တောင်ကုတ်တွင် ရွှေထည်ခိုးယူသူတဦးကို ဒီလပ် ဖမ်းဆီး

အာရက္ခတိုင်းမ်စ် (၇ ဧပြီ ၂၀၂၆)

ရက္ခိုင်ပြည် တောင်ကုတ်မြို့နယ်တွင် ရွှေထည်ပစ္စည်းခိုးယူနေသူတဦးကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာနက မတ်လ ၂၅ ရက်တွင် ဖမ်းဆီးရမိခဲ့တယ်လို့ သိရပါတယ်။

ရွှေထည်ပစ္စည်း ခိုးယူမှုနဲ့ ဖမ်းဆီးခံရသူမှာ ရက္ခိုင်ပြည် တောင်ကုတ်မြို့နယ် တန်းလွဲရွာမ အမှတ် ၁ ရပ်ကွက်နေ အသက် ၂၀ အရွယ် မိပြုံးချို ဖြစ်တယ်လို့ သိရပါတယ်။

ရွှေထည်ခိုးယူမှု ဖြစ်စဉ်ဟာ ၂၀၂၆ ခုနှစ် ဖေဖော်ဝါရီလ ၄ တွင် တောင်ကုတ်မြို့နယ် တန်းလွဲရွာမနေ အသက် ၃၃ နှစ်အရွယ် မလှလှအေးဟာ သားဖြစ်သူ မောင်အေးမင်းစိုးကို နေအိမ်တွင်ထားခဲ့ပြီး ရပ်ကွက်အတွင်းရှိ ရှင်ပြုအလှူတွင် ကူညီလုပ်ကိုင်ပေးရန် သွားခဲ့စဉ် ဖြစ်ခဲ့တာလို့ သိရပါတယ်။

မလှလှအေးဟာ အိမ်သို့ ပြန်လည်ရောက်ရှိလာစဉ် နေအိမ် အိပ်ခန်းထဲရှိ သံသေတ္တာထဲက ကာလတန်ဖိုး သိန်း ၂၀၀ ခန့် တန်ဖိုးရှိ ရွှေဆွဲကြိုး ၂ ကုံး နဲ့ ရွှေလက်ကောက် ၃ ကွင်း ပျောက်ဆုံးကြောင်း သိရှိရလို့ မတ်လ ၁၁ ရက်တွင် တောင်ကုတ်မြို့မ ဒီလပ်ဌာနကို လာရောက်တိုင်ကြားခဲ့ပြီး ဒီလပ်ဌာနအနေနဲ့ (ပ)၂၄/၂၀၂၆၊ ရာဇသတ်ကြီးပုဒ်မ ၃၈၀ အရ အမှုဖွင့်ခဲ့တယ်လို့ သိရပါတယ်။

အဆိုပါ ခိုးမှုနဲ့ပတ်သက်ပြီး ဒီလပ်ဌာနက စုံစမ်းစစ်ဆေးပြီး သံသယတရားခံဖြစ်သူ မိပြုံးချိုက “ သူဟာ မလှလှအေး အိမ်ကို ရောက်ရှိခဲ့ကြောင်း၊ သားဖြစ်သူ အေးမင်းစိုးကို မုန့်တီခေါ်ကျွေးပြီး အိပ်ခန်းထဲက သံသေတ္တာထဲ ရွှေထည်းတွေကို ခိုးယူခဲ့ကြောင်း ဝန်ခံခဲ့တယ်” လို့ အာရက္ခမှုခင်းနဲ့ဆက်စပ်သတင်းများထုတ်ပြန်ရေးအဖွဲ့က ဧပြီလ ၇ ရက်မှာ ထုတ်ပြန်ခဲ့ပါတယ်။

ဒီလပ်ဌာနအနေနဲ့ ၂၀၂၆ ခုနှစ် ဇန်နဝါရီလ ၁ ရက်ကနေ မတ်လ ၃၁ ရက်အထိ ရက္ခိုင်ပြည်တွင် ခိုးမှုပေါင်း ၇၀ ကို အရေးယူ ဆောင်ရွက်ခဲ့တယ်လို့လည်း သိရပါတယ်။