အာရက္ခတိုင်းမ်စ် ( ၂၂ နိုဝင်ဘာ ၂၀၂၄ ခုနှစ်)
ရက္ခိုင်ပြည်ရဲ့ အင်အားကြီးပါတီတခုဖြစ်တဲ့ ရခိုင်အမျိုးသားပါတီ (ANP) အနေနဲ့ တခြား နာမည်နဲ့ ပါတီမှတ်ပုံတင်ရမယ် ဆိုပါက တင်မှာမဟုတ်ဘူးလို့ ANP မှ မူဝါဒရေးရာ ဦးဆောင် ကော်မတီဝင် ဦးထွန်းအောင်ကျော်က အာရက္ခတိုင်းမ်စ်ကို ပြောပါတယ်။
စစ်ကောင်စီလက်ထက်မှာ ပြဌာန်းထားတဲ့ နိုင်ငံရေးပါတီများ မှတ်ပုံတင်ခြင်း ဥပဒေသစ်အရ အရင်မှတ်ပုံတင် ထားပြီးတဲ့ နိုင်ငံရေးပါတီတွေဟာ အသစ်ပြန်လည် မှတ်ပုံတင်ရတာ ဖြစ်ပါတယ်။
အဲဒီလို မှတ်ပုံပြန်တင်တဲ့အခါမှာ ANP ရဲ့ ပါတီတည်ထောင်ခွင့် လျှောက်ထားချက်ကို စစ်ကောင်စီရဲ့ ရွေးကောက်ပွဲကော်မရှင်က ပယ်ဖျက်ကြောင်း ဇူလိုင် (၁) ရက်နေ့က စစ်ကောင်စီ မီဒီယာတွေက ထုတ်ပြန်ပါတယ်။
ANP ကို တခြားအမည် ပြောင်းလဲပြီးမှ မှတ်ပုံတင်ခွင့်ပေးမယ်ဆိုရင်တော့ ပါတီရဲ့ နိုင်ငံရေးသမိုင်းကြောင်း အပျက်ခံပြီး ပါတီအသစ်ထောင်မှာ မဟုတ်ဘူးလို့ ဦးထွန်းအောင်ကျော် က အာရက္ခတိုင်းမ်စ်ကို ပြောပါတယ်။
“နိုင်ငံတော်စီမံအုပ်ချုပ်ရေးကောင်စီက နိုင်ငံရေးပါတီတွေ မှတ်ပုံတင်ရမယ်ဆိုတဲ့အခါ ဦးတို့ ရခိုင်အမျိုးသား ပါတီအနေနဲ့ ဥပဒေနဲ့အညီ ထပ်ပြီးတော့ မှတ်ပုံတင်တယ်။ အဲဒီလို တင်ပြီးတဲ့နောက်မှာ တစ်နှစ်ကျော်လောက် ကြာတဲ့အထိ ဘာမှ အကြောင်းပြန်ကြားတာလည်း မရှိဘူး။ အဲဒီ တစ်နှစ်ကျော်ပြီးတော့မှပဲ ပုဒ်မ ၇ နဲ့ ငြိစွန်း တယ်ဆိုပြီး အကြောင်းကြားပြီးမှ ပါတီမှတ်ပုံတင်တဲ့ကိစ္စကို ငြင်းပယ်လိုက်တယ်ဆိုပြီး တွေ့ရတယ်။ တကယ် လို့ ရခိုင်အမျိုးသားပါတီနာမည်နဲ့ မှတ်ပုံတင်ခွင့်မရဘူး တခြားနာမည်နဲ့သာ မှတ်ပုံတင်ပါလို့ ပြောလာရင် ကတော့ ဦးတို့အနေနဲ့ တခြားနိုင်ငံရေးပါတီအနေနဲ့ ပြောင်းလဲပြီးတော့ မှတ်ပုံတင်ဖို့အတွက် တာဝန်ရှိတဲ့ ပုဂ္ဂိုလ် တွေအနေနဲ့ အဲဒီလို စိတ်ဆန္ဒမရှိဘူး။ တကယ်လို့ နာမည်ပြောင်းပြီးတော့မှပဲ ပါတီအနေနဲ့ ခွင့်ပြုမယ် ဆိုရင်တော့ ရခိုင်အမျိုးသားပါတီရဲ့ နိုင်ငံရေးသမိုင်းကြောင်းကို အပျက်ခံပြီးတော့ ပါတီအသစ်ထောင်မှာ မဟုတ်ဘူး” လို့ ပြောပါတယ်။
ANP ပါတီဟာ နိုင်ငံရေးပါတီတွေ မှတ်ပုံတင်ခွင့်ဥပဒေ ပြဌာန်းချက်တွေနဲ့မညီတာကြောင့် ပယ်ချလိုက်တာ ဖြစ်တယ်လို့ ကော်မရှင်ထုတ်ပြန်ချက်မှာ ဖော်ပြထားပါတယ်။
လာမယ့် ၂၀၂၅ ခုနှစ်မှာ အထွေထွေရွေးကောက်ပွဲ သေချာပေါက် ကျင်းပမယ်လို့ ယုံကြည်တာကြောင့် ပါတီ မှတ်ပုံတင်ခွင့် ပယ်ဖျက်ခံရတဲ့ နိုင်ငံရေးပါတီတွေကို ပြန်လည်မှတ်ပုံတင်ခွင့် ပေးစေလိုတယ်လို့ ရခိုင်အမျိုးသားပါတီ (ANP) မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော် က အာရက္ခတိုင်းမ်စ်ကို ပြောပါတယ်။
“ရွေးကောက်ပွဲလည်း ဖြစ်အောင်ကို လုပ်လိမ့်မယ်လို့ ပါတီအနေနဲ့ ယုံကြည်ထားတယ်။ ဒီအတိုင်းပဲ တပ်မတော်က အကြာကြီး အာဏာထိန်းလို့လည်း နိုင်ငံတကာဖိအားက ပိုလာနိုင်တယ်။ တကယ်လို့ ၂၀၂၅ မှာ ရွေးကောက်ပွဲတစ်ခုကို အောင်အောင်မြင်မြင်လုပ်လို့ မဲဆန္ဒနဲ့ တက်လာတဲ့ နိုင်ငံရေး အစိုးရတစ်ရပ် ဆိုရင်တော့ နိုင်ငံရေးအရ ဖိအားပေးမှုတွေ၊ နိုင်ငံတကာဖိအားတွေ အများကြီးလျော့သွားမယ် ထင်တယ်။ အဲဒီလို အခြေအနေတစ်ရပ် ပေါ်ပေါက်လာတဲ့အခါ ထပ်ပြီးတော့များ နိုင်ငံရေးပါတီတွေအနေနဲ့ ပါတီမှတ်ပုံတင်ခွင့်မရတဲ့ နိုင်ငံရေးပါတီတွေအနေနဲ့ ထပ်ပြီးတော့ မှတ်ပုံတင်နိုင်တယ်လို့ အခွင့်အရေးတစ်ခု ပေးလာမယ်ဆိုရင် ရခိုင်အမျိုးသားပါတီအနေနဲ့ ရက္ခိုင်ပြည်နဲ့ ရက္ခိုင်ပြည်သူတွေရဲ့ အမျိုးသားအကျိုးစီးပွားအတွက်၊ ရက္ခိုင်ပြည်မှာနေတဲ့ ပြည်သူလူထုရဲ့ အကျိုးစီးပွားအတွက် ရခိုင်အမျိုးသားပါတီကိုပဲ ထပ်ပြီးတော့ မှတ်ပုံတင်မယ်” လို့ သူက ပြောပါတယ်။
လက်ရှိမှာတော့ ANP အနေနဲ့ ပါတီမှတ်ပုံတင်ခွင့်ကနေ ငြင်းပယ်ခံထားရတာကြောင့် တရားဝင် နိုင်ငံရေးပါတီအနေနဲ့ လုပ်ပိုင်ခွင့်တွေ မရှိသေးကြောင်း၊ ဒါပေမယ့် တရားဝင် ဖျက်သိမ်းတယ်လို့ ကြေငြာထားတာ မရှိသေးတဲ့အတွက်ကြောင့် ပါတီဟာ ဆက်လက်ရှိနေဆဲဖြစ်ကြောင်း သူက ပြောပါတယ်။
စစ်ကောင်စီရဲ့ နိုင်ငံရေးပါတီများ မှတ်ပုံတင်ခွင့် ဥပဒေပြဌာန်းချက်မှာ မတရားအသင်းအဖြစ်လည်းကောင်း၊ အကြမ်းဖက်အဖွဲ့အစည်းအဖြစ်လည်းကောင်း ကြေညာခြင်းခံထားရတဲ့အဖွဲ့အစည်း၊ နိုင်ငံတော်ကိုဆန့်ကျင်နေတဲ့ လက်နက်ကိုင်အဖွဲ့အစည်း (သို့မဟုတ်) အဲဒီအဖွဲ့အစည်းဝင်တွေနဲ့ တိုက်ရိုက်ဖြစ်စေ၊ သွယ်ဝိုက်ဖြစ်စေ ဆက်သွယ် အားပေး ကူညီနေတဲ့အဖွဲ့အစည်းတွေကို မှတ်ပုံတင်ခွင့်လျှောက်ထားခွင့်မရကြောင်း ဖော်ပြထားတာပါ။
