အာရက္ခတိုင်းမ်စ် (၄ စက်တင်ဘာ ၂၀၂၅)
ပဲခူးတိုင်း ပန်းတောင်းမြို့နယ် ဥသျှစ်ပင်မြို့အနီးက စစ်ကော်မရှင်ရဲ့ ကပစ ၆ ကို အာရက္ခတပ်တော်နဲ့ ပူးပေါင်းမဟာမိတ်အဖွဲ့တို့ ထိုးစစ်ဆင်နေပြီး ကာကင်းအချို့တို့ကို သိမ်းပိုက်ရရှိခဲ့တယ်လို့ သိရပါတယ်။
“ ဆင်လန်ရွာ တဝိုက်က ကာကင်းတွေကို သိမ်းလိုက်ပြီလို့ သိရတယ်။ ၃ ရက်လောက်ရှိပြီ လက်နက်ကြီးသံတွေကို ဆက်တိုက်ကြားနေရတာ။ ဒရုန်းတွေနဲ့လည်း ချတယ်။ ပြည်ဖက်က အင်အားဖြည့်တာတွေလည်း တွေ့နေရတယ်” လို့ ပန်းတောင်းမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
ပဲခူးတိုင်း ဥသျှစ်ပင်မြို့ ညောင်ခြေထောက်ရွာတွင် တည်ရှိတဲ့ ကပစ (၆) ကို လေသာတောင်၊ ဆင်လန်တောင်၊ စန်းပတ်လက်တောင် စတဲ့ စခန်းတွေနဲ့ ကာထားတာလည်း ဖြစ်ပါတယ်။
“ အခု သိမ်းတာက ထပ်တိုးကာကင်းခေါ်မှာပေါ့။ ကပစ ၆ ကို ရောက်ဖို့ မိုင်အားဖြင့် ၅ မိုင် နဲ့ ၇ မိုင်ကြားလောက်ပဲ လိုတော့တယ်” လို့ စစ်ရေးလေ့လာစောင့်ကြည့်သူတဦးက အာရက္ခတိုင်းမ်စ်ကို ပြောပါတယ်။
အဆိုပါ ကပစ (၆) တွင် လက်နက်ငယ်ကျည်ဆန်အခွံနဲ့ ကြေးပြားများကို ထုတ်လုပ်ပေးတဲ့ သံမဏိစက်ရုံကို တရုတ်ပညာရှင်များက တည်ဆောက်ပေးထားတာလည်း ဖြစ်ပါတယ်။
အလားတူ ဥသျှစ်ပင်မြို့ တောင်ဖက်တွင်လည်း စစ်ကော်မရှင်ရဲ့ ကပစ ၅ နဲ့ ကပစ ၉ တို့ အခြေစိုက်ထားတာလည်း ဖြစ်ပါတယ်။