နှစ်ပေါင်း ၁၀၀ လောက်မှာ တခါရတဲ့ အခွင့်အရေးကို အကောင်းဆုံး အသုံးချနိုင်ဖို့လိုလို့ ဒေါက်တာညိုထွန်းအောင်ပြော

အာရက္ခတိုင်းမ်စ် (၁၃ ဧပြီ ၂၀၂၆)

နှစ်ပေါင်း ၁၀၀ လောက်မှာမှ တခါလောက်ပေါ်တဲ့ အခွင့်အရေးဆိုတော့ ဒီအခွင့်အရေးကို ကျနော်တို့က အကောင်းဆုံးနဲ့ အကျိုးရှိရှိ အသုံးချနိုင်ဖို့လည်း လိုပါတယ်လို့ အာရက္ခတပ်တော် ဒုစစ်ဦးစီးချုပ် ဒေါက်တာ ညိုထွန်းအောင်က ပြောပါတယ်။

ဒီကနေ့မှာ ကျရောက်တဲ့ ကြားကာလ ချင်းအမျိုးသားအတိုင်ပင်ခံကောင်စီ (ICNCC) တည်ထောင်ခြင်း ၅ နှစ်ပြည့်အခမ်းအနားတွင် ဒေါက်တာညိုထွန်းအောင်က အခုလို အားပေးစကား ပြောကြားခဲ့တာလည်း ဖြစ်ပါတယ်။

“ဒီလိုမျိုး အခွင့်အရေးဆိုတာ ဒီ အာဏာသိမ်းပြီး နောက်ပိုင်းမှာကျတော့ အရင်က ဗမာကို ဗမာက တော်လှန်တဲ့ ပုံစံမျိုးက ရှိခဲ့ပေမယ့် သိပ်ပြီးတော့မှ မရှိခဲ့ဘူး။ အခုကျတော့ စစ်အာဏာရှင်ကို တော်လှန်တဲ့ အဖွဲအစည်းတွေလည်း ထပ်ပြီးမှပဲ ပေါ်လာတဲ့အတွက်ကြောင့် ကောင်းတဲ့ လက္ခဏာတခု ဖြစ်ပါတယ်။ ကျနော်တို့ အမြင်မှာဆိုတော့ နှစ်ပေါင်း ၁၀၀ လောက်မှာမှ တခါလောက်ပေါ်တဲ့ အခွင့်အရေးဆိုတော့ ဒီအခွင့်အရေးကို ကျနော့်တိုက အကောင်းဆုံးနဲ့ အကျိုးရှိရှိ အသုံးချနိုင်ဖို့လည်း လိုပါတယ်” လို့ ဒေါက်တာညိုထွန်းအောင်က ဆိုပါတယ်။

မြန်မာစစ်တပ်က စစ်အာဏာသိမ်းယူခဲ့ခြင်းမှာ နှစ်ပေါင်းများစွာ တော်လှန်နေတဲ့ တိုင်းရင်းသား လက်နက်ကိုင် အဖွဲ့အစည်းတွေအတွက် အခွင့်အရေး၊ အခွင့်ကောင်းတခု ဖြစ်ပေါ်ခဲ့တယ်လို့လည်း ဒေါက်တာညိုထွန်းအောင်က ဆိုပါတယ်။

“ကျနော်တို့က ရှမ်းမြောက် စစ်ဆင်ရေးအပါအဝင် ကိုယ့်ဒေသမှာ တိုင်းရင်းသား လက်နက်ကိုင်အဖွဲ့တွေကတော့ ထိုးစစ်ကြီးတွေ လုပ်ခဲ့ကြတဲ့အတွက်ကြောင့် ဒါဟာလည်း နွေဦးတော်လှန်ရေးနဲ့အတူ ပေါ်လာတဲ့ အခွင့်အရေးကို ကျနော်တို့ ERO တွေက အမိအရနဲ့ အခွင့်အရေးကို ရယူနိုင်ခဲ့တဲ့အတွက်ကြောင့် တော်လှန်ရေးအောင်ပွဲ အသီးအပွင့်တွေကို တဖွဲ့ချင်းသာမက သူနဲ့ သက်ဆိုင်တဲ့ ဆက်စပ်တဲ့လူတွေအားလုံးလည်း သူ့အတိုင်းအတာနဲ့သူ အောင်မြင်မှု ရရှိခဲ့ပါတယ်။ ဒီအောင်မြင်မှုတွေအပြင် အားလုံးမျှော်မှန်းထားတဲ့ မျှော်မှန်းချက်တွေ ရောက်ဖို့ကတော့ ကျနော်တို့ ဆက်လက် ကြိုးစားရပါဦးမယ်” လို့လည်း ဒေါက်တာ ညိုထွန်းအောင်က ဆိုပါတယ်။

သို့ပေမယ့် တော်လှန်ရေးအဖွဲ့အစည်းများ ရရှိနေတဲ့ အခွင့်အရေးမှာ နည်းသမျှ နည်းလာနေလို့ နွေဦးတော်လှန်ရေးအဖွဲ့အစည်းများ၊ တော်လှန်နေသူများအနေနဲ့ နေ့မအား၊ ညမအား ကြိုးစားကြရန် လိုအပ်တယ်လို့ ဒေါက်တာညိုထွန်းအောင်က တိုက်တွန်းခဲ့ပါတယ်။

“လက်ရှိ ကျနော်တို့ရနေတဲ့ အခွင့်အရေးဟာ နောက်ထပ် ဘယ်လောက် ဆက်ပြီးမှ ရနိုင်မလဲ။ ဘုံရန်သူဘက်က သူတို့အနေနဲ့ ကျနော်တို့ ရရှိထားတဲ့ အခွင့်အရေးကို ဆက်လို့ မပေးဖို့အတွက် ကြိုးစားနေတဲ့ဟာမျိုးကိုလည်း အားလုံး သိပြီးဖြစ်ပါတယ်။ ဆိုတော့ လက်ရှိရနေတဲ့ အခွင့်အရေးဟာ နည်းသမျှနည်းလာတဲ့အတွက်ကြောင့် ရတဲ့အချိန်ကာလလေးမှာ ကျနော်တို့ဟာ အင်တိုက်အားတိုက်နဲ့ နေ့မအား၊ ညမအား အဆတိုးပြီးတော့မှပဲ ကြိုးစားပြီးမှ ကိုယ့်ရဲ့အားနည်းချက်တွေကို အချိန်မီ ပြုပြင်နိုင်ဖို့အတွက် ခွန်အားအပြည့်နဲ့ ကြိုးစားကြပါလို့ ပြောလိုပါတယ်” လို့ ဒေါက်တာညိုထွန်းအောင်က တိုက်တွန်း ပြောဆိုခဲ့တာလည်း ဖြစ်ပါတယ်။

ကြားကာလ ချင်းအမျိုးသားအတိုင်ပင်ခံကောင်စီ ICNCC အပါအဝင် ချင်းတော်လှန်ရေးအဖွဲ့အစည်းများအနေနဲ့ စုဖွဲ့မှုများကို ပိုပြီး ကျစ်ကျစ်လစ်လစ်၊ စုစုစည်းစည်းနဲ့ ယုံကြည်ချက်အပြည့်၊ အားမာန်အပြည့်၊ ခွန်အားအပြည့်၊ လုံလဝီရိယအပြည့်နဲ့ အလုပ်လုပ်ပါက ပြင်းထန်တဲ့ တော်လှန်ရေး သန္နိဌာန်များကို မည်သူကမှ တားဆီး၍ မရနိုင်ဘူးလို့လည်း ဒေါက်တာညိုထွန်းအောင်က အားပေးစကား ပြောကြားခဲ့ပါတယ်။