စစ်တွေမှာ ဆန်ကြမ်းရှားနေ၊ ‌ဒေသခံအနေနဲ့ စစ်ဘေးရှောင်လို ရင်ဆိုင်နေရ

အာရက္ခတိုင်းမ်စ် (၁၆ ဇန်နဝါရီ  ၂၀၂၅)

လက်ရှိအကြပ်အတည်းကာလအတွင်း စစ်တွေမြို့မှာ ဒေသခံလူထု အားလုံးနီးပါး ဝယ်ယူစားသောက်နိုင်တဲ့ ဆန်ကြမ်းတွေဟာ ရှားပါးနေတာကြောင့် အခက်အခဲဖြစ်နေကြတယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။

ဆန်ကြမ်းတွေဟာ ဝယ်ယူလို့ရပေမယ့် အနံ့နံတဲ့ ဆန်ကြမ်းအမျိုးအစားတွေသာဖြစ်ပြီး ဝယ်စားတဲ့သူမရှိတဲ့ ဆန်အကောင်းစားတွေကတော့ ပေါများတယ်လို့ စစ်တွေဒေသခံတစ်ဦးက ပြောပါတယ်။

“စစ်တွေမြို့ပေါ်မှာ လက်ရှိအခြေအနေက ဆန်အကောင်းဆုံး ဖျာပုံပေါ်ဆန်းမွှေးတို့ ပုသိမ်ပေါ်ဆန်းမွှေးတို့ အဲဒီဆန်တွေက ဝယ်စားမယ့်သူမရှိတော့ ပေါတယ်။ အဲဒီဆန်တွေက တစ်အိတ်ကို နှစ်သိန်းနဲ့ခြောက်သောင်း (၂၆၀၀၀၀)။ ဒါပေမယ့် အပေါစားဆန်ပေါ့ အများစု စားနိုင်တဲ့ဆန်က တစ်သိန်းကျော်ပေါ့နော် အဲဒါတွေက ရှာလို့မရဘူးဆိုတာ။ ရတော့ရတယ်။ ဒါပေမယ့် အနံ့နံတဲ့ ဆန်တွေပဲရှိတယ်။ ကောင်းတဲ့ဆန်မရှိဘူး အဲဒီဆန်တွေရှားနေတယ်။ ဈေးကတော့ အဲဒီလောက်မကြီးဘူး တစ်သိန်းကျော်ပတ်ဝန်းကျင်” လို့ ပြောပါတယ်။

ဒ့ါအပြင် ရက္ခိုင်မှာ တိုက်ပွဲဖြစ်ပွားကတည်းက အခြားနေရာဒေသတွေကို ထွက်ပြေးမတိမ်းရှောင်နိုင်တဲ့ စစ်တွေမြို့ခံတွေထဲမှာ အမျိုးသမီးတွေဟာ စစ်ဘေးရှောင်တွေနည်းတူ အခက်အခဲနဲ့ ရင်ဆိုင်နေရတယ်လို့လည်း သိရပါတယ်။

ကလေးမိဘတွေအနေနဲ့လည်း စားဝတ်နေရေးအတွက် ရုန်းကန်နေရတာကြောင့် ကလေးအချင်းချင်းကပဲ ပြန်လည်ထိန်းကျောင်းပေးနေရတယ်လို့ သိရပါတယ်။

လက်ရှိမှာ စစ်တွေမြို့အပါအဝင် မြို့ ၃ မြို့ပဲ ကျန်တာကြောင့် စစ်ကောင်စီဘက်က လေကြောင်းနဲ့ ဗုံးကြဲမယ့်အခြေအနေနဲ့ ပစ်ခတ်မှုတို့ကို စိုးရိမ်ကြောက်လန့်စွာ နေထိုင်နေရတယ်လို့ စစ်တွေဒေသခံတစ်ဦးက ပြောပါတယ်။

“လူတွေ နေရထိုင်ရတာ ကြောက်လန့်မှုတွေနဲ့ နေရတာပေါ့။ ကျောက်တော်ဖြစ်သွားတာမှာ ဆိုးဆိုးဝါးဝါး ဖြစ်သွားတယ်။ ဘာလို့တွေးပူတာလဲဆိုတော့ အနီးအနားမှာ ဖြစ်သွားခဲ့တယ်ဆိုရင် ကိုယ်တွေ လွတ်မယ့်နေရာကို ပြားပြားဝပ်ရင်လည်း ဝပ်ရမယ်လေ။ ထွက်တော့ ပြေးလို့မရတော့ဘူး ပြားပြားဝပ်လို့ပဲ ရတော့မယ်။ ဖြစ်တဲ့ အသံကြားရင် ကလေးတွေဆိုလည်း မထွက်နဲ့ အဲဒီလိုတော့ ပြောရတာပေါ့။ ဖြစ်သွားခဲ့ရင် ကိုယ့်ဘာသာကိုယ်ပဲ ကာကွယ်ရမှာ။ ပစ်ရင်က ရှောင်ဖို့က လွယ်သလို လေယာဉ်ပျံနဲ့ ချလာရင် ဘယ်နားချမယ်မှန်း မသိတော့ ပြေးဖို့မလွယ်ဘူးလေ။ ရှောင်ဖို့လည်း မလွယ်ဘူးလေ” လို့ အာရက္ခတိုင်းမ်စ်ကို ပြောပါတယ်။

စစ်ကောင်စီဟာ အခုရက်ပိုင်းမှာ ရက္ခိုင်ပြည်ကို လေကြောင်းနဲ့ ဗုံးကြဲမှုတွေ ပိုမိုပြုလုပ်လာနေပါတယ်။

ဇန်နဝါရီလ ၁၁ရက် မနက်ပိုင်းက ရက္ခိုင်ပြည် ကျောက်တော်မြို့နယ်ကို စစ်ကောင်စီက လေကြောင်းအသုံးပြုပြီး ‌ဗုံးကြဲတိုက်ခိုက်ခဲ့တယ်လို့ အာရက္ခတပ်တော်ရဲ့ သတင်းနဲ့ ပြန်ကြားရေးက သတင်းထုတ်ပြန်ထားပါတယ်။

၃ကြိမ်အတွင်း ဗုံးအရေအတွက် ၁၅လုံးခန့် ကြဲချခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

အဲ့ဒီဗုံးကြဲတိုက်ခိုက်မှုအတွင်းမှာ အပြစ်မဲ့ ဈေးရောင်း၊ ဈေးဝယ်၊ လမ်းသွားလမ်းလာအရပ်သားပြည်သူတချို့ သေဆုံးသလို ဒဏ်ရာရရှိမှုတွေလည်း ရှိခဲ့ပြီး ဈေးဆိုင်တန်း၊ နေအိမ်အဆောက်အအုံတွေ ထိခိုက်ပျက်စီးမှုလည်း ရှိခဲ့တယ်လို့ သိရပါတယ်၊

ဒါ့အပြင် ရမ်းဗြဲမြို့နယ် ကျောက်နီမော်ကို စစ်ကောင်စီက ဇန်နဝါရီလ ၈ ရက်မှာ လေယာဉ်ဖြင့်ဗုံးလာကြဲသဖြင့် အရပ်သားပြည်သူ ၄၀ ခန့် သေဆုံးခဲ့ပြီး ၂၀ ခန့် ထိခိုက်ဒဏ်ရာရရှိခဲ့တယ်လို့သိရပါတယ်။