ရန်ကုန် – ပုသိမ်လမ်းပိုင်းမှာ ၅/ နဲ့ ၁၁/ တွေကို အစစ်အဆေး တင်းကြပ်နေ

အာရက္ခတိုင်းမ်စ် (၇ ဇန်နဝါရီ ၂၀၂၅)

ရန်ကုန် – ပုသိမ် အမြန်လမ်းမမှာ ၁၁/ မှတ်ပုံတင်ကိုင်ထားတဲ့ ရက္ခိုင်ဒေသခံတွေနဲ့  ၅/ မှတ်ပုံတင်ကိုင်ထားတဲ့ စစ်ကိုင်းတိုင်း ဒေသခံတွေကို အစစ်အဆေး တင်းကြပ်နေတယ်လို့ သိရပါတယ်။

အာရက္ခတပ်တော်နဲ့ စစ်ကောင်စီတို့ရဲ့ တိုက်ပွဲဟာ ရက္ခိုင်ပြည်သာမက လက်ရှိမှာ ဧရာဝတီတိုင်းက ငသိုင်းချောင်း၊ သာပေါင်း စတဲ့ မြို့တွေအထိ ကူးစက်လာနေတာကြောင့်လို့ ဒေသခံတွေက ပြောပါတယ်။

၅/နဲ့ ၁၁/ မှတ်ပုံတင်ကိုင်ထားတဲ့ ရက္ခိုင်နဲ့ စစ်ကိုင်းတိုင်းက ဒေသခံတွေကို ပုသိမ် – ရန်ကုန် ကားလက်မှတ်တွေ မရောင်းချကြဖို့ နုတ်မိန့်နဲ့  ညွှန်ကြားထားတဲ့အကြောင်း၊ ကားပေါ်မှာ ၅/ နဲ့ ၁၁/ မှတ်ပုံတင် ကိုင်ထားတဲ့သူတွေကို တင်ဆောင်လာတာ တွေ့ရှိရင် ကားပါ အသိမ်းခံရမှာဖြစ်တယ်ဆိုပြီး လူမှုကွန်ယက်မှာ ပျံ့နှံ့နေတာကို တွေ့ရပါတယ်။

ပုသိမ် – ရန်ကုန် လက်မှတ်တွေကို ၅/ နဲ့ ၁၁/ တွေကို မရောင်းရဘူးလို့ ညွှန်ကြားထားတာ မရှိပေမယ့် စစ်ဆေးရေးဂိတ်တွေမှာ သူတို့ကို ပိုပြီးတော့ စစ်ဆေးတာ တင်းကြပ်တယ်ဆိုပြီး ဧရာဝတီတိုင်း၊ ပုသိမ်မြို့မှာ လက်မှတ်ရောင်းချနေသူတစ်ယောက်က အာရက္ခတိုင်းမ်စ်ကို ပြောပါတယ်။

“ လက်တွေ့မြေပြင်မှာတော့ လက်မှတ်ရောင်းတဲ့အချိန်မှာ နာမည်ပြော၊ မှတ်ပုံတင်နံပါတ်ပြော၊ မှတ်ပုံတင် ကြိုက်တဲ့နံပါတ် ပြောလည်းရတယ်၊ ပြစရာတောင် မလိုဘူး။ အဲဒီလိုမျိုးတွေ ရှိတယ်။ ရောင်းပေးပါတယ်။ မရောင်းရလို့ဆိုပြီးတော့ ညွှန်ကြားချက်တော့ မရှိပါဘူး။ လက်တွေ့သဘောမှာ ပန်တိုင်ဆိုတဲ့ စစ်ဆေးရေးဂိတ်မှာကျရင် စစ်တယ်။ အဲဒီအခါကျမှ ၅/ တို့ ၁၁/ တို့ အဲဒါတို့ကိုသာ ပိုပြီးတော့ တင်းကြပ်တဲ့ စစ်ဆေးမှုလုပ်တာ ဖြစ်ပါတယ်။ မရောင်းရဆိုတာတော့ မရှိပါဘူး” လို့ ပြောပါတယ်။

အာရက္ခတပ်တော်နဲ့ ပူးပေါင်းတပ်တို့ ထိုးစစ်ဆင်နေတဲ့ သာပေါင်းမြို့ဟာ ဧရာဝတီတိုင်း၊ ပုသိမ်ခရိုင်အတွင်းမှာ ရှိပြီးတော့ သာပေါင်းမြို့ထဲကို အာရက္ခတပ်တော်တွေ ဝင်ရောက်နိုင်ရင် ပုသိမ်မြို့ကို စစ်ရေးအရ ခြိမ်းခြောက်လာနိုင်မှာ ဖြစ်တယ်လို့ နိုင်ငံရေးနဲ့ စစ်ရေး လေ့လာတဲ့သူတွေက သုံးသပ်နေကြပါတယ်။

လက်ရှိမှာ ပုသိမ် – ရန်ကုန်ကို ပြေးဆွဲနေတဲ့ ခရီးသည်တင် ယာဉ်လိုင်းတွေအနေနဲ့ ပုံမှန်အတိုင်း ပြေးဆွဲနေတယ်လို့ ပုသိမ်ဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“ ပုံမှန်အတိုင်းပဲ သွားနေတယ်။ ဒီမှာ လိုင်းပေါင်း အများကြီးရှိတယ်။ စုပေါင်း Taxi တွေလည်း ရှိတယ်။ မိုက်ခရို Bus တွေလည်း ရှိတယ်။ မီနီ Bus တွေလည်း ရှိတယ်။ Express တွေလည်း ရှိတယ်။ မျိုးစုံပဲ သွားနေကြပါတယ်။ လမ်းခရီးမှာ ပန်တိုင်ဆိုတဲ့ စစ်ဆေးရေးဂိတ် ရန်ကုန်တိုင်းနဲ့ ဧရာဝတီတိုင်းအစပ် အဲဒီမှာပဲ စစ်ပါတယ်။ နောက်တစ်ခါ အဲဒါနဲ့ မလှမ်းမကမ်းမှာ X. Ray ဂိတ်ဆိုတာ ရှိတယ်။ ၂ ဂိတ် ရှိတာပေါ့။ အဲဒီ X. Ray ဂိတ်မှာတော့ တပ်စစ်ကြောင်းက စစ်တာမျိုးတွေတော့ ရှိတယ်” လို့ ပြောပါတယ်။

အာရက္ခတပ်တော်နဲ့ စစ်ကောင်စီတပ်တို့ရဲ့ တိုက်ပွဲတွေကြောင့် ၁၁/ မှတ်ပုံတင်ကိုင်ထားတဲ့ ရက္ခိုင်ဒေသခံတော်တော်များများက ရန်ကုန်မြို့မှာ စစ်ဆေးခံကြရတာတွေ၊ ဖမ်းဆီးခံရတာတွေနဲ့ လေယာဉ်နဲ့ ကားလက်မှတ် ဝယ်တဲ့အခါမှာလည်း အလွယ်တကူ ဝယ်လို့မရတာတွေလည်း ဖြစ်နေကြပါတယ်။