အာရက္ခတိုင်းမ်စ် (၁၅ ဒီဇင်ဘာ ၂၀၂၅)
အာဏာသိမ်းစစ်ခေါင်းဆောင်ဟာ ဒီကနေ့ ဒီဇင်ဘာ ၁၅ ရက်နေ့မှာ ကျရောက်တဲ့ ၅၁ နှစ်မြောက် ရက္ခိုင်ပြည်နယ်နေ့ အခမ်းအနားကို ပေးပို့တဲ့သဝဏ်လွှာထဲမှာ လက်နက်ကိုင် အကြမ်းဖက်နည်းနဲ့ မိမိတို့လိုလားချက်ကို တောင်းဆိုလို့ မရဘဲ နိုင်ငံရေးစားပွဲဝိုင်းကို ရောက်လာပြီး ငြိမ်းချမ်စွာဖြေရှင်းဖို့ ပြောဆိုခဲ့ပါတယ်။
အဲဒီ နည်းလမ်းနဲ့သာ ပဋိပက္ခတွေကို ပြေလည်စေမှာဖြစ်တာကို သိရှိပြီး လက်နက်ကိုင်လမ်းစဉ်ကို စွန့်လွှတ်ကာ လမ်းကြောင်းမှန်ပေါ် ရောက်ရှိရေး တိုက်တွန်းတယ်လို့ အာဏာသိမ်းစစ်ခေါင်းဆောင်က ပြောပါတယ်။
ဒါ့အပြင် ရက္ခိုင်ပြည်နယ်ဟာ လမ်းပန်းဆက်သွယ်ရေးကအစ အဘက်ဘက်မှ အခက်အခဲများစွာ ရှိနေတဲ့အတွက် အစိုးရအဆက်ဆက်က ရက္ခိုင်ပြည်နယ် ဖွံ့ဖြိုးတိုးတက်ရေးကို အခုအချိန်အထိ အလေးထား ဆောင်ရွက်ခဲ့တာကြောင့် အရင်ကထက် အဆပေါင်းများစွာ ပြောင်းလဲ တိုးတက်လာတယ်လို့လည်း ပြောထားတာပါ။
ဒါပေမယ့်လည်း လက်ရှိကာလမှာ ရက္ခိုင်ပြည်နယ်အပါအဝင် နိုင်ငံတွင်း တည်ငြိမ်အေးချမ်းမှု မရှိတာကို အခွင့်ကောင်းဘူပြီး မိမိတို့နိုင်ငံရဲ့ ပထဝီနိုင်ငံရေးအရ အရေးပါမှုကို အသုံးချဖို့ အင်အားကြီး နိုင်ငံတချို့က ဩဇာလွှမ်းမိုး ချုပ်ကိုင်လိုတဲ့အတွက် ဆူပူအကြမ်းဖက်မှုတွေနဲ့ မတည်မငြိမ်ဖြစ်အောင် ဖန်တီးပုံဖော်နေတာကို မြင်တွေ့ရမှာ ဖြစ်တယ်လို့လည်း အာဏာသိမ်းစစ်ခေါင်းဆောင်က ပြောထားပါတယ်။
ရက္ခိုင်ပြည်နယ်မှာ ရက္ခိုင်တိုင်းရင်းသား မျိုးနွယ်စုများအပြင် တခြားသော တိုင်းရင်းသားမျိုးနွယ်စုတွေနဲ့ အတူယှဉ်တွဲနေထိုင်တာ ဖြစ်တဲ့အတွက် ပြည်နယ် အေးချမ်းသာယာရေးနဲ့ ဖွံ့ဖြိုးတိုးတက်ရေးမှာ မှီတင်းနေထိုင်ကြတဲ့ တိုင်းရင်းသား အားလုံးအပေါ်မှာ မှီတည်နေကြောင်းလည်း အာဏာသိမ်းစစ်ခေါင်းဆောင်က ဆိုပါတယ်။
ရက္ခိုင်ပြည်နယ် ဖွံ့ဖြိးရေးအတွက်လည်း မတည်ရန်ပုံငွေထဲက ထောက်ပံ့ငွေ ကျပ် ၁၀ ဘီလျံကို ခွင့်ပြုထားကြောင်းလည်း သိရပါတယ်။
လက်တွေ့ မြေပြင်မှာတော့ စစ်ကော်မရှင်ဟာ ရက္ခိုင်ပြည်နယ်ကို လမ်းပန်းဆက်သွယ်ရေးအပြင် အင်တာနက်လိုင်း၊ လျှပ်စစ်မီးများပါ ဖြတ်တောက်ထားတာဖြစ်သလို လူထုကို နည်းမျိုးနဲ့ အကြပ်အတည်းဖြစ်အောင် လုပ်ဆောင်နေတာလည်း ဖြစ်ပါတယ်။
ဒါ့အပြင် အခုရက်ပိုင်းအတွင်းမှာဆိုရင် ရက္ခိုင်ပြည်နယ်ထဲက မြောက်ဦး၊ ရသေ့တောင်၊ ပေါက်တော အစရှိတဲ့ မြို့နယ်တွေကို စကစ ဟာ လေကြောင်းဗုံးကြဲမှုတွေ ပိုမိုလုပ်ဆောင်လာတာကြောင့် သေဆုံးမှုနဲ့ ဒဏ်ရာရရှိသူတွေလည်း အများအပြား ရှိလာနေပါတယ်။
5 comments