကျနော်တို့ PDF တွေပါအပါ လက်နက်ကိုင် အဖွဲ့အစည်းတွေကလည်း သူတို့ကို နှောင့်ယှက်မယ်မထင်ဘူး။ NUG-PDF တွေကလည်း အခု ကျနော်တို့ တရုတ်က သိပ်ပြီးတော့ မလိုလားမှန်းသိပေမယ့် အ‌နှောင့်အယှက် ပေးရဲမယ် မထင်ဘူး” လို့ သူက ပြောပါတယ်။

တရုတ်နိုင်ငံရဲ့ စီမံကိန်းတွေဟာ သူတို့ရဲ့ ကမ္ဘာလုံးဆိုင်ရာ “ပိုးလမ်းမစီမံကိန်း” (Belt and Road Initiative – BRI) ရဲ့ စိတ်ပိုင်းတစ်ခုဖြစ်ပြီး တရုတ်-မြန်မာ စီးပွားရေးစင်္ကြံ (CMEC) အောက်မှာ အဓိက လည်ပတ်နေပါတယ်။ အဓိက ရည်မှန်းချက်ကတော့ တရုတ်နိုင်ငံ အနောက်တောင်ပိုင်း (ယူနန်ပြည်နယ်) ကနေ အိန္ဒိယသမုဒ္ဒရာဆီ တိုက်ရိုက်ထွက်ပေါက် ရရှိဖို့ ဖြစ်ပါတယ်။

တရုတ်ရဲ့ မြန်မာနိုင်ငံက အဓိက စီမံကိန်းတွေကတော့ ကျောက်ဖြူ ရေနက်ဆိပ်ကမ်းနှင့် အထူးစီးပွားရေးဇုန်၊ တရုတ်-မြန်မာ ရေနံနှင့် သဘာဝဓာတ်ငွေ့ပိုက်လိုင်း၊ မူဆယ်-မန္တလေး-ကျောက်ဖြူ ရထားလမ်းစီမံကိန်း၊ နယ်စပ်စီးပွားရေး ပူးပေါင်းဆောင်ရွက်မှုတို့ ဖြစ်ပါတယ်။

အိန္ဒိယနိုင်ငံရဲ့ စီမံကိန်းတွေကတော့ ၎င်းတို့ရဲ့ “အရှေ့မျှော်ဝါဒ” (Act East Policy) ပေါ်မှာ အခြေခံပြီး တရုတ်ရဲ့ သြဇာလွှမ်းမိုးမှုကို ထိန်းညှိဖို့နဲ့ အိန္ဒိယ အရှေ့မြောက်ပိုင်း ပြည်နယ်တွေကို ပင်လယ်ရေကြောင်းက တစ်ဆင့် ဖွံ့ဖြိုးတိုးတက်အောင် ချိတ်ဆက်ဖို့ ရည်ရွယ်ပါတယ်။

မြန်မာနိုင်ငံမှာ အိန္ဒိယရဲ့ အဓိက စီမံကိန်းတွေကတော့ ကုလားတန် ဘက်စုံသုံး သယ်ယူပို့ဆောင်ရေး စီမံကိန်းနဲ့ အိန္ဒိယ-မြန်မာ-ထိုင်း သုံးနိုင်ငံ အဝေးပြေးလမ်းမကြီးတို့ပဲ ဖြစ်ပါတယ်။

တရုတ်နဲ့ အိန္ဒိယတို့ စီမံကိန်းတွေရှိရာ ဒေသတွေနဲ့ လမ်းကြောင်းတွေမှာတော့ NUG-PDF, ညီနောင်မဟာမိတ် ၃ ဖွဲ့၊ ချင်းလက်နက်ကိုင်တွေ၊ KIA၊ AA၊ ရှမ်းနီတပ်ဖွဲ့တို့အပြင် တခြားလက်နက်ကိုင်တွေလည်း ရှိကြပါတယ်။