အာရက္ခတိုင်းမ်စ် (၃၀ ဇူလိုင် ၂၀၂၆)
အာရက္ခတပ်တော်ရဲ့ တပ်ဖွဲ့ဝင် ၂၀ အပါအဝင် တော်လှန်ရေးတပ်ဖွဲများက တပ်ဖွဲ့ဝင် စုစုပေါင်း ၃၂ ဦး အလင်းဝင်ရောက်လာတယ်လို့ ရွေးတုအစိုးရက ဇူလိုင်လ ၂၉ ရက်မှာ ဝါဒဖြန့်ချီခဲ့ပါတယ်။
ရွေးတုအစိုးရထံ အာရက္ခတပ်တော်မှ အလင်းဝင်လာသူများမှာ ဂွမြို့နယ်က ၄ ဦး၊ သံတွဲမြို့နယ်က ၆ ဦး၊ တောင်ကုတ်မြို့နယ်က ၁ ဦး၊ မင်းပြားမြိုနယ်က ၁ ဦး၊ ရမ်းဗြဲမြို့က ၁ ဦး၊ မြေပုံမြို့က ၂ ဦး၊ ပလက်ဝမြို့နယ်က ၃ ဦး၊ ဧရာဝတီတိုင်း ကျိုက်လတ်မြို့နယ်က ၁ ဦး ၊ လေးမျက်နှာမြို့နယ်က ၁ ဦး တို့ဖြစ်တယ်လို့ ဆိုပါတယ်။
လားတူ အလင်းဝင်လာတဲ့ PDF တပ်ဖွဲ့ဝင်များမှာ ဧရာဝတီတိုင်း ရေကြည်မြို့နယ်က ၂ ဦး၊ ပုသိမ်မြို့နယ်က ၂ ဦး၊ ဓနုဖြူမြို့နယ်က ၂ ဦး၊ လေးမျက်နှာမြို့နယ်က ၃ ဦး၊ အင်္ဂပူမြို့နယ်က ၁ ဦး၊ ရန်ကုန်တိုင်း အင်းစိန်မြို့နယ်က ၁ ဦး၊ ဒဂုန်ဆိပ်ကမ်းမြို့နယ်က ၁ ဦး ဖြစ်ပြီး BPLA က နှစ်ဦးပါဝင်တယ်လို့လည်း ဆိုပါတယ်။
အလင်းဝင်လာသူများဟာ လက်နက်ခဲယမ်းတွေဖြစ်တဲ့ မောင်းပြန်ရိုင်ဖယ် ၂ လက်၊ MA 2 မောင်းပြန်ရိုင်ဖယ် ၁ လက်၊ BA – 63 ၂ လက်၊ Type- 81 ၅ လက်၊ M 22 ၁ လက် ၊ LM -16 ပါရီ ၁ လက်၊ AK – 47 ၁ လက်၊ တရုတ်ကြိုးဆွဲလက်ပစ်ဗုံး ၆ လုံး၊ ကျည်မျိုးစုံ ၄၅၆ တောင့်နဲ့ ကျည်အိမ်မျိုးစု ၂၀ တိုကို အပ်နှံခဲ့ပြီး အလင်းဝင်လာသူများကို ၁ ဦးလျှင် ဆုကြေးငွေ ၃ သိန်း စီပေးခဲ့ပြီး လက်နက် တစ်ခုစီအတွက် သိန်း ၅၀ စီ ပေးအပ်ခဲ့တယ်လို့လည်း ဆိုပါတယ်။
အဆိုပါအခမ်းအနားကို ရွေးတုအစိုးရတပ်တိုင်းမှူး ဗိုလ်မှူးချုပ် အောင်ကျော်ခိုင်နဲ့ ဝန်ကြီးချုပ် ဦးအေးကျော်တို့ တက်ရောက်ခဲ့ကြပြီး၊ အမှန်စင်စစ်တွင် အလင်းဝင်လာသူများမှာ အဖွဲ့အစည်းဝင်များမဟုတ်ဘဲ တပ်တွင်းမိသားစုဝင်များကိုသာ လူစားထိုးကာ လိမ်လည်ရိုက်ကူး ပုံဖော်ခဲ့ခြင်း ဖြစ်တယ်လို့ သတင်းအထူးတပ်ဖွဲ့-ပုသိမ်က ဆိုပါတယ်။