အာရက္ခတိုင်းမ်စ် (၂၅ ဒီဇင်ဘာ ၂၀၂၄)
အာရက္ခတပ်တော်ရဲ့ ရက္ခိုင်ပြည်မှာ စစ်ကောင်စီတပ် အလုံးစုံ ချုပ်ငြိမ်းရေး ရည်မှန်းချက်သည် ရာနှုန်းပြည့် အောင်မြင်မှု ရနိုင်တယ်လို့ ရက္ခိုင်ပြည်သူတွေက ပြောပါတယ်။
စစ်ကောင်စီတပ် အများဆုံးရှိတဲ့ မြို့ဖြစ်သလို အနောက်ပိုင်းတိုင်းစစ်ဌာချုပ်ရှိတဲ့ အမ်းမြို့နယ်ကိုတောင် အာရက္ခတပ်တော်က ထိုးစစ်ဆင်ပြီး သိမ်းပိုက်ထားနိုင်တဲ့အတွက် ကျန်နေတဲ့ စစ်တွေ၊ ကျောက်ဖြူနဲ့ မာန်အောင်မြို့တွေကို တိုက်ခိုက်တဲ့အခါမှာ အမ်းမြို့ကို တိုက်ခိုက်သလောက် မခက်တော့ဘူးလို့ ရက္ခိုင်ပြည်သူတွေက ပြောပါတယ်။
ဒါ့ကြောင့် အာရက္ခတပ်တော်ရဲ့ ရက္ခိုင်ပြည်မှာ စစ်ကောင်စီတပ် အလုံးစုံ ချုပ်ငြိမ်းရေး ရည်မှန်းချက်သည် ရာနှုန်းပြည့် အောင်မြင်မှု ရမှာ ဖြစ်တယ်လို့ အမ်းမြို့ဒေသခံတစ်ယောက်က ပြောပါတယ်။
“အမ်းတိုက်ပွဲကို ကျနော်တို့ ပထမ ပြန်ကြည့်ဖို့ လိုအပ်တယ်။ အမ်းမှာ အနောက်ပိုင်းတိုင်း စစ်ဌာနချုပ် တည်ရှိတယ်ပေါ့နော်။ စစ်ကောင်စီ အင်အားအလုံးအရင်း ချထားတဲ့မြို့။ ရက္ခိုင်ပြည်မှာဆို တပ်အင်အား အများဆုံးမြို့ပေါ့။ အဲဒီမြို့မှာလည်း လက်နက်ခဲယမ်းတွေ အမြောက်အများနဲ့ တောက်လျောက် အသုံးပြုထားတယ်ပေါ့နော်။ နောက်ပြီး လေကြောင်းတွေလည်း တောက်လျောက် အသုံးပြုခဲ့တယ်။ ဆိုတဲ့အခါမှာ သူတို့က လက်နက်တွေ တောက်လျောက် ပစ်ခဲ့တယ်ပေါ့နော်။ အထူးသဖြင့် အာရက္ခတပ်တော်ရဲ့ ပစ်မှတ်တွေကို ပြန်ကြည့်မယ်ဆိုရင် မြေအောက် တပ်စခန်းတွေကို တောက်လျောက် ပစ်မှတ်ထားခဲ့တယ်ပေါ့နော်။ အဲဒီအနေအထားမှာ အာရက္ခတပ်တော်အနေနဲ့ မာန်အောင်တို့၊ ကျောက်ဖြူတို့၊ စစ်တွေတို့ကို သိမ်းဖို့ အာရက္ခတပ်တော်အနေနဲ့ အဆင်သင့် လုပ်ထားပြီးပြီလို့ ထင်တယ်ပေါ့နော်။ လက်နက်ကြီးတွေ တပ်ဆင်ပြီးတော့ ပြင်ဆင်ထားတဲ့ အနေအထား ရောက်နိုင်တယ်။ အဲဒီလိုပုံစံမျိုးဆို မြေပြင်မှာ ထိုးစစ်ဆင်ခဲ့ရင်တောင်မှ လက်နက်ကြီးတွေနဲ့ တောက်လျောက် သူတို့ကို ဒုက္ခအများကြီး ပေးနိုင်တယ်ပေါ့နော်။ အမ်းလည်း အဲဒီလိုပုံစံမျိုးပဲ တိုက်ခဲ့တဲ့အခါမှာ ကျနော်တော့ ထင်တယ်ပေါ့နော် အမ်းလောက်တောင် စိန်ခေါ်မှု များလိမ့်မယ်လို့ မထင်ဘူးပေါ့နော်။ အဲဒီလို ပုံစံမျိုးဆိုရင်တော့ အာရက္ခတပ်တော်က ရက္ခိုင်ပြည်မှာ စစ်ကောင်စီ ကင်းစင်နယ်မြေ ဖြစ်ရမယ်ဆိုတဲ့ ကြွေးကြော်ချက်သည် ရာခိုင်နှုန်းပြည့် အောင်မြင်မှု ရနိုင်တယ်ပေါ့နော်။ ကျနော်ထင်တယ် အခုကျန်တဲ့မြို့သည် အမ်းမြို့လောက် ခက်ခဲလိမ့်မည်မဟုတ်လို့ ထင်တယ်ပေါ့နော်။ အမ်းမြို့ထက် အလွယ်တကူ ရရှိ သိမ်းပိုက်နိုင်မယ်လို့ ထင်တယ်ပေါ့နော်” လို့ အာရက္ခတိုင်းမ်စ်ကို ပြောပါတယ်။
လက်ရှိမှာ အာရက္ခတပ်တော်က ချင်းပြည်နယ်၊ ပလက်ဝမြို့အပါအဝင် ရက္ခိုင်ပြည်ရဲ့ မြို့နယ် ၁၃ မြို့နယ်ကို သိမ်းပိုက်ထားနိုင်ပြီဖြစ်သလို ဧရာဝတီတိုင်းနဲ့ ထိစပ်နေတဲ့ ဂွမြို့နယ်ကိုလည်း ထိုးစစ်ဆင် တိုက်ခိုက်နေတာ ဖြစ်ပါတယ်။
တရုတ်ရဲ့ ရေနက်ဆိပ်ကမ်းစီမံကိန်းတွေရှိတဲ့ ကျောက်ဖြူမြို့နယ်၊ ရက္ခိုင်ပြည်ရဲ့ မြို့တော်ဖြစ်တဲ့ စစ်တွေမြို့နယ်နဲ့ သီးခြားအနေနဲ့ ရှိနေတဲ့ မာန်အောင်မြို့နယ်တွေကို အာရက္ခတပ်တော်အနေနဲ့ စစ်မဲ့ဇုန်အနေဖြင့် ထားနိုင်တယ်ဆိုပြီး တချို့ တိုင်းရင်းသားလက်နက်တွေနဲ့ စစ်ရေးနဲ့ နိုင်ငံရေး လေ့လာတဲ့သူတွေက သုံးတပ်တာတွေလည်း ရှိပါတယ်။
နောက်ပြီးတော့ အာရက္ခတပ်တော်က တရုတ်နဲ့ ယှဉ်ပြိုင်နိုင်ဖို့အတွက် အိန္ဒိယနိုင်ငံရဲ့ ကုလားတန်မြစ် ဘက်စုံသုံးစီမံကိန်းရှိတဲ့ စစ်တွေမြို့ကို သိမ်းပိုက်နိုင်တယ်ဆိုပြီးတော့လည်း ထောက်ပြကြပါတယ်။
အာရက္ခတပ်တော်ရဲ့ စစ်ကောင်စီတပ် အလုံးစုံချုပ်ရေး ရည်မှန်းချက်အရဆိုရင် စစ်တွေမြို့ကိုလည်း တိုက်မှာဖြစ်ပြီးတော့ တိုက်ပွဲဖြစ်တာ အနည်းနဲ့ အများပဲ ကွာလိမ့်မယ်ဆိုပြီးတော့ စစ်တွေဒေသခံတစ်ယောက်က ပြောပါတယ်။
“ဒီမြေပြင်မှာပဲ သူတိုက်ကိုယ်တိုက် တိုက်မယ်ဆိုလို့ရှိရင် မခဲယဉ်းဘူးပေါ့နော်။ မောင်တောမှာဆိုရင်လည်း မြေတွေကို တူးပြီးတော့ မြေဖောက်ပြီးတော့မှ ဝင်သွားတယ်လို့ အဲဒီလိုမျိုး ကြားတယ်ပေါ့နော်။ အဲဒီလိုမျိုးဆိုတော့ စစ်တွေမြို့ အတိုင်းအတာက အဲဒီလောက် မခဲယဉ်းလောက်ဘူးလို့ ထင်တယ်။ ဒါပေမယ့် ဗိုလ်ချုပ်ပြောထားတဲ့ စကားတစ်ခုကျတော့ အန်တီကတော့ ယုံကြည်တယ်ပေါ့နော် စစ်တွေလည်း ချန်ထားမှာ မဟုတ်ဘူး။ တိုက်ပွဲကတော့ ပြင်းတာနဲ့ လျော့တာလောက်ပဲ ဖြစ်မယ်လို့တော့ ခန့်မှန်းတာပေါ့နော်။ အာရက္ခတပ်တော်က ဘာပဲဖြစ်ဖြစ် စစ်တွေကို ချန်ထားမယ်လို့ မထင်ဘူး” ဟု အာရက္ခတိုင်းမ်စ်ကို ပြောပါတယ်။
တချို့ နိုင်ငံရေးသမားတွေကတော့ အာရက္ခတပ်တော်အနေနဲ့ ကျန်နေတဲ့ မြို့တွေကို အပြီးတိုင်း မတိုက်ခိုက်ဘူးဆိုရင် သိမ်းပိုက်ပြီးထားတဲ့ မြို့တွေကို စစ်ကောင်စီက လေကြောင်းနဲ့ ဗုံးကြဲတာတွေ၊ လက်နက်ကြီးနဲ့ ပစ်တာတွေကို ဆက်တိုက်လုပ်နေမှာ ဖြစ်တဲ့အတွက် ရက္ခိုင်ရဲ့ မြို့နယ်အားလုံးကို သိမ်းပိုက်ဖို့ လိုတယ်ဆိုပြီး ပြောထားပါတယ်။
ပြီးတော့ တိုက်ပွဲရှောင်တွေ နေရပ်ပြန်နိုင်ဖို့ဆိုရင် ရက္ခိုင်ပြည်အပြင် တခြားတိုင်းနဲ့ ပြည်နယ်တွေမှာလည်း တိုက်ပွဲတွေ ဖော်ပြီး စစ်ကောင်စီတပ် အင်အားလျော့အောင် လုပ်နိုင်ဖို့လည်း လိုတယ်ဆိုပြီး ထောက်ပြထားပါတယ်။
