အာရက္ခတိုင်းမ်စ် (၁၅ နိုဝင်ဘာ ၂၀၂၆)
ရက္ခိုင်ပြည်၊ ကျောက်ဖြူတပ်နယ်အတွင်းက စနဲ၊ တောင်မော်ကြီး၊ သိုင်းချောင်းနဲ့ မင်းပြင် စတဲ့ဒေသတွေမှာ အာရက္ခတပ်တော်နဲ့ စစ်ကောင်စီတို့ နှစ်ဖက်ထိတွေ့တိုက်ပွဲတွေ ဆက်ဖြစ်နေပြီး စစ်ကောင်စီဘက်က အကျအဆုံးများတယ်လို့ သိရပါတယ်။
စစ်ရေးအရ ရှုံးနိမ့်နေတဲ့ စစ်ကောင်စီဟာ နိုဝင်ဘာလ ၁၄ ရက် နံနက် ၉ နာရီခွဲခန့်မှာ ကျောက်ဖြူမြို့နယ်၊ စနဲမြို့၊ တောင်ငူစုရပ်ကွက်ဘက်ကို ရေကြောင်းက စစ်သင်္ဘောပေါ်ကနေ လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံတွေက ပြောပါတယ်။
ဒီပစ်ခတ်မှုကြောင့် ဒေသခံပြည်သူတွေရဲ့ လူနေအိမ် ၇ လုံး မီးလောင်ပျက်စီးခဲ့ပြီး အရပ်သားတွေရဲ့ အိုးအိမ်ပစ္စည်းတွေ မီးထဲပါသွားခဲ့တယ်လို့ သိရပါတယ်။
ရက္ခိုင်ပြည်အတွင်း တိုက်ပွဲတွေ ပြန်စတာ ၃ နှစ်ပြည့်မြောက်တဲ့ နိုဝင်ဘာလ ၁၃ ရက်မှာ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က စစ်ကောင်စီဆီကနေ မြို့တွေကို တစ်မြို့ပြီးတစ်မြို့ သိမ်းပိုက်ခဲ့ပြီး ယခုအခါ စစ်တွေ၊ ကျောက်ဖြူနဲ့ မာန်အောင်မြို့တွေကို ဆက်လက် သိမ်းပိုက်နိုင်ဖို့ ကြိုးပမ်းလျက်ရှိတယ်လို့ ဆိုထားပါတယ်။