ရေကြည်တွင် ရွေးတုအစိုးရတပ် AA ရှိမယ်ထင်တဲ့နေရာတွေကို လက်နက်ကြီးနဲ့ပတ်ခတ်လို့ ဒေသခံ ၂ ဦး သေဆုံး

အာရက္ခတိုင်းမ်စ် (၇ ဇူလိုင် ၂၀၂၆)

ဧရာဝတီတိုင်း ရေကြည်မြို့နယ်မှာ စစ်ရေးအရ ရှုံးနိမ့်နေတဲ့ ရွေးတုအစိုးရတပ်ဟာ အာရက္ခတပ်တော် ရှိနိုင်တယ်လို့ ထင်တဲ့နေရာတွေကို လက်နက်ကြီးနဲ့ ပစ်ခတ်တိုက်ခိုက်လို့ ဒေသခံပြည်သူ ၂ ဦး သေဆုံးခဲ့ပြီး ၃ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။

“၅ ရက်နေ့ ညနေဖက်ပေါ့ ၅ နာရီလောက် ရှိမယ်ထင်တယ်။ စစ်တပ်ကနေ လယ်ကွင်းတွေထဲကို လက်နက်ကြီးတွေနဲ့ ပစ်တာ၊ လယ်လုပ်နေတဲ့ ဒေသခံ ၂ ယောက် သေသွားတယ်။ ၃ ယောက် ဒဏ်ရာ ရသွားတယ်။ ဘုရားကြီးရွာမှာ ဖြစ်သွားတာ” လို့ ရေကြည်မြို့နယ်ဒေသခံတစ်ဦးက အာရက္ခတိုင်းမ်စ်ကို ပြောပါတယ်။

၂၀၂၆ ခုနှစ် ဇူလိုင်လ ၂ ရက်တွင် ဧရာဝတီတိုင်း ရေကြည်မြို့နယ်ရှိ ရွေးတုအစိုးရတပ်ရဲ့ ၂၂၇ ပွိုင့်ကုန်း အနောက်ဘက် ၁.၁ ကီလိုမီတာခန့်အကွာတွင် တပ်စွဲထားတဲ့ ပထမ ကာကင်းကုန်းနေရာနဲ့ ၂၀၂၆ ခုနှစ် ဇူလိုင်လ ၃ ရက်တွင် ၂၂၇ ပွိုင့်ကုန်းကနေ ၁ ကီလိုမီတာခန့် အကွာအဝေးရှိ ဒုတိယ ကာကင်းကုန်း (တာဝါတိုင်စခန်းကုန်း) တို့ကို အာရက္ခတပ်တော်က သိမ်းပိုက်အပြီးမှာ ယခုလို ရွေးတုအစိုးရတပ်က လက်နက်ကြီးတွေနဲ့ ပြည်သူတွေကို ရည်ရွယ်ချက်ရှိရှိ ပစ်ခတ် တိုက်ခိုက်နေတာလည်း ဖြစ်ပါတယ်။

“စစ်တပ်က အခု လက်နက်ကျည်ကျတဲ့ ဘုရာကြီးရွာမှာ အမြောက်တပ် အထိုင်ချ တပ်ဆွဲထားတယ်။ ပြီးတော့ ရွှေရင်မျှော်ကုန်း၊ မရမ်းချို၊ မြေရဲနဲ့ ကမ္ဘားနီဘက်ကိုပါ အမြောက်တပ်တွေ ထပ်ချဲ့နေတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။

၂၀၂၆ ခုနှစ် ဇွန်လ ၁၇၊ ၁၉၊ ၂၁ ရက်များတွင် ဧရာဝတီတိုင်း ရေကြည်မြို့နယ်ရှိ ရွေးတုအစိုးရတပ်ရဲ့ ပွိုင့် ၂၈၈၊ ပွိုင့် ၁၈၈ နဲ့ ပွိုင့် ၁၄၈ ကုန်းတို့ကို အာရက္ခတပ်တော်က သိမ်းပိုက်ရယူခဲ့ပြီးနောက်တွင် တိုက်ပွဲများ နေ့စဉ် ရက်ဆက် ဖြစ်ပွားပြီး ရွေးတုအစိုးရတပ်ဟာ အဆိုပါ ပွိုင့်ကုန်းများကို ပြန်လည်ရယူနိုင်ရန်အတွက် စစ်အင်အားများကို ထပ်မံ ဖြည့်တင်းကာ ထိုးစစ်များကို မရပ်မနား ပြုလုပ်နေတယ်လို့လည်း သိရပါတယ်။

အဆိုပါ ကာကင်းစခန်းကုန်းသိမ်း တိုက်ပွဲများအတွင်း ရန်သူ့အလောင်းတချို့နဲ့ လက်နက်ခဲယမ်းတချို့ကို သိမ်းပိုက်ရရှိခဲ့ပြီး ပွိုင့် ၂၂၇ ကုန်းက ထွက်ပြေးနေတဲ့ တပ်မ ၆၆ လက်အောက်ခံ ခမရ ၁၀၈ တပ်ရင်းက တပ်သားတွေကို လိုက်လံ ချေမှုန်းနေတယ်လို့လည်း အာရက္ခတပ်တော်က ဆိုပါတယ်။