ပင်လယ်ပြင်မှာမိတဲ့ မူးယစ်နဲ့ပတ်သက်တာမှန်သမျှ AA ပါဝင်နေတယ်လို့ ဇော်မင်းထွန်း ထပ်မံစွပ်စွဲပြန်

အာရက္ခတိုင်းမ်စ် (၂၅ ဇန်နဝါရီ ၂၀၂၆)

ပင်လယ်ပြင်မှာမိတဲ့ မူးယစ်နဲ့ပတ်သက်တဲ့ လုပ်ငန်းမှန်သမျှ AA ပါဝင်ပတ်သက်နေတယ်လို့ စကော်မရှင်ရဲ့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ထပ်မံ စွပ်စွဲပြောဆိုထားပါတယ်။

ဒီပြောဆိုမှုကိုတော့ ဇန်နဝါရီလ ၂၄ ရက်၊ မနက်ပိုင်းမှာ မန္တလေးတိုင်း၊ ပြင်ဦးလွင်မြို့ အနီးစခန်းလေဆိပ်မှာပြုလုပ်တဲ့ မူးယစ်ဆေးဝါးများနဲ့ မူးယစ်ဆေးဝါးချက်လုပ်ရာတွင် အသုံးပြုတဲ့ပစ္စည်းများ ပမာဏအများဆုံး သိမ်းဆည်းရမိမှုနဲ့ ပတ်သက်တဲ့ ဒုတိယအကြိမ် သတင်းစာရှင်းလင်းပွဲမှာ ပြောဆိုခဲ့တာပဲ ဖြစ်ပါတယ်။

“ဒီမူးယစ်ဆေးဝါးတွေဟာ ကမ္ဘာရဲ့ အန္တရာယ်တွေ ဖြစ်တယ်။ ကမ္ဘာတဝန်းလုံးကို တချို့နေရာတွေမှာ၊ AA ဆိုရင် မူးယစ်ဆေးဝါးကို အဆင့်ဆင့်ကနေ ဆွဲထုတ်တယ်။ ပင်လယ်ရေကြောင်းကနေ သူတို့ တာဝန်ခံပြီး ပို့တယ်။ ပင်လယ်ပြင်မှာ မိလိုက်တဲ့ လုပ်ငန်းတွေမှန်သမျှမှာ AA ပါဝင်ပတ်သက်တာချည်းပဲ။ AA ပါဝင်ပတ်သက်တယ်ဆိုတာမှာ သွယ်ဝိုက်ပြီး ပါဝင်တာမဟုတ်ဘူး။ တိုက်ရိုက်ကို ပါဝင်ပတ်သက်တာ။ AA ကနေ ဗိုလ်မှူးကြီး အဆင့်ရှိတဲ့ ဘယ်သူ့ကိုဦးဆောင်ပြီး လုပ်ခိုင်းတယ်တို့၊ တပ်သားအဆင့်ရှိတဲ့ ဘယ်သူတို့ မျိုးစုံပါဝင်ပတ်သက်နေတာ ဖြစ်တယ်။ ဒါ့အပြင် ထိုင်းနိုင်ငံမှာလည်း မူးယစ်ဆေးဝါးတွေ မိတယ်။ ထိုင်းကလည်း ကျွန်တော်တို့ကို ပြော တယ်။ မြန်မာနိုင်ငံထဲက ထွက်လာတဲ့ဟာလို့ ပြောတယ်။ လာအိုကလည်း ဒီလိုပဲ ပြောတယ်။ သူက ဆီလို အပေါက်ရှာပြီး ထွက်နေတာဖြစ်တယ်။ အဲဒါကြောင့် နိုင်ငံတကာရဲ့ ပူးပေါင်းဆောင်ရွက်မှုအားလည်း လိုပါတယ်။ ဒီပစ္စည်းတွေက မြန်မာနိုင်ငံမှာ မရနိုင်ဘူး။ သို့သော် ဘယ်လိုလုပ်ရောက်လာလဲ။ ဘယ်လိုလုပ်ရောက်လာလဲဆိုရင် နောက်ကွယ်ကနေ တော်တော်ကို အင်အားတောင့်တင်းတဲ့၊ အကာအကွယ်ပေးနိုင်တဲ့၊ လက်နက်မရှိဘဲနဲ့ ရောက်လာစရာ အကြောင်းမရှိဘူး။ ဒီဟာတွေသည် ဒီကနေပြီး ရောက်လာတာ ဖြစ်တယ်။ အဲဒီတော့ ပြန်ပြီး စဉ်းစားကြည့်။ ဒီလူတွေက ချက်လုပ်တဲ့လူတွေဆီကနေပြီး ဘာယူမလဲ။ ငွေယူမယ်လို့ ပြောရအောင် ဒီလူတွေမှာ တောထဲ တောင်ထဲမှာရှိနေတဲ့ လာချက်နေတဲ့သူတွေက ငွေဘယ်လိုလွှဲမလဲ။ ရှင်းရှင်းလေးရယ်။ ကုန်ကြမ်းပေးပြီးတော့ ကုန်ချောယူမှာ ဒီကောင်တွေ၊ ဒါပဲ။ ဒီလုပ်ငန်းပဲ။ အဲဒီတော့ ကုန်ချောတွေ ဘယ်လိုထွက်သွားတယ်ဆိုတာ အပိုင်းလိုက် ခွဲထားတာပဲ ဖြစ်ရမယ်။ ဒီချက်လုပ်တဲ့လူတွေနဲ့ လုပ်အားခံစားခွင့်ရှိသူတွေက တမျိုး၊ ကုန်ချောယူသွားတဲ့ လူတွေရဲ့ ပို့ဆောင်ပေးပုံက တမျိုး၊ ပြီးရင် အဆက်အသွယ်တွေနဲ့ လုပ်တဲ့ပုံက တမျိုး၊ အဆင့်ဆင့် အလွှာလွှာရှိနေတဲ့ ဟာမျိုး ဖြစ်တယ်လို့ပဲ ကျွန်တော်တော့ မြင်ပါတယ်” လို့ ဗိုလ်ချုပ် ဗိုလ်ချုပ်ဇော်မင်းထွန်းက စွပ်စွဲပြောဆိုခဲ့တာ ဖြစ်ပါတယ်။

ဒါ့အပြင် အာရက္ခတပ်တော် AA ရဲ့ ရက္ခိုင်ပြည်နဲ့ မလေးရှားနိုင််ငံကို ပိုဆောင်မယ့် ငွေကျပ် ၁၉၅ ဘီလီယံကျော်တန်ဖိုးရှိ မူးယစ်ဆေးဝါးတွေကို ရန်ကုန်မြို့မှာ ဖမ်းဆီးရမိခဲ့တယ်လို့ ပြီးခဲ့တဲ့ ၂၀၂၅ ခုနှစ်၊ အောက်တိုဘာလ ၇ ရက်မှာ စစ်ကော်မရှင်က ထုတ်ပြန်ပြီး စွပ်စွဲခဲ့သလို စက်တင်ဘာလ ၁၂ ရက်မှာလည်း ရန်ကုန်မှာ ဖမ်းဆီးရမိတဲ့ မလေးရှားနိုင်ငံကို ပို့ဆောင်မယ့် ကာလတန်ဖိုးငွေကျပ် ၁၇၀ ဒသမ ၄၉ ဘီလီယံခန့် တန်ဖိုးရှိ မူးယစ်ဆေးဝါးတွေနဲ့ ပတ်သက်ပြီး စစ်ကော်မရှင်က အာရက္ခတပ်တော် AA ကို စွပ်စွဲထားပါသေးတယ်။

AA ဟာ မူးယစ်ဆေးဝါး ရောင်းဝယ်တာတွေကို ပြုလုပ်ပြီး အဲဒီကနေရတဲ့ ငွေတွေနဲ့ လက်နက်၊ ခဲယမ်းတွေ ဝယ်ယူပြီး ရက္ခိုင်ပြည်အတွင်း အကြမ်းဖက်လုပ်ငန်းတွေ လုပ်ဆောင်တာ၊ လက်နက်အားကိုးနဲ့ အပြစ်မဲ့ ပြည်သူတွေအပေါ် အနိုင်ကျင့် နှိပ်စက်သတ်ဖြတ်တာတွေကို လုပ်ဆောင်လျက် ရှိနေတယ်လို့လည်း စစ်ကော်မရှင်က စွပ်စွဲပြောဆိုခဲ့ပါတယ်။

မူးယစ်ဆေးနဲ့ ပတ်သက်ပြီး AA ကို စွပ်စွဲတာဟာ စစ်ကော်မရှင်ရဲ့ မရိုးနိုင်တဲ့ ဗျူဟာလို့ AA ရဲ့ ပြောခွင့်ရပုဂ္ဂိုလ် ဦးခိုင်သုခ က တုန့်ပြန်ပြောဆိုထားပြီး အာရက္ခတပ်တော်အနေနဲ့ မူးယစ်ဆေးဝါး တိုက်ဖျက်ရေးအတွက် ဘယ်အစိုးရ၊ ဘယ်နိုင်ငံတကာ အဖွဲအစည်းနဲ့မဆို ပူးပေါင်းဆောင်ရွက်သွားဖို့ အဆင်သင့်ရှိတယ်လို့လည်း ပြောဆိုထားပါတယ်။