အာရက္ခတိုင်းမ်စ် (၁၂ နိုဝင်ဘာ ၂၀၂၄)
ရက္ခိုင်ပြည်၊ အမ်းမြို့နယ်မှာ စစ်ကောင်စီရဲ့ လေယာဉ်တစ်စီးကို အာရက္ခတပ်တော်မှ ပစ်ချနိုင်ခဲ့တယ်လို့ အေအေရဲ့ ပြန်ကြားရေးတာဝန်ခံ ခိုင်သုခက အတည်ပြုပြောကြားပါတယ်။
နိုဝင်ဘာ ၁၀ ရက် နေ့လယ် ၂ နာရီခွဲမှာ အမ်းမြို့ အခြေစိုက် အနောက်ပိုင်းတိုင်းစစ်ဌာနချုပ်ကို စစ်ကူ၊ လက်နက်၊ ရိက္ခာတွေ ပို့ဆောင်တဲ့ Y12 နှစ်စီး၊ ရဟတ်ယာဉ် ၄ စီးထဲမှာမှ တစ်စီးကို ပစ်ချနိုင်တာလို့ သိရပါတယ်။
“အေအေ ပစ်လိုက်တဲ့ လက်နက်ကြီးကြောင့် လေယာဉ်တစ်စီး တောင်ပံထိသွားတယ်၊ မီးခိုးတွေထွက်ပြီးတော့ မကွေးဖက်ကို ပျက်ကျသွားတယ်” လို့ အမ်းဒေသခံ တစ်ဦးက ပြောပါတယ်။
ထို့အတူ နိုဝင်ဘာ ၁၁ ရက် မနက်ပိုင်းက စစ်ကောင်စီရဲ့ ပဲပဒုံစစ်ဆေးရေးဂိတ်ကို အာရက္ခတပ်တော်က သိမ်းပိုက်လိုက်ကြောင်းလည်း သိရပါတယ်။
ဆက်လက်ပြီး အာရက္ခတပ်တော် အနေနဲ့ အမ်းမြို့အခြေစိုက် ခမရ ၃၇၁ တပ်ရင်း၊ တိုင်းဌာနချုပ်နဲ့ တပ်ထိန်း၊ တပ်ရင်းတို့ကို ဆက်လက်ပြီး သိမ်းပိုက်နိုင်ဖို့ ထိုးစစ်ဆင်နေတယ်လို့ သိရပါတယ်။
