ကျောက်ဖြူကနေ ၃ မိုင်အကွာတောင် ဒေသခံတွေ သွားခွင့်မရှိ

အာရက္ခတိုင်းမ်စ် (၂၇ မေ ၂၀၂၆)

တိုက်ပွဲတွေ ပြင်းထန်စွာဖြစ်ပွားနေတဲ့ ရက္ခိုင်ပြည်၊ ကျောက်ဖြူမြို့နယ်မှာတော့ ဒေသခံပြည်သူလူထုဟာ မြို့နဲ့ ၃ မိုင်အကွာအဝေးသာရှိတဲ့ နေရာတွေကိုတောင် သွားလာခွင့်မရှိဘူးလို့ ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။

တခြား တိုင်းရင်းသားဒေသတွေမှာ တိုက်ပွဲတွေ ဖြစ်ပွားနေတာချင်း တူညီပေမယ့် အဲဒီဒေသက တိုင်းရင်းသား လူထုတွေကတော့ စိတ်ကြိုက် သွားလာခွင့်ရကြပေမယ့် ရက္ခိုင်ပြည်မှာတော့ အဲဒီလိုမျိုး သွားလာခွင့် မရတဲ့အပေါ် ခံပြင်းကြောင်းလည်း ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။

“ကျောက်ဖြူမှာက ဘာလဲဆိုတော့ သူများတွေ ကချင်တွေတို့၊ ကရင်တွေတို့နဲ့ မတူဘူး။ ကချင်တို့၊ ကရင်တို့မှာ စစ်ဖြစ်ရင် ဖြစ်ရော၊ လမ်းပွင့်ရင် ပွင့်ရော သွားကြတယ်၊ လာကြတယ်။ ဒီမှာက အဲဒီလို မဟုတ်ဘူး။ ကျောက်ဖြူကနေပြီးတော့ ၄၅ မိနစ်လောက် သွားရတဲ့ခရီး၊ ကျေးရွာကိုတောင်မှ မသွားရဘူး။ အဲဒါမှာလည်း နေဗီတွေ စောင့်ကြည့်တယ်။ ပြီးတော့ ကျောက်ဖြူရဲ့အထွက် ၃ မိုင်အကွာ ပတ်ပတ်လည်ကို ဘယ်ကိုမှ သွားလို့မရဘူး။ ကျောက်ဖြူရဲ့ ၃ မိုင်လောက်ပဲ သွားလို့ရတယ်။ ကျန်တဲ့နေရာ တခုမှ မရဘူး။ ကျွန်းလို ဖြစ်နေတယ်။ တိုက်ပွဲဖြစ်ကြရင်လည်း ဖြစ်ကြ လမ်းတွေ ဖွင့်ပေးလိုက်။ အဲဒီလိုလည်း မဖွင့်ဘူး။ အဲဒီအခါကြတော့ ကုန်စည်စီးဆင်းမှုတွေ မရှိတဲ့အခါကြတော့ လူတွေလည်း အခက်အခဲ တွေ့တာပေါ့။ အသား၊ ငါးကတော့ ပင်လယ်တွေရှိနေလို့ ငါးတွေ ရှာစားကြတာ တခုတော့ ဖြစ်တယ်” လို့ သူက ပြောပါတယ်။

တိုက်ပွဲဖြစ်တာက တိုက်ပွဲဖြစ်တာတပိုင်း၊ ဒေသခံလူထုအတွက် လမ်းဖွင့်ပေးတာကတပိုင်း ခွဲခြားထားသင့်တယ်လို့လည်း ဒေသခံတွေက ပြောပါတယ်။

အဲဒီလိုမျိုး နယ်နိမိတ်ကျော်ပြီး သွားခွင့်မရှိတာကို သွားလာတဲ့အခါမျိုးမှာ နေဗီက မိသွားတယ်ဆိုရင် လူသတ်မှုထက်မက ကြီးကျယ်ပြီး ထောင်ချခံရတယ်လို့ ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။

“သူတို့တွေက သံတွဲမှာသွားပြီးတော့ ငါးခြောက်တွေ သွားဝယ်တာလေ။ ငါးနီတူတွေ သွားဝယ်တာလေ။ အဲဒီမှာက ပင်လယ်တွေမှာ နေဗီတွေ ရှိတယ်။ နေဗီကဖမ်းလို့ ၁၀ နှစ် ကျသွားတယ်။ အမျိုးသမီးတွေလည်း ပါသွားတယ်။ လူသတ်မှုထက်မက ကြီးကျယ်တယ် ဖမ်းသွားတာလေ။ သွားခွင့်မရှိတာ၊ သွားခွင့်မရှိတာကို သွားတယ်။ စားဝတ်နေရေးကြတော့ သွားခွင့်မရှိလည်း လူတွေက အရဲစွန့်ကြတာပေါ့” လို့ သူက ပြောပါတယ်။

ဒါ့အပြင် ကျောက်ဖြူလေဆိပ်မှာ စကစရဲ့ ဂျိုင်ရိုကော်ပတာတွေ အများအပြားရောက်ရှိ နေကြောင်းလည်း သိရပါတယ်။

လက်ရှိမှာတော့ အာရက္ခတပ်တော်နဲ့ စကမ တပ်တွေဖြစ်ပွားနေတဲ့ တိုက်ပွဲတွေကြောင့် ကျောက်ဖြူမြို့နယ်က သိုင်းချွိန်၊ တောင်မော်၊ မြောချောင်း၊ ထိန်ဒွေ၊ ပြုံးပြဲ၊ အဝတောင် စတဲ့ ကျေးရွာပေါင်း ၁၃ ရွာကျော်က ဒေသခံ ၈၀၀၀ ခန့် အိုးအိမ်စွန့်ခွာ နေကြရကြောင်းလည်း သိရပါတယ်။