အာရက္ခတိုင်းမ်စ် (၅ စက်တင်ဘာ ၂၀၂၅)
မွတ်ဆလင်အရေး ကိစ္စတွေနဲ့ ပတ်သက်ပြီး အာရက္ခတပ်တော် (AA) နဲ့အတူ ထောက်ခံရပ်တည်တယ်လို့ ဗမာ့တပ်တော် (BAMAR ARMY) က စက်တင်ဘာလ ၅ ရက် ဒီကနေ့မှာ ထုတ်ပြန်ပါတယ်။
ရက္ခိုင်ပြည်၊ ဘူးသီးတောင်မြို့နယ် ထန်းရှောက်ခံ ဖြစ်စဥ်မှာ မွတ်ဆလင်တွေကို အာရက္ခတပ်တော်က လူမျိုးတုန်း သတ်ဖြတ်တယ်လို့ လန်ဒန်အခြေစိုက် မြန်မာ-မွတ်ဆလင် (BROUK) အမည်ခံ ပြည်ပအဖွဲ့အစည်းက စွပ်စွဲပြီး အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်၊ ဒုတိယစစ်ဦးစီးချုပ် ဒေါက်တာညိုထွန်းအောင်နဲ့ အမိန့်ပေးစေခိုင်းသူတွေကို ဖမ်းဝရမ်းထုတ်ပေးရေး အာဂျင်တီးနားတရားရုံးကို စက်တင်ဘာလ ၃ ရက်က စာပို့ တောင်းဆိုခဲ့ပါတယ်။
ဘူးသီးတောင်မြို့နယ်၊ ထန်းရှောက်ခံကျေးရွာဖြစ်စဉ်နဲ့ပတ်သက်ပြီး ဒေသခံပြည်သူတွေကို အစုလိုက်အပြုံလိုက် သတ်ဖြတ်ခဲ့တာမရှိဘူးလို့ အာရက္ခတပ်တော်က ပြည်သူလူထုနဲ့ လူ့အခွင့်ရေးဆိုင်ရာ အဖွဲ့အစည်းတွေနဲ့ မီဒီယာတွေကို သက်သေတွေနဲ့အတူ ရှင်းလင်းချပြထားပြီး ဖြစ်တယ်လို့ သိရပါတယ်။
အဲဒါအပြင် မြေပြင်မှာ အာရက္ခပြည်သူ့တော်လှန်ရေးအစိုးရ ULA/AA က သူ့ရဲ့ထိန်းချုပ်နယ်မြေတွေမှာ မွတ်ဆလင်အသိုင်းအဝိုင်းအပါအဝင် လူမျိုးခြား၊ ဒေသခံပြည်သူတွေကို လူသားချင်းစာနာမှုနဲ့ တတ်နိုင်တဲ့ဘက်က ကူညီစောင့်ရှောက်မှုတွေ ဆောင်ရွက်ပေးနေတာကြောင့် အာရက္ခတပ်တော် (AA) နဲ့အတူ ရပ်တည်တာ ဖြစ်တယ်လို့ ဗမာ့တပ်တော် (BA) က ထုတ်ပြန်ပါတယ်။
ဒါ့ကြောင့် လန်ဒန်အခြေစိုက် မြန်မာ-မွတ်ဆလင် (BROUK) အမည်ခံ ပြည်ပအဖွဲ့အစည်းတခုက အာရက္ခတပ်တော်ခေါင်းဆောင်တွေကို အာဂျင်တီးနားတရားရုံးမှာ ဖမ်းဝရမ်းထုတ်ပေးရေး တင်ပြမှုအပေါ် ဗမာ့တပ်တော်က ပြင်းထန်စွာရှုတ်ချသလို အာရက္ခတပ်တော်နဲ့အတူ ထောက်ခံရပ်တည်တယ်လို့ ဆိုပါတယ်။
