အမတ ၃၄၄ တိုက်ပွဲ တွင် AA စနိုက်ဘာ ထိမှန်လို့ စကမ ဗိုလ်မှူး ၁ ယောက် သေဆုံး

by Rakhita Timesမေ 19, 2026မေ 19, 202625 185

အာရက္ခတိုင်းမ်စ် (၁၉ မေ ၂၀၂၆)

ဧရာဝတီတိုင်း ရေကြည်မြို့နယ် ငါးသိုင်းချောင်းမြို့ မြောက်စမ်းရွာရှိ အမြောက်တပ် (အမတ ၃၄၄) တပ်ရင်းကို အာရက္ခတပ်တော်နဲ့ ပူးပေါင်းမဟာမိတ်တပ်တို့ ထိုးစစ်ဆင်နေပြီး အဆိုပါ တိုက်ပွဲအတွင်း ထိခိုက် ဒဏ်ရာရရှိခဲ့သူ စစ်ကော်မရှင်ရဲ့ ဗိုလ်မှူး ၁ ဦး သေဆုံးခဲ့တယ်လို့ သိရပါတယ်။

“ ဧရာဝတီစစ်မြေပြင် အမတ ၃၄၄ မှာ စနိုက်ဘာကျည်ထိလို့ ပုသိမ်မှာ ဆေးကုနေရင်း သေဆုံးသွားတယ်” လို့ ပုသိမ်မြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။

စနိုက်ဘာထိမှန်လို့ သေဆုံးသွားသူဟာ စစ်ကော်မရှင်ရဲ့ ခလရ (၃၆) ဒုတပ်ရင်းမှူး ဗိုလ်မှူး ဟိန်းဇော်အောင် ဖြစ်တယ်လို့ သိရပါတယ်။

ဗိုလ်မှူး ဟိန်းဇော်အောင်ဟာ ပုသိမ်မြို့ရှိ အနောက်တောင်တိုင်းစစ်ဌာနချုပ် (နတခ)၊ ကုတင် (၃၀၀) ဆေးရုံ (မဆရ-၄) တွင် ဆေးဝါးကုသမှု ခံယူနေရင်း ဒီကနေ့ မေလ (၁၉) ရက်မှာ သေဆုံးခဲ့တာလည်း ဖြစ်ပါတယ်။

“ နေချင်းကို သင်္ဂြိုလ်လိုက်တာ၊ ရွှေမြင်တင်မှာလေ။ ယာဉ်အစီးရေ ၂၄ စီးနဲ့ လာပြီး မီးသင်္ဂြိုလ်သွားတယ်” လို့ သူက ဆက်ပြောပါတယ်။

တိုက်ပွဲဖြစ်ပွားနေတဲ့ မြောက်စမ်းရွာရှိ အမြောက်တပ် (အမတ ၃၄၄) တပ်ရင်းကို အာရက္ခတပ်တော်နဲ့ ပူးပေါင်းမဟာမိတ်တပ်က ယာယီသိမ်းပိုက်နိုင်ခဲ့ပြီး လေကြောင်းရန်ကြောင့် ပြန်လည် ဆုတ်ခွာခဲ့တယ်လို့လည်း သိရပါတယ်။

အမြောက်တပ် (အမတ ၃၄၄) တပ်ရင်းရဲ့အောက်မှာတော့ ဧရာဝတီတိုင်း ဖျာပုံမြို့အခြေစိုက် ခြေလျင်တပ်ရင်း (ခလရ – ၉၈)၊ ဓနုဖြူအခြေစိုက် ခြေလျင်တပ်ရင်း (ခလရ – ၁၀၈) နဲ့ တပ်မ ၆၆ လက်အောက်ခံ (ခလရ ၁၄) တပ်ရင်း တို့ရှိနေတာလည်း ဖြစ်ပါတယ်။