အာရက္ခတိုင်းမ်စ် (၁၃ စက်တင်ဘာ ၂၀၂၅)
အာရက္ခတပ်တော်နဲ့ စစ်ကော်မရှင်တို့ရဲ့ တကျော့ပြန်တိုက်ပွဲ ပြန်ဖြစ်တဲ့ ၂၀၂၃ ခုနှစ် နိုဝင်ဘာလကနေ ၂၀၂၅ ခုနှစ် ဩဂုတ်လအထိ စစ်ကော်မရှင်ရဲ့ တိုက်ခိုက်မှုကြောင့် အသက် ၁၈ နှစ်အောက် ကလေးစုစုပေါင်း ၁၈၄ ယောက် သေဆုံးပြီး ၄၇၄ ယောက် ဒဏ်ရာရခဲ့ကြတာ ဖြစ်ပါတယ်။
အဲဒီထဲကမှ လေကြောင်း တိုက်ခိုက်တာတွေကြောင့် ၁၀၂ ယောက် သေဆုံးပြီး ၂၁၃ယောက် ဒဏ်ရာရခဲ့တာ ဖြစ်ပါတယ်။
အဲဒါအပြင် လေကြောင်းတိုက်ခိုက်တာကြောင့် စာသင်ကျောင်းပေါင်း (၃၇) ကျောင်း၊ လက်နက်ကြီးနဲ့ ပစ်ခတ်တာကြောင့် စာသင်ကျောင်း (၁၀) ကျောင်း စုစုပေါင်း စာသင်ကျောင်း (၄၇) ကျောင်း ဖျက်ဆီးခံခဲ့ရပါတယ်။
ပြီးခဲ့တဲ့ စက်တင်ဘာလ ၁၂ ရက်နေ့ကလည်း စစ်ကော်မရှင်က ကျောက်တော်မြို့နယ်၊ သရက်တပင်ကျေးရွာကို လေကြောင်းကနေ ပေါင် ၅၀၀ ဗုံး၂ လုံး ကြဲချခဲ့တာကြောင့် ကျောင်းသူ/သားတွေ အပါအဝင် အရပ်သားပြည်သူများ အစုလိုက်အပြုံလိုက် သေဆုံး၊ ဒဏ်ရာ ရရှိခဲ့ကြပါတယ်။
လက်ရှိအချိန်အထိ သေဆုံးသူ ၂၀ ယောက်ရှိလာပြီး အဲဒီထဲမှာ အသက် ၁၈ နှစ်အောက် ကျောင်းသားလူငယ် ၁၈ ယောက် ပါဝင်ပါတယ်။
ဒဏ်ရာရသူထဲမှာလည်း အသက် ၁ နှစ်အောက် ကလေးငယ် ၁ ယောက်နဲ့ ဒဏ်ရာ ပြင်းထန်တဲ့သူ ၅ ယောက်အပါအဝင် ၂၁ ယောက် ရှိတယ်လို့ သိရပါတယ်။
အခုလို ကျောင်းသားလူငယ်နဲ့ ကလေးသူငယ်တွေကို အစုလိုက်အပြုံလိုက် သေစေတဲ့ စစ်ကော်မရှင်တပ်ရဲ့ အလွန်ပြင်းထန်တဲ့ ရာဇဝတ်မှုတွေကို အပြည်ပြည်ဆိုင်ရာ အဖွဲ့အစည်းတွေက အမြန်ဆုံး တားဆီးဖို့နဲ့ အရပ်သားပြည်သူတွေရဲ့အသက်အိုးအိမ်တွေကို ကာကွယ်နိုင်ဖို့ အရေးတကြီး ဆောင်ရွက်ဖို့ လိုတယ်လို့ တိုက်တွန်းထားကြပါတယ်။
22 comments