စစ်တွေမှာ လိင်လုပ်သားတွေ ပိုမိုတွေ့လာနေရ

အာရက္ခတိုင်းမ်စ် (၂၅ မေ ၂၀၂၅)

စစ်ကောင်စီ ထိန်းချုပ်ထားတဲ့ ရက္ခိုင်ပြည် စစ်တွေမြို့မှာ လိင်လုပ်သား အမျိုးသမီးတွေကို အရင်ကထက် ပိုမိုတွေ့လာနေရတယ်လို့ ဒေသခံတွေက ပြောပါတယ်။

စစ်တွေမြို့မှာ တိုက်ပွဲမဖြစ်သေးတာကြောင့် စစ်တွေကို တခြားဒေသက မိန်းကလေးတွေကို ခေါ်လာပြီး စစ်တွေမှာ လိင်လုပ်သား လာလုပ်ကြတာတွေလည်း ရှိနေတယ်လို့ သိရပါတယ်။

အဓိကအားဖြင့် စစ်တွေမြို့ မင်းဂံဘက်က ရေကူးက်ဘက်တွေမှာ ပိုမိုတွေ့ရတယ်လို့ စစ်တွေဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“ လက်ရှိ စစ်တွေမှာက စစ်ဘေးလည်း မဖြစ်ဘူး။ ဘာမှလည်း မဖြစ်ဘူး။ အားလုံး အေးအေးချမ်းချမ်းတွေဖြစ်နေတယ်ဆိုတော့ ဗမာပြည်ကနေပြီးတော့ အမျိုးသမီးတွေကို ခေါ်လာပြီးတော့ ဒီမှာ ပြောရမယ်ဆိုရင် ခေါင်းလုပ်စားတာပေါ့။ မင်းဂံဘက်မှာ ရေကူးကန်ရှိတယ်။ အဲဒီရေကူးကန်မှာ များသောအားဖြင့် အမျိုးသမီးတွေ ခေါ်လို့ရတယ်ပြောတယ်။ 1 section ကို ၁ သောင်းဆိုလား အဲဒီလိုမျိုးတွေ ပေးရင်ရတယ်။ တချို့ဆိုရင် ကွမ်းယာရောင်းတဲ့ဆိုင်တွေမှာ ထိုင်နေကြတယ်။ တချို့ဆိုရင် ကွမ်းယာလည်းရောင်းတယ်။ အဲဒီလိုမျိုးလည်း ပုံစံမျိုး ဖြစ်နေကြတာလည်း ရှိတယ်” လို့ ပြောပါတယ်။

စစ်တွေမှာ တိုက်ပွဲတွေ မဖြစ်သေးပေမယ့်လည်း ငွေကြေးတတ်နိုင်တဲ့ သူတွေ၊ လုပ်ငန်းရှင်တွေက ရွှေ့ပြောင်းသွားကြတာကြောင့် စစ်တွေက ဒေသခံအမျိုးသမီးတွေ အလုပ်အကိုင် ရှားပါးသွားခဲ့ရပါတယ်။

အဲဒါအပြင် စစ်တွေမှာရှိတဲ့ နယ်စပ်ကုန်သွယ်ရေးတွေကလည်း အာရက္ခတပ်တော်နဲ့ စစ်ကောင်စီတို့ တိုက််ပွဲပြန်ဖြစ်တဲ့ ၂၀၂၃ ခုနှစ်ကတည်းကနေ အခုချိန်ထိ ပိတ်ထားရတာကြောင့်လည်း ကုန်စည်သယ်ကြတဲ့ အမျိုးသမီးတွေ အလုပ်လက်မဲ့ ဖြစ်လာကြပါတယ်။

အလုပ်အကိုင်ရှားပါးတဲ့အပြင် တစ်ဖက်မှာလည်း စားဝတ်နေရေးကြပ်တည်းလာကြတာကြောင့် အမျိုးသမီးတွေက လိင်လုပ်သားအလုပ်ကို ရွေးချယ်လာကြတာလည်း ဖြစ်တယ်လို့ သုံးသပ်ကြပါတယ်။

အဓိကအားဖြင့် ၂၀ ကျော်အရွယ် မိန်းကလေးတွေများပြီး သူတို့က အချိတ်အဆက်တွေနဲ့ လုပ်ကိုင်ကြတာ ဖြစ်တယ်လို့ စစ်တွေဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“ အခုချိန်က အလုပ်အကိုင်တွေက မရှိဘူး။ အဲဒါကြောင့် မိန်းကလေးတွေက ပျက်စီးနေကြတာပေါ့။ ငယ်ငယ်လေးတွေ ၂၀ ကျော်အရွယ်လေးတွေ ကောင်မလေးတွေက။ အရင်ကတော့ ရှိတယ်။ ဒါပေမယ့် အဲဒီလိုမျိုး အများကြီးတော့ မဟုတ်ဘူး။ အခုက သားအဖတွေရှိတဲ့ အရွယ်လောက်အထိ လုပ်စားတဲ့ အဲဒီလိုမျိုးတွေ လုပ်နေရတယ်။ ပိုက်ဆံက ရှာလို့မှမရတာ။ စီးပွားရေးကလည်း မရှိ။ အရင်တုန်းက အဲဒီကောင်မလေးတွေက ဆိုင်တွေဘာတွေမှာ လုပ်တယ်။ လစာနဲ့ ဝန်ထမ်းတွေ။ အခုက အဲဒီလိုမျိုး မရှိဘူး။ အဲဒါကြောင့် အလုပ်မရတဲ့သူက များလာတယ်။ စားဝတ်နေရေးတွေက ကြပ်တည်းလာကြတယ်။ ဒီမှာက KTV တို့ ကလပ်တို့ မရှိဘူး။ ဒါပေမယ့် သူတို့ဟာသူတို့ ချိတ်ဆက်ပြီး လုပ်နေကြတာ” လို့ ပြောပါတယ်။

စစ်တွေမှာ အရင်က လိင်လုပ်သားတွေရှိပေမယ့် အခုဆိုရင် အရင်ကထက် ပိုမိုများလာပြီး စစ်တွေမြို့ရဲ့ လမ်းမကြီးတွေထက်မှာ လိင်လုပ်သားတွေကို တွေ့နိုင်သလို တချို့သော စားသောက်ဆိုင်ကြီးတွေမှာလည်း တွေ့ရတာတွေ ရှိတယ်လို့လည်း သိရပါတယ်။