လွတ်ငြိမ်းရမိသားစု ဆေးကုသနိုင်ရန် ULA ပါတီ ငွေကြေးထောက်ပံ့

အာရက္ခတိုင်းမ်စ် (၃ မတ် ၂၀၂၆)

လွတ်ငြိမ်းခွင့်ရမိသားစု ဆေးကုသနိုင်ရန်အတွက် ရက္ခိုင်အမျိုးသားအဖွဲ့ချုပ်က ငွေကျပ် ၁၀ သိန်း ထောက်ပံ့ကူညီပေးခဲ့တယ်လို့ သိရပါတယ်။

အဆိုပါ မိသားစုဟာ ၂၀၂၄ ခုနှစ် ဘူးသီးတောင်တိုက်ပွဲတွင် အာရက္ခတပ်တော်ထံ လက်နက်ချ အလင်းဝင်ရောက်လာတဲ့ စစ်ကော်မရှင်တပ်သား ဦးစိုးထက်ရဲ့ မိသားစုဝင်ပဲ ဖြစ်ပါတယ်။

ဦးစိုးထက်ရဲ့ သားဖြစ်သူ အသက် ၉ နှစ်အရွယ် မောင်လပြည့်အောင်ဟာ ကျန်းမာရေးမကောင်းလို့ ဆေးကုသမှုခံယူနေရပြီး ဆေးဆက်လက်ကုသနိုင်ရန် အခုလို ကူညီထောက်ပံ့ပေးတာလို့ ရက္ခိုင်အမျိုးသားအဖွဲ့ချုပ်ရဲ့ တာဝန်ရှိသူတဦးက ဆိုပါတယ်။

အာရက္ခတပ်တော်ထံ လက်နက်ချ အလင်းဝင်ရောက်လာတဲ့ ဦးစိုးထက်ဟာ မွန်ပြည်နယ် ရေမြို့နယ်ကဖြစ်ပြီး ဇနီးဖြစ်သူကတော့ ရက္ခိုင်ပြည် စစ်တွေမြို့ ကုန်တန်းရပ်ကွက် (၁) နေ အသက် ၃၇ နှစ်အရွယ် ဒေါ်ဌေးဌေးဖြူ ဖြစ်တယ်လို့ သိရပါတယ်။

ဦးစိုးထက်၊ ဒေါ်ဌေးဌေးဖြူတို့ရဲ့ သားဖြစ်သူ အသက် ၉ နှစ်အရွယ် မောင်လပြည့်အောင်ဟာ ကျန်းမာရေးမကောင်းလို့ ဆေးကုသမှု ခံယူနေရပြီး ဆေးကုသစာရိတ်အနေနဲ့ တရက်ကို ငွေကျပ် ငါးသောင်းခန့် ကုန်ကျတယ်လို့လည်း သိရပါတယ်။

ရက္ခိုင်အမျိုးသားအဖွဲ့ချုပ်အနေနဲ့ လူသားချင်းစာနာမှုမူဝါဒအတိုင်း မိသားစု ရင်ဆိုင်နေရတဲ့ ဆေးကုသစာရိတ် လျော့ပါးသက်သာစေရန် အခုလို ထောက်ပံ့ကူညီပေးတာလို့လည်း သိရပါတယ်။