စစ်တွေမှာ မူးယစ်ဆေးဝါးရောင်းချသူတွေကို စစ်ကောင်စီ လိုက်လံဖမ်းဆီးနေ

အာရက္ခတိုင်းမ်စ် (၂၃ ဇူလိုင် ၂၀၂၅)

ရက္ခိုင်ပြည် စစ်တွေမြို့မှာ မူးယစ်ဆေးဝါးရောင်းချသူတွေကို စစ်ကောင်စီက လိုက်လံဖမ်းဆီးနေကြောင်း ဒေသခံတွေထံကနေ သိရပါတယ်။

အဲဒီလို ဖမ်းဆီးတဲ့အခါမှာတော့ နာမည်အတိအကျဖြစ်ပြီး ဧည့်စာရင်းစစ်သလိုပုံစံနဲ့ လိုက်လံစုံစမ်းကာ ဖမ်းဆီးနေခြင်းဖြစ်ကြောင်း စစ်တွေဒေသခံတစ်ဦးက အာရက္ခတိုင်းမ်စ်ကို ပြောပါတယ်။

“ညပိုင်းကျရင် ဧည့်စာရင်းစစ်ရင်းနဲ့ မူးယစ်ဆေးဝါးရောင်းစားတဲ့သူတွေ အိမ်ကိုအတိအကျသိရင် အဲဒီသူတွေကို ဖမ်းသွားတယ်။ ရောင်းတဲ့သူတွေနော် သုံးတဲ့သူတွေမဟုတ်ဘူး။ ပြီးရင် အောက်ခြေက ရောင်းတဲ့သူတွေ ဖမ်းပြီးရင် တဆင့် တဆင့် တဆင့်ပေါ့ လက်ဝယ်လက္ကား အကုန်စုံစမ်းပြီးတော့ လိုက်ဖမ်းနေတယ်။ အဲဒီလိုလာဖမ်းရင် ရဲရယ်၊ ရပ်ကွက်အုပ်ချုပ်ရေးမှူးနဲ့ဆိုင်တဲ့ ရပ်ကွက်က လူကြီးတစ်ယောက်လည်းပါတယ်။ နာမည် by name နဲ့လာတဲ့သဘော ဟုတ်တယ်” လို့ သူက ပြောပါတယ်။

လက်ရှိဖမ်းဆီးနေသူတွေထဲမှာတော့ သုံးစွဲသူတွေကို ဖမ်းဆီးတာမျိုးမကြားရသေးဘဲ ရောင်းချသူတွေကို အဓိက ဖမ်းဆီးနေတာဖြစ်ကြောင်းလည်း သိရပါတယ်။

သုံးစွဲကြတဲ့ မူးယစ်ဆေးဝါးတွေကတော့ WY ဆေးပြားအပါအဝင် အခြားမူးယစ်ဆေးဝါးတွေဖြစ်ကြပြီး ရက္ခိုင်ပြည်ကို ဖြတ်သန်းကာ အခြားနိုင်ငံတွေအထိ ပို့ဆောင်နေတာမျိုးတွေလည်း ဆက်လက်ရှိနေဆဲပဲ ဖြစ်ပါတယ်။

လက်ရှိ မူးယစ်ဆေးစွဲနေကြသူတွေထဲမှာ လူလတ်ပိုင်းတွေသာမက ကျောင်းနေအရွယ် လူငယ်များလည်း ပါဝင်နေကြကြောင်းသိရသည်။

ရက္ခိင်ပြည်အတွင်း တိုက်ပွဲများကြောင့် အလုပ်အကိုင်ရှားပါးကာ အလုပ်လက်မဲ့နှုန်းများပြားလာခြင်း၊ ကျောင်းနေအရွယ် လူငယ်များမှာ ကျောင်းမတက်ရဘဲ ကျောင်းရပ်နားထားရတဲ့အတွက် ရုပ်ပိုင်းနဲ့ စိတ်ပိုင်းဆိုင်ရာတွေ ကျဆင်းကာ စိတ်ထွက်ပေါက် တစ်ခုအနေနဲ့ မူးယစ်ဆေးဝါးကို သုံးစွဲမှုများပြားလာနေတာ ဖြစ်ပါတယ်။