စစ်တွေမှာ လူမရှိတဲ့နေအိမ်တွေ နေ့စဥ်ဖောက်ထွင်းခံနေရ
အာရက္ခတိုင်းမ်စ် (၂၆-အောက်တိုဘာ-၂၀၂၄)
စစ်ကောင်စီက ကုန်းလမ်း ရေလမ်းတွေ ဖြတ်တောက်တဲ့အပြင် မြို့ကို ခြံစည်းရိုးကာထားတဲ့ စစ်တွေမြို့တွင်းက လူမရှိတဲ့ နေအိမ်တွေဟာ နေ့တိုင်းဆိုသလို ဖောက်ထွင်းခံနေရတယ်လို့ ဒေသခံတွေက ဆိုပါတယ်။
စစ်ကောင်စီက ကုန်းလမ်း ရေလမ်းကို ဖြတ်တောက်ထားတာကြောင့် စစ်တွေမှာနေထိုင်တဲ့ လူဦးရေ တစ်ဝက်ကျော်လောက်ဟာ ဒေသအသီးသီးကို စစ်ဘေးရှောင်နေရချိန်မှာ ကျန်ခဲ့တဲ့ နေအိမ်တွေကို အခုလို ဖောက်ထွင်းမှုတွေ လုပ်နေကြတာလည်း ဖြစ်ပါတယ်။
“ ပထမပိုင်းတုန်းက အစွန်အဖျား ရပ်ကွက်တွေလောက်မှာပဲ လူမမြင်အာင် အိမ်တွေကို ပျဥ်တွေခွာတာ၊ ပစ္စည်းတွေကို ယူတာတွေ လုပ်ကြတာ။ အခုက နေ့ခင်းကြောင်တောင်လည်း ယူနေကြတယ်။ ဒီကာလ ဒီအခြေအနေမှာ သူတို့ကို သွားလည်း မပြောရဲဘူး။ အကုန်လုံးက ကိုယ့်ဒုက္ခနဲ့ ကိုယ်ဆိုတော့ ဒီအတိုင်းပဲ ကြည့်နေရတယ်” လို့ အမည်မဖော်လိုတဲ့ စစ်တွေဒေသခံတစ်ဦးက ဆိုပါတယ်။
ဒါ့အပြင် နာဇီရွာရပ်ကွက်မှာဆိုရင် လူမရှိတဲ့နေအိမ်တွေကို ALP တပ်ဖွဲ့ဝင်ဆိုသူတွေက လက်ညှိုးထိုး ရောင်းစားတာတွေ လုပ်နေပြီး နေအိမ်အလုံး ၂၀ ကျော်လောက် ဖြိုဖျက် ရောင်းစားခံထားကြရပြီ ဖြစ်တယ်လို့လည်း နာဇီရွာရပ်ကွက်မှာ နေထိုင်တဲ့ အမည်မဖော်လိုတဲ့ ဒေသခံတစ်ဦးက ဆိုပါတယ်။
“ ALP က လူတွေက ဘုမေရပ်ကွက်ဘက်က မူဆလင်တွေကိုခေါပြီး အိမ်တွေကို လက်ညှိုးထိုး ရောင်းစားတာ။ သူတို့ကို ကြောက်နေရတော့ ဘယ်သူမှလည်း မပြောရဲဘူး” လို့ သူက ဆိုပါတယ်။
လက်ရှိ စစ်တွေမြို့တွင် စစ်ကောင်စီမှ ကုန်းလမ်း ရေလမ်း ပိတ်ဆို့ထားမှုကြောင့် အခြေခံစားသောက်ကုန်များ စျေးနှုန်း စံချိန်တင် မြင့်တက်နေပြီး လောင်စာ (ထင်း၊မီးသွေး) လိုအပ်ချက်များကြောင့် ယခုကဲ့သို့ လူမရှိသည့် အိမ်များကို ဖောက်ထွင်းခြင်း၊ နေအိမ်များကို ဖြိုဖျက်ကာ ထင်းအဖြစ် ပြန်လည် ရောင်းစားခြင်းများ ဖြစ်ပေါ်နေခြင်းဖြစ်ကြောင်း ဒေသခံများက ဆိုသည်။
“ ကျွန်မတို့ တစ်သက်လုံး ရှာဖွေစုဆောင်းပြီး ဆောက်ထားတဲ့အိမ်လေး အပေါ်ထပ်က ပျဥ်တွေအကုန် မရှိတော့ဘူးဆိုပြီး ရပ်ကွက်ထဲမှာ ကျန်ခဲ့တဲ့ အသိက ဖုန်းဆက်လာပါတယ်။ နောက်ပြီး အိမ်မှာလည်း ဘာပရိဘောဂ ပစ္စည်းမှလည်း မကျန်တော့ဘူးလို့လည်း ကြားတယ်။ ဒီသတင်းတွေကြားရင် ဖြစ်ချင်ရာဖြစ် အိမ်ကို ပြန်ပြေးချင်စိတ်ပေါက်မိတယ်” လို့ စစ်တွေမြို့က ရန်ကုန်မြို့ကို စစ်ဘေးရှောင်လာတဲ့ အမည်မဖော်လိုသူ တစ်ဦးက ပြောပါတယ်။
စစ်တွေမြို့ကို အုပ်ချုပ်နေတဲ့ စစ်ကောင်စီ အဖွဲ့ဝင်တွေအနေနဲ့ အိမ်ဖောက်ထွင်းသူတွေကို လိုက်လံဖမ်းဆီးတာတွေ လုပ်ဆောင်နေပေမယ့် ဖောက်ထွင်းမှုတွေကတော့ လျော့ကျလာမယ့်အစား နေ့စဥ်ဆိုသလို ဖြစ်ပွားနေတာကြောင့် စစ်ကောင်စီတပ်ဖွဲ့ဝင်တွေနဲ့ ဖောက်ထွင်းသူတွေဟာ လက်ဝါးချင်းရိုက်ပြီး လုပ်ဆောင်နေသလားလို့တောင် ထင်မိတယ်လို့လည်း ဒေသခံတွေက ဆိုပါတယ်။
ရခိုင်ပြည်နယ်မှာ ပြီးခဲ့တဲ့ ၂၀၂၃ ခုနှစ် နိုဝင်ဘာလ ၁၄ရက်က စတင်ခဲ့တဲ့ ၁၀၂၇ စစ်ဆင်ရေးနောက်ပိုင်း တိုက်ပွဲတွေကြောင့် နေရပ်စွန့်ခွာပြီး စစ်ဘေးရှောင်နေရသူ နှစ်သိန်းကျော်အထိ ရှိလာနေပြီဖြစ်ကြောင်း စစ်တမ်းတွေအရ သိရပါတယ်။
