အာရက္ခတိုင်းမ်စ် (၇ စက်တင်ဘာ ၂၀၂၆)
ပဲခူးတိုင်း ပန်းတောင်းမြို့နယ်ရှိ မသုန်ရွာအနီးရှိ ကာကွယ်ရေးပစ္စည်းစက်ရုံ ကပစ ၁၆ ထိ အာရက္ခတပ်တော်နဲ့ ပူးပေါင်းမဟာမိတ်တို့ရဲ့ ထိုးစစ် ရောက်ရှိနေပြီလို့ သိရပါတယ်။
“အခု တိုက်ပွဲတွေက မသုန်ရွာနားက ကျွဲကန် အထက်တောင်ညိုကြီးစခန်းနားအထိကို ရောက်နေပြီ။ အဲဒီနေရာတွေကို ကပစ ၁၆ နဲ့ ကပစ ၉ နေပြီးတော့ ပစ်ကူတွေ တောက်လျောက်ပေးနေတယ်” မြေပြင်စစ်ရေးသတင်းရင်းမြစ်တစ်ဦးက အာရက္ခတိုင်းမ်စ်ကို ပြောပါတယ်။
အာရက္ခတပ်တော်၊ ပူးပေါင်းမဟာမိတ်တပ်တို့နဲ့ ရွေးတုအစိုးရတပ်တို့ဟာ စက်တင်ဘာလ ၄ ရက်က စတင်ပြီး တကျော့ပြန် တိုက်ပွဲတွေ ပြင်းထန်နေပြီး လက်ရှိအချိန်ထိလည်း တိုက်ပွဲတွေ ပြင်းထန်နေတယ်လို့ သိရပါတယ်။
အဆိုပါ ဖြစ်ပွားနေတဲ့ တိုက်ပွဲနေရာတွေကို မသုန်ရွာအခြေစိုက် ကာကွယ်ရေးပစ္စည်းစက်ရုံ ကပစ-၁၆ နဲ့ ကျောက်ဖူးရွာအခြေစိုက် ကပစ-၉ တို့ကနေ လက်နက်ကြီးများနဲ့ အဆက်မပြတ် ပစ်ကူပေးနေရပြီး လေကြောင်းကပါ စစ်ကူ တိုက်ခိုက်ပေးနေတယ်လို့လည်း သိရပါတယ်။
ဇွန်လ ၃၀ ရက်က ပဲခူတိုင်း ပန်းတောင်းမြို့နယ် မသုန်အခြေစိုက် အမှတ် ၁၆ ကာကွယ်ရေးပစ္စည်းထုတ်စက်ရုံ (ကပစ ၁၆) ကို အာရက္ခတပ်တော်က လက်နက်ကြီးနဲ့ ပစ်ခတ် တိုက်ခိုက်လို့ ရွေးတုအစိုးရတပ်က ၁ ဦးသေဆုံးပြီး ၃ ဦး ဒဏ်ရာ ရရှိခဲ့ပါတယ်။
အလားတူ မတ်လ ၁ ရက်ကလည်း ကပစ (၁၆) စက်ရုံကို AA နဲ့ ပူးပေါင်းမဟာမိတ်အဖွဲ့က ရှော့တိုက်ဒုံး၊ လက်နက်ကြီးတွေနဲ့ ထိမှန်အောင် ပစ်ခတ်ခဲ့လို့ စက်ရုံအတွင်းမှာ ပေါ်ကွဲမှုတွေ ဖြစ်ပေါ်ခဲ့ပါသေးတယ်။
ပဲခူးတိုင်း ပန်းတောင်းမြို့နယ်အတွင်းမှာ ကာကွယ်ရေးပစ္စည်းစက်ရုံ ၄ ရုံ တည်ရှိနေပြီး အဲဒီ စက်ရုံတွေကနေ ရွေးတုအစိုးရတပ်အတွက် လိုအပ်တဲ့ လေယာဉ်ဗုံး၊ မော်တာကျည်၊ လက်နက်ငယ်ကျည်နဲ့ ယမ်းအမျိုးမျိုးကို အဓိက ထုတ်လုပ် ဖြန့်ဖြူးပေးနေတာကြောင့် အဓိက ဗဟိုချက် နယ်မြေတစ်ခုလည်း ဖြစ်ပါတယ်။