အာရက္ခပြည်နှင့် သတိထားရမည့် အပစ်အခတ်ရပ်စဲရေး

အမျိုးသားတော်လှန်ရေးနှင့် ပြည်သူလူထု၏ လွတ်မြာက်လိုသော မျှော်လင့်ချက်များ

ဒီမိုကရက်တစ်မဟာမိတ်တပ်မတော် (MNDAA) ၏ စစ်သည်တော်များ လားရှိုးမြို့ထဲသို့ ဝင်ရောက်လာကြသည်ကို မြို့ခံလူထုက သောင်းသောင်းဖြဖြ ကြိုဆိုကြသော ဗွီဒီယိုဖိုင်တခုအား လားရှိုးမြို့သိမ်းတိုက်ပွဲအပြီးတွင် ကြည့်ရှုခဲ့ရဖူးသည်။ ထို့အတူ တအောင်းပလောင်အမျိုးသားလွတ်မြောက်ရေးတပ်မတော် (TNLA) မှ မိုးကုတ်မြို့ကို သိမ်းပိုက်ခဲ့စဉ်ကလည်း ထိုကဲ့သို့ ဗွီဒီယိုဖိုင်တခုကို ကြည့်ရှုခဲ့ရဖူးသေးသည်။ အမျိုးသမီးများ၊ ကလေးငယ်များနှင့် သက်ကြီးရွယ်အိုများ ပါဝင်သော မြို့ခံလူတို့သည် မျိုးချစ်စစ်သည်တော်များကို ပန်းစည်းများဖြင့်လည်းကောင်း၊ လက်များကို မွှေ့ရမ်းကာ အောင်ပွဲခံ အော်ဟစ်၍လည်းကောင်း ကြိုဆိုနေကြသည်ကို ဗွီဒီယိုဖိုင်ထဲတွင် မြင်တွေ့ရသည်။ အချို့အမျိုးသမီးများ၏ ရယ်မောပျော်ရွှင်နေသော မျက်ဝန်းများထဲတွင် မျက်ရည်များ စို့နေသည်ကိုပင် မြင်တွေ့ရ၏။ ထိုမျက်ရည်များမှာ ဝမ်းသာလွန်း၍ ကျသော မျက်ရည်များ ဖြစ်ကြောင်းကိုတော့ အထူးပြောစရာပင် လိုအပ်တော့မည် မဟုတ်ပေ။

စင်စစ် MNDAA နှင့် TNLA စစ်သည်တော်များကို ကြိုဆိုခဲ့ကြသည့် ပြည်သူလူထုသည် အာဏာရှင်စစ်တပ် ပြုလုပ်လေ့ရှိသော စစ်တပ်ထောက်ခံပွဲကို နေ့စားကြေး ၅၀၀၀ သို့မဟုတ် ၁၀၀၀၀ ကျပ် ရယူကာ ရောက်လာကြသူများ မဟုတ်ချေ။ သူတို့သည် အာဏာသိမ်းစစ်တပ် ဆုတ်ခွာထွက်ပြေးပြီးစ အချိန်တွင်ပင် အန္တရာယ်များကြားထဲမှ သိသိလျှက်နှင့် မိမိဆန္ဒအလျှောက် လမ်းပေါ်သို့ ထွက်လာခဲ့ကြသူများပင် ဖြစ်သည်။ ဤဗွီဒီယိုဖိုင်ထဲမှ မြင်ကွင်းများသည် တော်လှန်ရေးအပေါ်တွင် ပြည်သူလူထုက မည်မျှအထိ မျှော်လင့်ထားကြောင်းကို ပြသလိုက်သာ ပြယုဂ်တခုပင် ဖြစ်ပေသည်။

ဆူညံလာသော တကျော့ပြန် အပစ်အခတ်ရပ်စဲရေးအသံ

ဤရက်ပိုင်းများအတွင်းတွင် အာရက္ခတပ်တော် (AA) နှင့် အပစ်အခတ်ရပ်စဲရေးအတွက် ကြားဝင်စေ့စပ်ပေးရန် တရုတ်အစိုးရကို စစ်ကော်မရှင်မှ နားပူနားဆာ တိုက်နေကြောင်း သတင်းတခု ထွက်ပေါ်လာသည်။ တရုတ်၏ ဖိအားပေးမှုဖြင့် အာရက္ခတပ်တော်ကို အပစ်အခတ် ရပ်စဲခိုင်းသည့် သဘောမျိုးပင် ဖြစ်၏။ လွန်ခဲ့သော လပိုင်းက အာရက္ခပြည်၏ ကောင်းကင်ယံပေါ် လေယာဉ်များ မိနစ်ပိုင်းခြားမျှလောက် ဆက်တိုက်ပျံဝဲနေသံများကို ကြားကြရသည်။ အတည်မပြုနိုင်သော သတင်းများအရ ထိုလေယာဉ်များသည် ဒေါ်လာ သန်း ၁၄၀ တန်ဖိုးရှိသော တရုတ်ဓာတ်ငွေ့စက်ရုံကို တရုတ်ပြည်သို့ ပြန်လည် ပြောင်းရွှေ့နေခြင်းဖြစ်ကြောင်း သတင်းများကို ကြားသိရသည်။ အခြားတဖက်တွင်တော့ စစ်ကော်မရှင်သည် သည်ရက်ပိုင်းများအတွင်း မြောက်ဦး၊ ကျောက်တော်၊ ကျောက်ဖြူ၊ ပုဏ္ဏားကျွန်းနှင့် တောင်ကုတ် စသော မြို့နယ်များကို လေကြာင်းတိုက်ခိုက်မှုများ ပြုလုပ်ခဲ့သည်။ အာဏာသိမ်းစစ်တပ်သည် အာရက္ခတပ်တော်နှင့် အပစ်အခတ်ရပ်စဲနိုင်ရန်အတွက် တရုတ်မှတဆင့် ဖိအားပေးနေသကဲ့သို့ အာရက္ခပြည်တွင်းကို လေကြောင်းဗုံးကြဲကာ ဖိအားပေးနေခြင်းမျိုးလည်း ဖြစ်၏။ ဤသည်မှာ အာဏာသိမ်းစစ်တပ်၏ ရိုးအီနေသည့် လုပ်ရိုးလုပ်စဉ်များပင် ဖြစ်ပေသည်။

အမှန်စင်စစ် မြန်မာနိုင်ငံအတွင်းမှ တော်လှန်ရေးတပ်ဖွဲ့ဝင်အများစုသည် တရုတ်နှင့် တနည်းတဖုံ ဆက်စပ်ပတ်သက်မှု ရှိကြသည်ဟု ဆိုနိုင်၏။ အထူးသဖြင့် တရုတ်နယ်စပ် တလျှောက်တွင် အခြေစိုက်သော တိုင်းရင်းသားတပ်ဖွဲ့များမှာ တရုတ်သြဇာကို လွန်ဆန်နိုင်ရန် ခက်ခဲသော အခြေအနေမျိုးတွင် ရှိနေကြ၏။ ထိုအထဲတွင် AA ပါဝင်သော မြောက်ပိုင်းညီနောင်မဟာမိတ်သုံးဖွဲ့သည်လည်း အပါအဝင်ဟု ဆိုနိုင်၏။ ညီနောင်မဟာမိတ်သုံးဖွဲ့၏ ထူးခြားချက်မှာ MNDAA နှင့် TNLA တို့သည် ရှမ်းမြောက်ဒေသတွင် နေထိုင်သော မျိုးနွယ်စုဝင်များ၏ တပ်မတော်များ ဖြစ်ကြပြီး တရုတ်နယ်စပ်မြို့နယ်များတွင် စစ်ရေးလှုပ်ရှားကြသည်။ အာရက္ခတပ်တော် (AA) မှာမူ မြန်မာနိုင်ငံ အနောက်ဘက်အစွန်ဆုံး လခြမ်းကွေး ပင်လယ်ကမ်းခြေဒေသတွင် နေထိုင်သည့် ရက္ခိုင်လူမျိုးများ၏ တော်လှန်ရေးတပ်တော်ပင် ဖြစ်သည်။ AA ၏ တော်လှန်ရေးပင်မ တည်နေရာမှာ အာရက္ခပြည်ဖြစ်သဖြင့် တရုတ်ပြည်နှင့် အတော်ပင် အလှမ်းဝေးနေသည်။ သို့သော် မဟာမိတ် သဘောတရားအရသော်လည်းကောင်း၊ တော်လှန်ရေး၏ လိုအပ်ချက်အရသော်လည်းကောင်း၊ မျက်မှောက်ခေတ် ပထဝီနိုင်ငံရေး (Geo Politic) အခြေအနေများနှင့် အာရက္ခတပ်တော်၏ မြင့်မားသော နိုင်ငံရေး မျှော်လင့်ချက်အရသော်လည်းကောင်း AA သည် တရုတ်နှင့် လုံးဝ ကင်းလွတ်နိုင်သော အခြေအနေမျိုးတွင် မရှိသည်ဟု သုံးသပ်ရမည်ပင် ဖြစ်၏။ သို့အတွက် တရုတ်မှ ဖိအားပေးလာခဲ့ပါက အတိုင်းအတာတခုအထိ AA အနေဖြင့် စဉ်းစားပေးရမည့် အခြေအနေပင် ဖြစ်ပေသည်။

AA ၏ တော်လှန်ရေးခရီးမိုင်တိုင်များ

၂၀၂၁ အလွန် နွေဦးတော်လှန်ရေးမှ ပေါက်ဖွားလာသည့် ပြည်သူ့ကာကွယ်ရေးတပ်ဖွဲ့ (PDF) များမှလွဲလျှင် အာရက္ခတပ်တော် (AA) သည် တိုင်းရင်းသားတော်လှန်ရေးတပ်ဖွဲ့များထဲတွင် သက်တမ်းအနုနယ်ဆုံး အဖွဲ့ပင် ဖြစ်သည်။ သို့သော် အရည်အချင်းပြည့်ဝသော အာရက္ခတပ်တော်၏ တပ်မှူးချုပ် ဗိုလ်ချုပ်ထွန်းမြတ်နိုင်နှင့် ဒေါက်တာညိုထွန်းအောင်ကဲ့သို့ ခေါင်းဆောင်ကောင်းများကြောင့် AA သည် အချိန်တိုတိုလေးအတွင်း အောင်မြင်မှုများစွာကို ဆွတ်ခူးနိုင်ခဲ့သည်။ အာရက္ခတပ်တော် (AA) ကို ၂၀၀၉ ခုနှစ်၊ ဧပြီလ-၁၀ ရက်တွင် ကချင်ပြည်နယ်၊ လိုင်ဇာတွင် တည်ထောင်ခဲ့ခြင်းဖြစ်ပြီး  တည်ထောင်ပြီး (၆) နှစ်အလွန် ၂၀၁၅ ခုနှစ်သို့ ရောက်သောအခါ AA သည် မူလအခြေစိုက်ရာ ကချင်ပြည်မှ မိုင်ထောင်ချီ ခရီးကြမ်းကို ဆန်တက်ကာ အာရက္ခပြည်တွင်းသို့ ရောက်ရှိနေခဲ့ပြီး ဖြစ်သည်။ ထို့နောက် ၂၀၁၆ မှ ၂၀၁၉ အထိ ကာလများတွင် AA သည် ဗမာအာဏာရှင်စစ်တပ်ကို အာရက္ခပြည်အတွင်းမှ အပြင်းအထန် တိုက်ခိုက်ချေမှုန်းနေခဲ့ပြီးလည်း ဖြစ်သည်။ တပ်တော် ဆယ့်လေးနှစ်အရောက် ၂၀၂၃၊ နိုင်ဝင်ဘာလ-၁၃ ရက်တွင်တော့ AA သည် အာဏာသိမ်းစစ်တပ်ကို အာရက္ခပြည်တွင်းမှ အပြီးအပိုင် ထွက်ခွာသွားကြရန် စစ်ကြေငြာခဲ့ပြီး မြို့သိမ်းတိုက်ပွဲများကို စတင် ဆင်နွှဲလာခဲ့၏။ တပ်တော်တည်ထောင်ပြီး ၁၇ နှစ်အရောက် လူပျိုပေါက်အရွယ်တွင်တော့ AA သည် ရက္ခိုင်ပြည်တွင်းမှ မြို့နယ် (၁၄) မြို့နယ်နှင့် ပလက်ဝမြို့တို့ကို သိမ်းပိုက်ထိန်းချုပ်ထားပြီး အာရက္ခပြည်တွင်း ၉၀ ရာခိုင်နှုန်းကျော်ကို ဗမာစစ်တပ် ကင်းစင်နယ်မြေအဖြစ် ဖော်ဆောင်ထားနိုင်ခဲ့ပြီး ဖြစ်ပေသည်။ လက်ရှိအချိန်တွင် အာရက္ခပြည်အတွင်း AA သိမ်းပိုက်ရန်ကျန်ရှိနေသော မြို့များအဖြစ် ကျောက်ဖြူ၊ စစ်တွေနှင့် မာန်အောင် သုံးမြို့သာ ကျန်တော့သည်။

လက်ကျန်ရှင်းတမ်းမြို့နယ်များ

စင်စစ် အာရက္ခတပ်တော် (AA) သိမ်းပိုက်ရန် ကျန်ရှိနေသော ကျောက်ဖြူ၊ စစ်တွေနှင့် မာန်အောင်တို‌ေသည် အာရက္ခပြည်အတွက် အလွန်အရေးပါသော မြို့နယ်များပင် ဖြစ်သည်။ နိုင်ငံရေး၊ စစ်ရေးနှင့် စီးပွားရေး မဟာဗျူဟာမြောက် မြို့များဟု ဆိုလျှင်လည်း မမှားနိုင်ပေ။ ပင်လယ်ဆိပ်ကမ်းမြို့ဖြစ်သော စစ်တွေမြို့သည် အိန္ဒိယနိုင်ငံ၏ ကုလားတန် ဘက်စုံစီမံကိန်း တည်ရှိရာမြို့ ဖြစ်သည်။ ကျောက်ဖြူမြို့သည် တရုတ်၏ ရေနံနှင့် သဘာဝဓာတ်ငွေ့စီမံကိန်းအပါအဝင် တရုတ်၏ အထူးစီးပွားရေးဇုန်နှင့် ရေနက်ဆိပ်ကမ်း တည်ရှိရာမြို့ ဖြစ်သည်။ ထို့အပြင် အိန္ဒိယ၏ ခါးပတ်လမ်းစီမံကိန်းနှင့် အိန္ဒိယသမုဒ္ဒရာထွက်ပေါက်၏ လားရာဟု ယူဆရသော ကျောက်ဖြူ-ကူမင်း ရထားလမ်း စီမံကိန်း တည်ရှိရာမြို့လည်း ဖြစ်သည်။ ထိုမြို့နှစ်မြို့လုံးသည် အာရှ၏ အင်အား ကြီး နိုင်ငံနှစ်နိုင်ငံတို့အကြားတွင် ပထဝီနိုင်ငံရေး ချိန်ခွင်လျှာ ညှိနိုင်ရန် ကြိုးစားနေကြသည့် မြို့များဟု ဆိုလျှင်လည်း မှားအံ့မထင်။

မြန်မာနိုင်ငံ၏ ဒုတိယအကြီးဆုံး ကျွန်းမြို့တခုဖြစ်သည့် မာန်အောင်မြို့သည်ကား ဘင်္ဂလားပင်လယ်အော်ထဲတွင် တည်ရှိသောမြို့ဖြစ်သည့်အတွက် အာရက္ခပြည်၏ ရေကြောင်းကို စိုးမိုးနိုင်ရန်နှင့် ကမ္ဘာ့ပင်လယ်ထွက်ပေါက်အတွက် အလွန်အရေးပါသောမြို့ဖြစ်နေပြန်၏။ ထိုကဲ့သို့ အင်အားကြီးနိုင်ငံများ၏ အကျိုးစီးပွားနှင့် ဆက်စပ်နေသည့် မြို့များကို စစ်ဆင်ရာတွင် အာရက္ခတပ်တော်အတွက် အကန့်အသတ် ရှိပုံရ၏။ လက်ကျန်ရှင်းတမ်းသည် ဆင်ပြောင်ကြီး အမြှီးကျမှတစ် ဆိုသကဲ့သို့ ဖြစ်နေမည်ကိုပင် စိုးရလေသည်။

AA မဖြစ်မနေ ရွေးချယ်ရမည့်လမ်းများ

လက်ရှိအချိန်တွင် အာရက္ခတပ်တော် (AA) ၏ တော်လှန်ရေးခရီးသည် နှစ်နှစ်တာကာလသို့တိုင် ရောက်ရှိလာခဲ့ပြီး ဖြစ်သည်။ သိမ်းပိုက်ထိန်းချုပ်ထားပြီးသော မြို့နယ်များကို အာရက္ခပြည်သူ့တော်လှန်ရေးအစိုးရမှ တည်ငြိမ်စွာ အုပ်ချုပ်လျှက်ပင် ရှိနေသည်။ စစ်ကော်မရှင်တပ်၏ လေကြောင်းတိုက်ခိုက်မှုအန္တရာယ်ကို စိုးရိမ်ကြောင့်ကြရသည်မှလွဲလျှင် အာရက္ခပြည်သူတရပ်လုံးသည်လည်း အခြေအနေ အချိန်အခါနှင့် လိုက်လျောညီထွေစွာ နေထိုင်တတ်နေပြီးလည်း ဖြစ်၏။

စစ်ရေးကာလ ရှည်ကြာလာလျှင် ပြည်သူလူထုသည် တော်လှန်ရေးကို ငြီးငွေ့အားကုန်သွားသောအခြေအနေများ ဖြစ်ပေါ်လာတတ်၏။ သို့သော် အာရက္ခပြည်တွင်းတွင်တော့ ပြည်သူလူထုသည် ကျောက်ဖြူနှင့် စစ်တွေ၏ သတင်းကောင်းကို မျှော်လင့်ရင်း သည်နေ့အထိ အားတင်းထားကြသည့်အခြေအနေကို မြင်တွေ့နေရသည်။ အာရက္ခပြည်သူ့တော်လှန်ရေးထဲမှ ကျောက်ဖြူ၊ စစ်တွေနှင့် မာန်အောင်မြို့ သုံးမြို့ ပဲ့ကျန်ရစ်ခဲ့မည်ကို လွန်မြောက်နယ်မြမှ လူထုက စိုးရိမ်ကြောင့်ကြနေကြသည့် အခြေအနေပင် ဖြစ်သည်။ ထိုမြို့သုံးမြို့ကို အာရက္ခပြည်၏ စစ်ရေးနှင့် နိုင်ငံရေးကို အဆုံးအဖြတ်ပေးမည့် မြို့များအဖြစ် ပြည်သူများက မျှော်လင့်ထားကြသည်။ ထို့ကြောင့်ပင် စစ်ရေးအနိဌာရုံများကြားထဲမှ ထိုသုံးမြို့၏ သတင်းကောင်းကို ပြည်သူများ မျှော်လင့်ကြခြင်းပင် ဖြစ်ပေသည်။

အပစ်အခတ်ရပ်စဲရေးသတိ

လက်ရှိအချိန်တွင် အာဏာသိမ်းစစ်တပ်သည် အာရက္ခတပ်တော်ကို တရုတ်မှတဆင့် ဖိအားပေးကာ အပစ်အခတ်ရပ်စဲရန် ပြုလုပ်လာနေခြင်းကို သတိထား၍ ကိုင်တွယ်ရမည်ပင် ဖြစ်၏။ သာမန်အားဖြင့် အပစ်အခတ် ရပ်စဲလိုက်မည်ဆိုပါက စစ်ပန်းနေသည့် စစ်သည်တော်များနှင့် လူထုတရပ်လုံး အနည်းငယ် သက်သာရာ ရရှိကြမည်ပင် ဖြစ်၏ ထို့အပြင် လိုအပ်နေသော ပြန်လည်တည်ဆောင်ရေး လုပ်ငန်းများကို လုပ်ဆောင်ရင်း စစ်ရေးနှင့် နိုင်ငံရေးအင်အားကိုပြန်လည် စုစည်းနိုင်မည်ပင် ဖြစ်၏။ သို့သော် အခြားတဖက်တွင်တော့ ကျောက်ဖြူနှင့် စစ်တွေကဲ့သို့ မြို့များကို မသိမ်းပိုက်နိုင်သေးမီအချိန်တွင် အပစ်အခတ်ရပ်စဲရေးစကား ပြောဆိုမည်ဆိုပါက အာရက္ခတပ်တော်နှင့် ပြည်သူလူထု၏ လိုအင်ဆန္ဒ ပြည့်ဝနိုင်မည်လားဆိုသော မေးခွန်းက ရှိနေပြန်၏။ တရုတ်အကျိုးစီးပွား အများစု တည်ရှိနေသည့် ကျောက်ဖြူကို ထိန်းချုပ်နိုင်ပြီးမှ စကားပြောဆိုမည်ဆိုပါက တရုတ်ကိုရော စစ်ကော်မရှင်တပ်ကိုပါ အသာစီးမှ ဖိအားပေး ပြောဆိုနိုင်မည်ကို လူထုက နားလည်ထား၏။

အာဏာသိမ်းစစ်တပ်သည် တိုင်းရင်းသား တော်လှန်ရေး တပ်ဖွဲ့များနှင့် ငြိမ်းချမ်းရေး စကားပြောဆိုတိုင်းတွင် တရုတ်၏ ဖိအားကို ရယူလျှက် ၎င်းတို့ အလိုရှိရာကို အပေါ်စီးမှ တောင်းဆိုလေ့ ရှိ၏။ ၁၀၂၇ စစ်ဆင်ရေးအပြီးတွင် ညီနောင်သုံးဖွဲ့မှ သိမ်းပိုက် ရယူနိုင်ခဲ့သည့် မြို့များကို သေနတ်တချက် မဖောက်ဘဲ တရုတ်ဖိအားဖြင့် ပြန်လည် တောင်းယူသွားခဲ့သည့် သာဓကမှာ ပူပူနွေးနွေးပင် ရှိနေသေး၏။ လက်ရှိအချိန်တွင်လည်း အပစ်အခတ် ရပ်စဲရေးအတွက် စကားပြောဆိုရမည်ဆိုပါက အာဏာသိမ်းစစ်တပ်သည် တရုတ်ဖိအားကိုသုံးကာ အာရက္ခပြည်၏ ဗမာနယ်စပ် မြို့နယ်များဖြစ်စေသော ဂွ၊ သံတွဲ၊ တောင်ကုတ်နှင့် အမ်း စသော မြို့များကို အာရက္ခတပ်တော်ထံမှ တောင်းခံနိုင်ဖွယ် ရှိနေသည်။ ထိုသို့ တောင်းခံနိုင်လာခဲ့မည်ဆိုပါက အာရက္ခတပ်တော်အနေဖြင့် ၎င်းကို ငြင်းဆန်နိုင်သည့်စွမ်းအား ရှိမရှိ ဆိုသည်မှာလည်း အများပြည်သူ မသိနိုင်သော ကိစ္စသာ ဖြစ်၏။ အာဏာသိမ်းစစ်တပ်သည် TNLA နှင့် MNDAA တို့ထံမှ ပြန်လည် တောင်းယူသွားနိုင်သည့် မြို့များတွင် လူဖမ်းပွဲကြီးကို အကြီးအကျယ် ဆင်နွှဲခဲ့ပြီး တချို့ကို နှစ်ရှည်ထောင်ဒဏ်နှင့် သေဒဏ်များ ပေးသည်အထိ ရှိခဲ့ကြောင်း သတင်းများတွင် တွေ့ရ၏။ ထိုအချက်သည်ပင် အာရက္ခပြည်သူလူထုကို ပူပန်စေသည့် အချက် ဖြစ်နေရပေသည်။

ပြည်သူ့မျက်နှာကို ပြန်ကြည့်ရမည့် အပစ်အခတ်ရပ်စဲရေး

တောင်ကုတ်မြို့သိမ်း တိုက်ပွဲကာလအတွင်းက ဖြစ်သည်။ တောင်ကုတ်မြို့ဖက်မှ စစ်တိုက်ပြီး ပြန်လာသည့် အာရက္ခတပ်တော်၏ တေဘာကားနှစ်စီးခန့်သည် မအီမြို့မဈေးကြီးအနီးတွင် ခေတ္တ ရပ်တံ့သွားခဲ့၏။  ထိုအချိန်တွင်ပင် ထိုအနီးအနား ပတ်ဝန်းကျင်မှ ဈေးဆိုင်များအပါအဝင် ဈေးကြီးတခုလုံးရှိလူများ အာရက္ခတပ်တော် (AA) အနားသို့ စုပြုံ ရောက်ရှိလာခဲ့ကြပြီး သောက်ရေသန့်ဗူးများ၊ အချိုရည်များ၊ မုန့်များနှင့် အဝတ်အထည်များ ပေးကမ်းကြသည်ကို မြင်တွေ့ခဲ့ရဖူးသည်။ ပြည်သူတို့၏ ပါးစပ်ဖျားမှ အာရက္ခတပ်တော် တိုက်ပွဲတိုင်း အောင်ပါစေဆိုသော ကြွေးကြော်သံများကိုပါ ကြားခဲ့ရဖူးသည်။ ထိုမြင်ကွင်းသည် အာရက္ခပြည် လွတ်လပ်ရေးအတွက် အာရက္ခတပ်တော်အပေါ်တွင် ပြည်သူလူထု မည်မျှအထိ မျှော်လင့်ထားကြောင်းကို အတိအလင်း မြင်တွေ့ရသော မြင်ကွင်းပင် ဖြစ်ပေသည်။ ထို့အပြင် အာရက္ခတပ်တော် (AA) ၏ တရုတ်ဖိအားဖြင့် အပစ်အခတ် ရပ်စဲရန်ကိစ္စအား ဘက်ပေါင်းစုံမှ သုံးသပ်ရန် မြင်ကွင်းတခုဟုလည်း ဆိုနိုင်မည်ပင် ဖြစ်ပေသည်။

နီရီရီ