မာန်အောင်မှာ AFP နဲ့ RNP တို့ မဲအသာစီးရနေတယ်လို့ ဒေသခံ‌တွေဆို

အာရက္ခတိုင်းမ်စ်(၂၉ ဒီဇင်ဘာ ၂၀၂၅)

ရက္ခိုင်ပြည်၊ မာန်အောင်မြို့မှာ မနေ့က ကျင်းပခဲ့တဲ့ စစ်ကော်မရှင်ရဲ့ ရွေးကောက်ပွဲမှာ AFP နဲ့ RNP ပါတီတို့ မဲအသားစီရနေတယ်လို့ ‌ဒေသခံတွေက ဆိုပါတယ်။

စကမရဲ့ပါတီစုံ ဒီမိုကရေစီ အထွေထွေ ရွေးကောက်ပွဲ အပိုင်း (၁) ကို မနေ့က ဒီဇင်ဘာ ၂၈ ရက်မှာ စကမ ထိန်းချုပ်ထားတဲ့ ရက္ခိုင်ပြည်၊ မာန်အောင်၊ စစ်တွေ နဲ့ ကျောက်ဖြူမြို့တွေမှာ ပြုလုပ်ခဲ့တာပဲ ဖြစ်ပါတယ်။

မဲပေးဖို့ ဆန္ဒမရှိ‌ပေမယ့် စစ်ကော်မရှင် ထိန်းချုပ်နယ်မြေမှာ နေထိုင်ရတဲ့ ဒေသခံတွေအနေနဲ့ သွားရောက် မဲပေးခဲ့ရတယ်လို့ ဆိုပါတယ်။

“ ကျနော်တို့ အရင်တုန်းလိုမျိုးဆိုရင် ထွေအုပ်ကတော့ ကြော်ငြာတာ ဘာညာတော့ အရင်တုန်းကတော့ မရှိဘူး။ အခုကတော့ မဲဆန္ဒနယ်မှာ ၆နာရီကနေ ၄နာရီ မဲပေးရမယ်ဆိုပြီး လိုက်လံကြေညာတာတော့ ရှိပါတယ်။ ဒီမှာကတော့ အဲဒါကတော့ ကျနော်တို့ကျွန်းမှာ လူဦးရေက နည်းတယ်လေ။ လူဦးရေက တကယ်တမ်းဆိုလို့ရှိရင် ၅ သောင်း အောက်မှာပဲ ရှိတယ်။ ၅ သောင်းရဲ့အောက်မှာရှိတယ်ဆိုတော့ ပွင့်ပွင့်လင်းလင်း ပြောရမယ်ဆိုရင်တော့ အကြောက်တရားနဲ့ မဲပေးကြတာပေါ့” လို့ ဒေသခံတဦးက အာရက္ခတိုင်းမ်စ်ကို ပြောပါတယ်။

လက်ရှိ ဒီဇင်ဘာ ၂၉ ရက်မှာတော့ မဲရလဒ်တွေအပေါ် အတိအကျ မသိရသေးပေမယ့် ရက္ခိုင့်ဦးဆောင်ပါတီ (AFP) နဲ့ ရခိုင်တိုင်းရင်းသားများပါတီ RNP ပါတီတို့ မဲအသာစီးရနေတယ်လို့ သိရပါတယ်။

အဆိုပါ ဒေသခံက “ လက်ရှိ ကျနော် ကြားထားတာကတော့ ဟိုဟာပေါ့ ရခိုင့်ဦးဆောင်ပါတီ ဒေါက်တာအေးမောင်ပါတီပေါ့။ သူတို့ပါတီကတော့ အမျိုးသားလွှတ်တော်ထဲမှာတော့ နိုင်တယ်လို့ ပြောတယ်။ နောက် ဦးဘရှိန်ပါတီ သူတို့ပါတီကျတော့ ပြည်သူ့လွှတ်တော်မှာ အနိုင်ရတယ်လို့ အဲ့လိုတော့ အကြမ်းအားဖြင့် သိထားတယ်ခင်ဗျ” လို့ အာရက္ခတိုင်းမ်စ်ကို ပြောပါတယ်။

မာန်အောင်မြို့နယ်မှာ ရခိုင့်ဦးဆောင်ပါတီ (AFP)၊ ရခိုင်တိုင်းရင်းသားများပါတီ (RNP)၊ ပြည်ထောင်စုကြံ့ခိုင်ရေးနှင့် ဖွံဖြိုးရေးပါတီ (USDP)၊ ပြည်သူ့ရှေ့ဆောင်ပါတီ (ppp) တို့က ဝင်ရောက်ယှဉ်ပြိုင်ခဲ့တာဖြစ်ပြီး မဲရုံပေါင်း ၇၂ ရုံရှိတယ်လို့ သိရပါတယ်။

ရွေးကောက်ပွဲ အပိုင်း (၂) ကို ဇန်နဝါရီလ ၁၁ ရက်နေ့မှာ မြို့နယ် (၁၀၀) မြိုန့ယ်တွင် ပြုလုပ်မှာဖြစ်ပြီး ‌ရွေးကောက်ပွဲ အပိုင်း (၃) ကိုတော့ ဇန်နဝါရီလ ၂၅ ရက်မှာ မြို့နယ် (၆၃) မြို့နယ်တွင် ပြုလုပ်မှာ ဖြစ်တယ်လို့ UEC က ထုတ်ပြန်ထားပါတယ်။

ကျောက်ဖြူ နဲ့ စစ်တွေမြို့နယ်ကို စစ်ကော်မရှင်က ထိန်းချုပ်ထားပေမယ့် အဆိုပါ မြို့နယ်တွေရှိ ရပ်ကွက် ၆ ခု အပါအဝင် ကျေးရွာအုပ်စု ၆၅ စုမှာတော့ ရွေးကောက်ပွဲ အပိုင်း ၂ နဲ့ ၃ ကျင်းပမှာမဟုတ်ကြောင်း ပြည်ထောင်စု ရွေးကောက်ပွဲကော်မရှင် (UEC) က ထုတ်ပြန် ကြေညာခဲ့ပါတယ်။

ဒါ့အပြင် ရက္ခိုင်ပြည်ရှိ အမ်း၊ သံတွဲ၊ ဂွ နဲ့ တောင်ကုတ်မြို့တွေမှာလည်း ရွေးကောက်ပွဲ ကျင်းပရန် အခြေအနေ မရှိတာကြောင့် ကျင်းပခြင်း ပြုမှာမဟုတ်ကြောင်း ပြည်ထောင်စုရွေးကောက်ပွဲကော်မရှင် ဥပဒေ ပုဒ်မ ၁၀ (စ) အရ ဒီဇင်ဘာ ၂၇ ရက်၊ ညပိုင်းမှာ ထုတ်ပြန်ခဲ့ပါသေးတယ်။