‎ရေကြည် အမြောက်တပ် ၃၄၄အနီး တိုက်ပွဲပြင်းထန်နေ

အာရက္ခတိုင်းမ်စ် (၂၄ ‎ဖေဖော်ဝါရီ ၂၀၂၆)

‎‎ဧရာဝတီတိုင်း ရေကြည်မြို့နယ် ဂွ- ငသိုင်းချောင်းလမ်း မြောက်စမ်းရွာအနီးရှိ အမြောက်တပ် အမတ ၃၄၄ အနီး အာရက္ခတပ်တော် ပူးပေါင်းမဟာမိတ်တပ်နဲ့ စစ်ကော်မရှင်တို့ တိုက်ပွဲပြင်းထန်နေတယ်လို့ သိရပါတယ်။

အဆိုပါ အမြောက်တပ် အမတ ၃၄၄ ကို အာရက္ခတပ်တော်နဲ့ ပူးပေါင်းမဟာမိတ်တပ်တွေဟာ ဖေဖော်ဝါရီလ ၁၈ ရက်ကစတင်ကာ ပြန်လည်ထိုးစစ်ဆင် တိုက်ခိုက်နေတယ်လို့လည်း သိရပါတယ်။

‎အမြောက်တပ် အမတ ၃၄၄ ကို ကျုံပျော် ခလရ ၃၆ က အင်အားတချို့ စစ်ကူပို့ထားပြီး ဒဏ်ရာရရှိသူများကို စစ်ကော်မရှင်က ကားနဲ့ သယ်ထုတ်ပေးနေတယ်လို့လည်း သိရပါတယ်။

ရှေ့တန်းစစ်မြေပြင်ကို ပို့ဆောင်ခံထားရတဲ့ စစ်ကော်မရှင်ရဲ့ စစ်မှုထမ်းတပ်သားတွေဟာ စစ်ရေးအတွေ့အကြုံ မရှိတဲ့အတွက် ထွက်ပြေးတာတွေလည်း ဆက်တိုက်ရှိနေတယ်လို့ သိရပါတယ်။

‎အမြောက်တပ် အမတ ၃၄၄ နဲ့ နယ်မြေဆက်စပ်နေတဲ့ လေးမျက်နှာမြို့နယ်အတွင်းရှိ စက်စက်ယို၊ ချင်းလယ် စတဲ့ကျေးရွာတွေကလည်း ပစ်ခတ်သံတွေ ကြားနေရတယ်လို့ ဒေသခံတွေက ဆိုပါတယ်။

‎သီတာကုန်းပြင်ရှိ တော်လှန်ရေးတပ်များရဲ့ ခြေကုတ်စခန်းတခုကို ဝင်ရောက်တိုက်ခိုက်ခဲ့တဲ့ စစ်ကော်မရှင်စစ်ကြောင်းဟာ တိုက်စစ်အသွင်ဆောင်တဲ့ ခံစစ်အနေအထား ပြန်လည်ရောက်ရှိနေတယ်လို့လည်း CDM ဗိုလ်ကြီးဇင်ယော်က သုံးသပ်ထားပါတယ်။