အာရက္ခတိုင်းမ်စ် (၂၆ စက်တင်ဘာ ၂၀၂၆)
ရက္ခိုင်ပြည်၊ ကျောက်တော်မြို့အနီးက မူဆလင်ကျေးရွာတွေနဲ့ မြို့ပေါ်က ပြည်တော်သာ (၉) လမ်းတို့ကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့မှုကြောင့် ထိခိုက်နစ်နာခဲ့ရသူတွေကို ရက္ခိုင်အမျိုးသားအဖွဲ့ချုပ်က သွားရောက်တွေ့ဆုံပြီး ထောက်ပံ့မှုတွေ ပေးအပ်ခဲ့တယ်လို့ သိရပါတယ်။
စစ်ကောင်စီဟာ စက်တင်ဘာလ ၂၅ ရက်၊ မိုးလင်းဝ ၂ နာရီကျော်အချိန်မှာ ကျောက်တော်မြို့အနီးက မူဆလင်ကျေးရွာတွေနဲ့ မြို့ပေါ်ရပ်ကွက်တစ်ခုဆီကို Y-12 လေယာဉ်နဲ့ ဗုံးအလုံးရေ ၃၀ နီးပါး ကြဲချတိုက်ခိုက်ခဲ့တာ ဖြစ်ပါတယ်။
အဲဒီလို လေကြောင်း တိုက်ခိုက်မှုကြောင့် အသက် ၁ နှစ်အရွယ် မူဆလင် ကလေးငယ်တစ်ဦး အပါအဝင် မူဆလင်ဒေသခံ ၅ ဦးနဲ့ စုစုပေါင်း ပြည်သူ ၇ ဦး ထိခိုက်ဒဏ်ရာရရှိခဲ့ပြီး နေအိမ်အများအပြားလည်း ထိခိုက်ပျက်စီးခဲ့ရပါတယ်။
ဗုံးကြဲတိုက်ခိုက်ခံရလို့ ထိခိုက်ဒဏ်ရာရရှိသွားသူတွေနဲ့ နေအိမ် ပျက်စီးဆုံးရှုံးခဲ့ရတဲ့ ပြည်သူတွေကို ULA ရဲ့ တာဝန်ရှိ ပုဂ္ဂိုလ်တွေက စက်တင်ဘာလ ၂၅ ရက် နေ့လယ် ၂ နာရီခန့်မှာ သွားရောက်တွေ့ဆုံပြီး ထောက်ပံ့ငွေနဲ့ ပစ္စည်းတွေ ပေးအပ်ခဲ့ကြတာပါ။
အဆိုပါ တွေ့ဆုံပွဲကို အာရက္ခပြည်သူ့တော်လှန်ရေးအစိုးရရဲ့ သက်ဆိုင်ရာ ဌာနဆိုင်ရာ တာဝန်ရှိသူတွေ၊ ထိခိုက်နစ်နာခဲ့ရတဲ့ မူဆလင်ပြည်သူတွေနဲ့ မူဆလင် ဘာသာရေးဆရာတွေလည်း တက်ရောက်ခဲ့ကြပါတယ်။
ထိခိုက်ဒဏ်ရာ ရရှိသွားကြတဲ့ မိသားစုဝင်တွေကိုလည်း ULA အနေနဲ့ လိုအပ်တဲ့ ထောက်ပံ့မှုတွေကို ဆက်လက် ပေးအပ်သွားမယ်လို့ သိရပါတယ်။