အာရက္ခတိုင်းမ်စ် (၂၇ မတ် ၂၀၂၅)
ဧရာဝတီတိုင်း ပုသိမ်ခရိုင် ရေကြည်မြို့နယ်ရှိ နဂါးရစ်တောင်အနီးတွင် အာရက္ခတပ်တော် ပူးပေါင်းမဟာမိတ်အဖွဲ့တွေ နဲ့ စစ်ကောင်စီတို့ ပြင်းပြင်းထန်ထန် တိုက်ပွဲဖြစ်ပွားနေတယ်လို့ အာရက္ခတိုင်းမ်စ်ကို ပြောပါတယ်။
“ ကြည့်ရတာ သူတို့ တော်တော် အရေးနိမ့်နေပုံရတယ်။ လေကြောင်းပစ်ကူအနေနဲ့ Mi 17 helicopter ရော Y 12 နဲ့ရော ကူပစ်ပေးနေတယ်။ အခု နေ့လည် ၂ နာရီကျော်ကလည်း ထပ်ပြီးတော့ helicopter နဲ့ ထပ်ပစ်နေတယ်” လို့ ရေကြည်မြို့ဒေသခံတစ်ဦးက ပြောပါတယ်။
မနေ့က မတ်လ ၂၆ ရက်ကလည်း စစ်ကောင်စီရဲ့ လေကြောင်းဖြင့် ပစ်ခတ်မှုကြောင့် နဂါးရစ်တောင်ဘုန်းတော်ကြီးကျောင်းလည်း ပျက်စီးသွားတယ်လို့ ဆိုပါတယ်။
အလားတူ ရေကြည်မြို့နယ် အမတ (၃၄၄) ကနေလည်း လက်နက်ကြီးတွေနဲ့ ပစ်ကူပေးနေလို့ မြို့နေဒေသခံတွေ ကြောက်လန့်နေကြပြီး ထွက်ပြေးတိမ်းရှောင်ဖို့ ပြင်ဆင်ကြတယ်လို့လည်း ဆိုပါတယ်။
“ နဂါးရစ်တောင် အနောက်ဖက်က ကျေးရွာတွေကို ဒေသခံတွေကို စစ်ခွေးတွေက ပေးမထွက်ဘူး။ ပိတ်မိနေကြတယ်။ လူသားဒိုင်း လုပ်ချင်နေတာထင်တယ်” လို့ သူက အာရက္ခတိုင်းမ်စ်ကို ထပ်မံပြောပါတယ်။
ရေကြည်မြို့နယ်က ဒေသခံပြည်သူအချို့ စစ်ဘေးရှောင်လာကြသဖြင့် စစ်ကောင်စီက ရေနံ့သာ – ငါးသိုင်းချောင်း ကားလမ်းကို မနေ့ နေ့လည်ပိုင်းက ယာယီပိတ်ထားတယ်လို့လည်း သိရပါတယ်။
အဆိုပါ နဂါးရစ်တောင်အနီးတွင် လျှော်ဖြူခြံများ၊ ရာဘာခြံများ ရှိနေပြီး စစ်ကောင်စီရဲ့ လေကြောင်းတိုက်ခိုက်မှုကြောင့် မီးလောင် ပျက်စီးခဲ့တယ်လို့လည်း သိရပါတယ်။
ရေကြည်မြို့နယ်တွင် တိုက်ပွဲများ ဖြစ်ပွားနေတာကြောင့် စစ်ရေးအရ ရှုံးနိမ့်နေတဲ့ စစ်ကောင်စီဟာ ငါးသိုင်းချောင်းမြို့အနီးရှိ တောင်ဝှေးထောက်၊ ဘုရားကုန်း၊ သရက်ချောင်း စတဲ့နေရာတွေမှာ ကတုတ်ကျင်းများတူးကာ ခုခံရန် ပြင်ဆင်နေတယ်လို့ သိရပါတယ်။
ယနေ့ နေ့လည် ၂ နာရီ ၄၅ မိနစ်ကလည်း ပုသိမ်မြို့ နတခ တောင်ပေါ်ကနေ Mi 35 helicopter တစ်စီးဟာ ရေကြည်မြို့နယ် နဲ့ ရက္ခိုင်ရိုးဘက်ကို ပျံသွားတယ်လို့ ပုသိမ်မြို့ဒေသခံတစ်ယောက်က အာရက္ခတိုင်းမ်စ်ကို ပြောပါတယ်။
6 comments