အာရက္ခတိုင်းမ်စ် (၂၉ မတ် ၂၀၂၅)
ညီနောင်မဟာမိတ် ၃ ဖွဲ့ဖြစ်တဲ့ MNDAA, TNLA နဲ့ AA က ငလျင်ဘေးဒဏ်သင့် ပြည်သူလူထုများအပေါ် လူသာခြင်း ထောက်ထားစွာနဲ့ မိမိတို့ ညီနောင်မဟာမိတ် ၃ ဖွဲ့ အနေနဲ့ တတ်နိုင်တာများကို အမြန်ဆုံး ထောက်ပံ့ပေးမယ်လို့ ဒီနေ့မှာ ထုတ်ပြန်ခဲ့ပါတယ်။
“ ငလျင်ကြောင့် ပြည်သူလူထုများ သေဆုံးခြင်း၊ ထိခိုက်ဒဏ်ရာရခြင်း နဲ့ အဆောက်အဦးများ၊ ပစ္စည်းဥစ္စာများ ဆုံးရှုံးရခြင်းတို့အတွက် မိသားစုများ၊ ဆွေမျိုးများ နဲ့ ထပ်တူ ဝမ်းနည်းရပြီး များစွာ စိတ်မကောင်းဖြစ်ရတယ်” လို့လည်း ညီနောင်မဟာမိတ် ၃ ဖွဲ့ က ဆိုပါတယ်။
နောက်ဆက်တွဲ ငလျင်များ ထပ်မံဖြစ်ပေါ်လာနိုင်ဖွယ် ရှိနေသေးတာကြောင့် ပြည်သူလူထုများအနေနဲ့ အထူးဂရုစိုက် သွားလာ နေထိုင်ကြပါရန်နဲ့ သတင်းမှန်များကို နားစွင့်ကြရန် ညီနောင်မဟာမိတ် ၃ ဖွဲက တိုက်တွန်းထားပါတယ်။
“သဘာဝဘေးဒဏ်ကြောင့် ပြည်သူလူထုများ အသက်အိုးအိမ်စည်းစိမ် နဲ့ အဆောက်အအုံများစွာတို့ ပျက်စီးဆုံးရှုံးခဲ့ရမှုအပေါ် မိမိတို့ ညီနောင်မဟာမိတ် ၃ ဖွဲ့ အနေနဲ့ ကာယကံရှင်မိသားစုများ၊ ဆွေမျိုးများ နဲ့ ထပ်တူ ဝမ်းနည်းရပြီး များစွာ စိတ်မကောင်းဖြစ်ရပါတယ်” လို့လည်း ထုတ်ပြန်ပါတယ်။
စစ်ကောင်စီရဲ့ ဒီကနေ့ ထုတ်ပြန်ချက်အရ ငလျင်ဒဏ်ကြောင့် သေဆုံးသူ တစ်ထောင်ကျော်ရှိခဲ့ပြီး အဆောက်အဦး၊ လမ်း၊ ဘာသာရေးအဆောက်အအုံ မြောက်များစွာ ပျက်စီးခဲ့တယ်လို့ သိရပါတယ်။
