ကျောက်ဖြူကို စစ်ကောင်စီက အဝင်အထွက် တင်းကျပ်ပြီး ကန့်သတ်လာ

အာရက္ခတိုင်းမ်စ် (၆ မတ် ၂၀၂၅)

ကျောက်ဖြူမြို့နယ်မှာ တိုက်ပွဲတွေ ပြင်းထန်လာတဲ့အချိန်ကနေစပြီးတော့ စစ်ကောင်စီက မြို့အတွင်းကို အဝင်အထွက်တွေ ကန့်သတ်လာတယ်လို့ ဒေသခံတွေက ပြောပါတယ်။

အရင်က စက်လှေတွေကို ကျောက်ဖြူမြို့အတွင်း ဝင်ထွက်ခွင့် ပြုထားပေမယ့် ဓညဝတီ ရေတပ်ဌာနချုပ်ကို အာရက္ခတပ်တော်က တိုက်ခိုက်တဲ့အချိန်ကနေစပြီးတော့ ဝင်ခွင့် မပြုတော့ဘူးလို့ သိရပါတယ်။

ပြီးတော့ ကျောက်ဖြူမြို့နယ်ကနေ ရန်ကုန်နဲ့ မန္တလေးတို့ကို လေယာဉ်နဲ့ သွားတာတွေကိုလည်း တင်းကျပ်ပြီး ကန့်သတ်ပိတ်ပင်လာပြီး ကျန်းမာရေးကိစ္စနဲ့ပဲ သွားလာခွင့်ပြုတယ်လို့ ကျောက်ဖြူဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“လတ်တလောကတော့ လက်ရှိအနေအထားကတော့ သွားတော့ သွားနေသေးတယ်လို့ ကြားရတယ်ပေါ့နော်။ ဒါပေမယ့် တော်ရုံ ကျန်းမာရေးကိစ္စတို့ ဘာတို့ ဒီလောက်ပဲ သွားလို့ လာလို့ ရတယ်။ နောက်ပြီးတော့ သူတို့က အရင်က အဝင်အထွက်တွေလည်း စက်လှေနဲ့ လာတဲ့ဟာတွေကို အဝင်ခံတယ်။ အခု ဓညဝတီ ရေတပ်ဌာနချုပ် အတိုက်ခံရပြီးနောက်တော့ တိုက်ခံရပြီးနောက် လာခွင့်မပြုတော့ဘူး မြို့ပေါ်ကို” လို့ ပြောပါတယ်။

ပြီးခဲ့တဲ့နှစ်မှာတော့ ကျောက်ဖြူမြို့ဒေသထံတွေဟာ အာဏာပိုင်တွေရဲ့ ခွင့်ပြုချက်လက်မှတ်တွေနဲ့ ဝင်ထွက်သွားလာခွင့် ရှိပေမယ့် အခုက မြို့အဝင်အထွက်တွေကို လုံးဝ ကန့်သတ်ပိတ်ဆို့လိုက်တာကြောင့် တိုက်ပွဲရှောင်လိုတဲ့ ဒေသခံတွေလည်း အခက်တွေ့နေပါတယ်။

ကျောက်ဖြူမြို့ကနေ ထွက်ခွါတဲ့အခါမှာ ဒေသခံတွေက အထွေထွေအုပ်ချုပ်ရေးမှူးတွေဆီမှာ အဆင့်ဆင့် ခွင့်ပြုချက်တွေ ယူကြရပြီး လက်ရှိမှာတော့ ကျောက်ဖြူကနေ ရန်ကုန်နဲ့ မန္တလေးကိုသွားတဲ့ လေကြောင်းခရီးစဉ်တွေကလည်း မတ်လကုန်အထိကို လက်မှတ်တွေ ပြည့်နေတယ်လို့လည်း သိရပါတယ်။

“အခုကတော့ ကျောက်ဖြူကနေ ရန်ကုန်ကို လာလို့ရှိရင် ထွေအုပ်တို့ဆီမှာ အဆင့်ဆင့် ထောက်ခံချက်တွေ ယူပြီးမှ လာလို့ရတယ်။ ရန်ကုန်ကနေ ကျောက်ဖြူကို အဲဒီလို မဟုတ်ဘူး။ လက်မှတ်ရရင် ကျောက်ဖြူကို သွားလို့ရတယ်” လို့ လေယာဉ်လက်မှတ် ရောင်းချသူတစ်ယောက်က အာရက္ခတိုင်းမ်စ်ကို ပြောပါတယ်။

ရက္ခိုင်ရဲ့ အဓိက ရေတပ်စခန်းတစ်ခုဖြစ်တဲ့ ကျောက်ဖြူက ဓညဝတီ ရေတပ်ဌာနချုပ်ကို အာရက္ခတပ်တော်က ဖေဖော်ဝါရီ ၂၁ ရက်နေ့မှာ တိုက်ခိုက်ခဲ့တာပဲ ဖြစ်ပါတယ်။

အဲဒီအချိန်ကနေစပြီးတော့ စစ်ကောင်စီက ရေတပ်ဌာနချုပ်ရဲ့ အနီးအနားက ကျေးရွာတွေနဲ့ တောင်တန်းတွေကို ဒရုန်းနဲ့တိုက်ခိုက်တာ၊ လက်နက်ကြီးတွေနဲ့ အဆက်မပြတ် ပစ်ခတ်တာတွေအပြင် လေယာဉ်နဲ့ ဗုံးကြဲတာတွေ၊ ကျေးရွာတွေကို မီးရှို့တာတွေလည်း လုပ်လာနေတယ်လို့ သိရပါတယ်။

ကျောက်ဖြူမြို့နယ်မှာ အာရက္ခတပ်တော်နဲ့ စစ်ကောင်စီတပ်တို့ဟာ ဒီကနေ့အချိန်ထိ တိုက်ပဲဲပြင်းထန်လျက် ရှိနေပါတယ်။