ရက္ခိုင်မှာ ဗိုလ်ချုပ်က သံတမန်ရေးကျွမ်းကျင်တဲ့အတွက် စိတ်ပူစရာမလိုလို့ ပြော

အာရက္ခတိုင်းမ်စ် (၂၁ ဖေဖော်ဝါရီ ၂၀၂၆)

ရက္ခိုင်ပြည်မှာ အာရက္ခတပ်တော်ရဲ့ ခေါင်းဆောင် ဗိုလ်ချုပ်ထွန်းမြတ်နိုင်က စစ်ရေး၊ သံတမန်ရေး ကျွမ်းကျင်တဲ့အတွက် အားလုံးနဲ့ ရင်းနှီးသင့်မြတ်တဲ့ ဆက်ဆံရေး မရှိမှာကို စိတ်ပူစရာ မလိုကြောင်း နိုင်ငံရေးလေ့လာသုံးသပ်သူ ဦးခွန်းဆိုင်က အာရက္ခတိုင်းမ်စ်ကို ပြောပါတယ်။

AA ခေါင်းဆောင် ဗိုလ်ချုပ်ထွန်းမြတ်နိုင်ဟာ ၂၀၁၉ ခုနှစ်က ကွန်ဖက်ဒရိတ်ဆိုတဲ့ အသုံးအနှုန်းကို စတင်ပြောဆိုခဲ့ကာ ဒါဟာ ခွဲထွက်ခြင်း မဟုတ်ဘဲ အလုံးစုံလွတ်လပ်တဲ့ ပြည်နယ်များ စုဖွဲ့ခြင်းဖြစ်ပြီး ကိုယ့်ကြမ္မာကိုယ် ဖန်တီးခွင့်အာဏာ အပြည့်အဝရှိတယ်လို့ သိရပါတယ်။

အာရက္ခတပ်တော်အနေနဲ့ ပြည်ထောင်စုကြီးမှာပဲ နေသည်ဖြစ်စေ၊ လွတ်လပ်တဲ့ နိုင်ငံကို ထူထောင်သည်ဖြစ်စေ အားလုံးနဲ့ ရင်းနှီးသင့်မြတ်တဲ့ ဆက်ဆံရေးကို တည်ဆောက်ရမှာဖြစ်တယ်လို့ နိုင်ငံရေးလေ့လာသုံးသပ်သူ ဦးခွန်းဆိုင်က အာရက္ခတိုင်းမ်စ်ကို ပြောပါတယ်။

“သို့သော် ရိုးရိုးပြောနိုင်တာတော့ ရက္ခိုင်က သူက ဒီပြည်ထောင်စုကြီးမှာပဲ ဆက်နေရင်ဖြစ်ဖြစ် သူကိုယ်တိုင်ကလည်း ဆက်နေမယ်ပြောတာကို။ ဒီလွတ်လပ်တဲ့နိုင်ငံကို ထူထောင်သည်ပဲဖြစ်ဖြစ် သူ့အနေနဲ့ကတော့ အားလုံးနဲ့ သင့်မြတ်စွာဆက်ဆံရေး၊ ရင်းနှီးတဲ့ဆက်ဆံရေးကို သူက ဆက်လက် တည်ဆောက်ရမှာပဲ။ ဒီလိုမျိုး မတည်ဆောက်နိုင်ရင်လည်း ဆက်လက်ရပ်တည်ဖို့က အားလုံးမှာ စိန်ခေါ်ချက်တွေရှိတယ်။ ကျော်လွှားဖို့မလွယ်ဘူးပေါ့။ အဲဒါတော့ ကျနော်ပြောလို့ရပါတယ်။ ဒါပေမယ့် ကျနော်သိသလောက်ဆိုလို့ရှိရင်တော့ ဗိုလ်ချုပ်ထွန်းမြတ်နိုင်လည်း အင်မတန်မှ စစ်ရေး၊ နိုင်ငံရေး၊ သံတမန်ရေးမှာ ကျွမ်းကျင်တဲ့ပုဂ္ဂိုလ်တဦးဆိုတော့ ကျနော်ထင်တယ် သိပ်စိတ်ပူစရာ မလိုပါဘူး” လို့ သူက ပြောပါတယ်။

လက်ရှိမှာတော့ အာရက္ခတပ်တော်ဟာ ရက္ခိုင်ပြည်မှာ စစ်တွေ၊ ကျောက်ဖြူနဲ့ မာန်အောင် တို့ကလွဲရင် ကျန်မြို့တွေ အားလုံးကို သိမ်းပိုက်ထိန်းချုပ်ထားသလို ကိုယ်ပိုင်အစိုးရယန္တရားနဲ့ စတင် လည်ပတ်နေပြီလည်း ဖြစ်ပါတယ်။

ဒ့ါအပြင် အာရက္ခတပ်တော်ဟာ စစ်ကိုင်းတိုင်းမှာ ၂၀၂၅ ခုနှစ်ကမဟာမိတ်တွေနဲ့ ပူးပေါင်း လှုပ်ရှားနေပြီး ၂၀၂၃ ခုနှစ်ကလည်း ထီးချိုင့်မြို့နယ်အတွင်း စစ်ရေးဖော်ဆောင်မှု အချို့ရှိခဲ့ပါတယ်။

ရက္ခိုင်ပြည်အပြင် မကွေး၊ ပဲခူး၊ ဧရာဝတီ၊ ချင်းပြည်နယ်၊ စစ်ကိုင်းတိုင်းနဲ့ ကချင်ပြည်နယ်တို့မှာလည်း ပူးတွဲပြီး စစ်ရေးဖော်ဆောင်နေကြောင်းလည်း သိရပါတယ်။