အာရက္ခတိုင်းမ်စ် (၁၃ မတ် ၂၀၂၅)
ရက္ခိုင်ပြည် ကျောက်ဖြူမြို့နယ်ရှိ ကြက္တိန်ရွာကို စစ်ကောင်စီက ဒရုန်းနဲ့လာရောက်ပြီး ဗုံး ၄ ကြိမ် တိုင်တိုင် ကြဲချလို့ နေအိမ် နဲ့ ပြည်သူတွေရဲ့ ဆန် အများအပြား ပျက်စီးခဲ့တယ်လို့ သိရပါတယ်။
စစ်ကောင်စီက ကြက္တိန်ရွာကို မတ်လ ၇ ရက် နေ့လည် ၁ နာရီခွဲခန့်က ဗုံး ၂ လုံး ကြဲချလို့ အိမ် ၂၇ လုံး နဲ့ ဆန်တောင်း ၅၀၀၀ ကျော် ပျက်စီးခဲ့ပြီး မတ်လ ၉ ရက် နေ့လည် ၁ နာရီခွဲခန့်ကလည်း ဒရုန်း ၂ စီး နဲ့ ဗုံးလုံး ထပ်မံကြဲချလို့ အိမ် ၁၄ အိမ် နဲ့ ဆန်တောင်း ၄၀၀၀ နီးပါး ပျက်စီးခဲ့ပါတယ်။
အလားတူ မတ်လ ၁၁ ရက် မနက် ၁၀ နာရီလောက်တွင် ဒရုန်းနဲ့ ထပ်မံကြဲလို့ အိမ် ၄ အိမ် နဲ့ ဆန်တောင်း ၁၀၀၀ နီးပါး ထပ်မံ ပျက်စီးခဲ့ပြီး မတ်လ ၁၂ ရက် နေ့လည် ၁၂ နာရီကျော်တွင် ဒရုန်းနဲ့ ဗုံး ၂ လုံး ထပ်မံ ကြဲချလို့ ဘုန်းတော်ကြီးကျောင်း နဲ့ ဓမ္မာရုံတို့ ပျက်စီးခဲ့ပါတယ်။
“ ဓညဝတီရေတပ်ဌာနချုပ်ကနေပြီးတော့ ဒရုန်းတွေလွှတ်ပြီး ဗုံးကြဲတာ၊ ပြည်သူတွေရဲ့ အိုးအိမ်စည်းစိမ်တွေကို ရည်ရွယ်ချက်ရှိရှိကို ဖျက်စီးနေတာ။ မစားရတဲ့အမဲ သဲနဲ့ ပတ်တာပေါ့ဗျာ” လို့ ကျောက်ဖြူဒေသခံတစ်ဦးက အာရက္ခတိုင်းမ်စ်ကို ပြောပါတယ်။
စစ်ကောင်စီက ၄ ကြိမ်တိုင်တိုင် ကြက္တိန်ရွာကို ဗုံးကြဲခဲ့တာကြောင့် လူနေအိမ် ၄၅ အိမ် ပျက်စီးခဲ့ပြီး ပြည်သူပိုင် ဆန်တောင်း ၁၀၀၀၀ ကျော်လည်း ပျက်စီးဆုံးရှုံးခဲ့ရပါတယ်။
11 comments