ပလက်ဝဒေသခံတွေ လက်နက်ကိုင်အဖွဲ့တွေရဲ့ စစ်သားစုဆောင်းခံရမှာ စိုးရိမ်နေ

အာရက္ခတိုင်းမ်စ် (၂၇ ဧပြီ ၂၀၂၆)

အာရက္ခတပ်တော် ထိန်းချုပ်ထားတဲ့ ချင်းပြည်နယ်၊ ပလက်ဝမြို့နယ်ရှိ ပလက်ဝဒေသခံ လူငယ်တွေဟာ လက်နက်ကိုင်အဖွဲ့တွေရဲ့ စစ်သားစုဆောင်း ဖမ်းဆီးခံရမှာကို စိုးရိမ်နေကြတယ်လို့ အာရက္ခတိုင်းမ်စ်ကို ပြောပါတယ်။

ပလက်ဝဒေသဟာဆိုရင် အာရက္ခတပ်တော် ရှိသလို ပလက်ဝဒေသနဲ့ အနီးတစ်ဝိုက်မှာလည်း ချင်းတိုင်းရင်းသား လက်နက်ကိုင်တပ်ဖွဲ့တွေ ရှိတာကြောင့် အဖွဲ့တခုခုရဲ့ ဖမ်းဆီးခံရမှာကို စိုးရိမ်တာ ဖြစ်တယ်လို့ ပလက်ဝဒေသခံတယောက်က အာရက္ခတိုင်းမ်စ်ကို ပြောပါတယ်။

“သူတို့ ဟိုတနေ့ကသွားတော့ ဆိုင်ကယ်နဲ့ ဟိုနားဒီနား ဟိုရွာဒီရွာ သွားပို့တဲ့သဘောနဲ့ သွားလို့ရှိရင်လည်း သူတို့ လမ်းမှာ ဖမ်းတာကိုး။ ဖမ်းပြီးလို့ မလွှတ်တာ အများကြီးပဲ။ နောက်ပြီးတော့ နှစ်ဦးနှစ်ဖက် ကြောက်ရတာက ကျနော်တို့ ချင်းတပ်ဘက်ကိုလည်း ကြောက်ရတယ်၊ AA ဘက်ကိုလည်း ကြောက်နေရတယ် ပလက်ဝသားတွေက။ နောက်ပြီးတော့ စစ်သားစုဆောင်းတာလည်း ဟိုဘက်ကရော ဒီဘက်ကရော စုဆောင်းနေတာ။ ခေါ်လည်းခေါ်တယ် ခေါ်လည်းခေါ်သွားကြတယ်” လို့ ပြောပါတယ်။

ပလက်ဝဒေသအနီးတဝိုက်မှာ ချင်းကာကွယ်ရေးတပ် CDF နဲ့ ချင်းအမျိုးသားတပ်မတော် CNA တို့လည်း ရှိနေတာ ဖြစ်ပါတယ်။

CDF – ပလက်ဝ ထိန်းချုပ်ဒေသတွင်းရှိ လူငယ် လူရွယ်များ တော်လှန်ရေးတွင် ပူးပေါင်းပါဝင်နိုင်ရေးအတွက် ကျန်းမာရေးနဲ့ ပညာရေးကိစ္စရပ်များမှအပ အရွယ်ရောက်ပြီးသူ လူငယ်များကို ပလက်ဝဒေသ ပြင်ပသို့ ထွက်ခွားခြင်းကို ၂၀၂၅ ခုနှစ် ဒီဇင်ဘာလ ၂၀ ရက်က စတင်ပြီး ကန့်သတ်လိုက်တယ်လို့ CDF – ပလက်ဝက ကြေညာထားပါတယ်။

ဒေသတွင်းရှိ လူငယ်လူရွယ်များအနေနဲ့ ချင်းလဲန်းကာကွယ်ရေးတပ်ဖွဲ့ – ပလက်ဝတွင် ပူးပေါင်းပါဝင်ပြီး ဒေသကာကွယ်ရေးတာဝန် ထမ်းဆောင်ရေးမှာ ပြည်သူတိုင်းရဲ့ သမိုင်းပေးတာဝန်တရပ် ဖြစ်တယ်လို့လည်း CDF – ပလက်ဝက ထုတ်ပြန်ထားပါတယ်။

“တင်းကြပ်လာတာ အခု ဒီကလူတွေက စီးပွားရေးအရသော်လည်းကောင်း၊ ကျန်းမာရေးအရသော်လည်းကောင်း၊ ပညာရေးအရသော်လည်းကောင်း မြို့နယ်ကနေ အပြင်ထွက်ဖို့ဆိုတာ သူတို့ တော်တော်လေး တင်းကြပ်တယ်၊ ဖမ်းတယ် ထွက်လို့မရဘူး။ ကျန်းမာရေးနဲ့ ပတ်သက်လို့ ကုသမှုဆိုရင်တောင်မှ ဆေးဆရာတွေရဲ့ ထောက်ခံမှု မရှိတော့ အချက်အလက်တွေ မပါလာနိုင်ဘူးလေ။ ဆိုတော့ မပေးဘူး။ မရဘူး မထွက်ရဘူး ဖြစ်ကုန်တာ” လို့ ပြောပါတယ်။

ချင်းပြည်နယ်၊ ပလက်ဝမြို့နယ်ကို အာရက္ခတပ်တော်က စစ်ကော်မရှင်တပ်နဲ့ ပြန်လည်ဖြစ်ပွားခဲ့တဲ့ တကျော့ပြန်တိုက်ပွဲအတွင်း ပြီးခဲ့တဲ့ ၂၀၂၃ နိုဝင်ဘာ ၁၃ ရက်နေ့မှာ စတင်ထိုးစစ်ဆင်ခဲ့တာဖြစ်ပြီး ၂၀၂၄ ခုနှစ် ဇန်နဝါရီလ ၁၃ ရက်မှာ သိမ်းပိုက် ထိန်းချုပ်နိုင်ခဲ့တာ ဖြစ်ပါတယ်။