အာရက္ခတိုင်းမ်စ် (၁၅ ဒီဇင်ဘာ ၂၀၂၅)
ရက္ခိုင်ပြည် ကျောက်ဖြူမြို့နယ်ရှိ ကျေးရွာ ၃ ရွာကို စစ်ကော်မရှင်က ဒီဇင်ဘာ ၁၃ ရက်နေ့မှာ ဗုံးကြဲ တိုက်ခိုက်ခဲ့တယ်လို့ သိရပါတယ်။
စစ်ကော်မရှင်က ဗုံးကြဲတိုက်ခိုက်ခဲ့တဲ့ ကျေးရွာများမှာ အင်တိုင်းရွာ၊ ကျောက်ကလေရွာ နဲ့ မင်းရပ်ရွာတို့ပဲ ဖြစ်ပါတယ်။
“၁၃ ရက်နေ့ နေ့လည် ၁ နာရီလောက်က အင်တိုင်းရွာက ဘုန်းကြီးကျောင်းကို ဗုံးချခဲ့လို့ ဘုန်းကြီးကျောင်း ပျက်စီးသွားတယ်” လို့ ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။
စစ်ကော်မရှင်က ကျောက်ဖြူမြို့နယ်ရှိ ကျေးရွာ ၃ ရွာကို ဗုံးကြဲခဲ့လို့ ဘုန်းကြီးကျောင်း ၂ ကျောင်းနဲ့ စာသင်ကျောင်း ၁ ကျောင်း ပျက်စီးသွားတယ်လို့ သိရပါတယ်။
“အဲဒီနေ့ပဲ နေ့လည် ၂ နာရီလောက်မှာ ကျောက်ကလေဘုန်းကြီးကျောင်းကို ထပ်ပြီးတော့ ဗုံးချတယ်။ အကုန်ပြိုပျက်ကုန်တယ်” လို့ သူက ထပ်မံပြောပါတယ်။
အလားတူ စစ်ကော်မရှင်ဟာ မင်းရပ်ရွာက စစ်ဘေးရှောင်များ ခိုလှုံနေတဲ့ မူလတန်းစာသင်ကျောင်းကိုလည်း ဗုံးချခဲ့လို့ စာသင်ကျောင်းလည်း ပျက်စီးသွားခဲ့ပါတယ်။
အာရက္ခတပ်တော်က စစ်ကော်မရှင်ရဲ့ လေကြောင်းရန် အထူးသတိထားနေထိုင်ရန် တိုက်တွန်းထားလို့ အရပ်သားပြည်သူ ထိခိုက်ဒဏ်ရာ ရရှိခဲ့ခြင်း မရှိဘူးလို့လည်း သိရပါတယ်။