အာရက္ခတိုင်းမ်စ် (၂၆ ဖေဖော်ဝါရီ ၂၀၂၅)
မကွေးတိုင်း၊ ငဖဲမြို့နယ်မှာ အာရက္ခတပ်တော် (AA) က လေကြောင်းရန် ကာကွယ်ရေးတပ်ကို ထိုးစစ်ဆင်တိုက်ခိုက်စဉ် ထွက်ပြေးလာတဲ့ စစ်ကောင်စီတပ်ဖွဲ့ ၂၃ ဦးကို လက်နက်ခဲယမ်းတွေနဲ့အတူ ဖမ်းဆီးရမိခဲ့တယ်လို့ ချင်းကာကွယ်ရေးတပ်- အရှိုက ဒီကနေ့မှာ ထုတ်ပြန်ပါတယ်။
ဖေဖော်ဝါရီလ ၂၄ ရက်မှ ၂၆ ရက်အထိ နယ်မြေရှင်းလင်းရေး ဆောင်ရွက်ရာမှာ နတ်ရေကန် ဆက်သွယ်ရေး တာဝါတိုင်ရဲ့ မြောက်ဘက် မီတာ ၂၀၀၀ ခန့်အကွာ တောတွင်းနေရာ အသီးသီးတွင် ဖမ်းဆီးရမိခြင်းဖြစ်တယ်လို့ ဆိုပါတယ်။
MA – 1 သေနတ် ၁၃ လက်၊ MA – 2 ၁ လက်၊ MA – 3 ၃ လက်၊ MA – 11 ၂ လက်၊ MA- 5 ၁ လက် စုစုပေါင်း လက်နက်ငယ် ၂၀ လက်၊ လက်ပစ်မိုင်း ၁၈ လုံး၊ EY သီး ၁၂ လုံး၊ ကျည်ဆံ ၄၀၀၀ ကျော် နဲ့ အခြားစစ်အသုံးအဆောင် ပစ္စည်းတွေလည်း သိမ်းဆည်းရမိခဲ့တာပါ။
နတ်ရေကန်ဒေသအနီးတဝိုက်အတွင်း တာဝန်ထမ်းဆောင်နေတဲ့ စစ်ကောင်စီတပ်ဖွဲ့ဝင်တွေအနေနဲ့ တော်လှန်ရေး တပ်ဖွဲ့တွေ နဲ့ ချိတ်ဆက်ဆက်သွယ်ပြီး အမြန်ဆုံး အလင်းဝင် ပူးပေါင်းကြဖို့ ချင်းကာကွယ်ရေးတပ် – အရှိုတိုက်တွန်းထားပါတယ်။
