အာရက္ခတိုင်းမ်စ် (၂၈ ဇွန် ၂၀၂၅)
ရက္ခိုင်ပြည် တောင်ကုတ်မြို့နယ်ကနေပြီးတော့ ပြည်မထွက်လာတဲ့ ရက္ခိုင်ပြည်သူ ၃၀ ကျော် ပြည်မြို့ နဝဒေးတံတား စစ်ဆေးရေးဂိတ်တွင် စစ်ကောင်စီက ဖမ်းဆီးသွားတယ်လို့ သိရပါတယ်။
ဖမ်းဆီးခံရတဲ့ ရက္ခိုင်ပြည်သူတွေဟာ တောင်ကုတ်မြို့နယ် တန်းလွဲချောင်းက လက်ပန်ကျွန်း၊ သက္ကေကျွန်း နဲ့ ရွာမတိုက်နယ်က ပြည်သူတွေဖြစ်တယ်လို့ ပြည်မြို့ရောက် ရက္ခိုင်စစ်ဘေးရှောင် ၁ ဦးက အာရက္ခတိုင်းမ်စ်ကို ပြောပါတယ်။
“ တချို့က အာရက္ခတပ်တော်ရဲ့ စစ်မှုထမ်းကြောင့် ရှောင်လာတဲ့သူတွေရယ် စားဝတ်နေရေးကြောင့် အလုပ်လုပ်ဖို့ ထွက်လာတဲ့သူတွေရယ် အားလုံးပေါင်း ၃၀ ကျော်တယ်။ အဖမ်းခံထားရတာ” လို့ သူက အာရက္ခတိုင်းမ်စ်ကို ပြောပါတယ်။
တောင်ကုတ်ကနေ ပြည်ကို သွားစရိတ် ၁ ဦးကို ၁၈ သိန်း ပွဲစားကို ပေးရပြီး ၈ ရက်ကြာ လမ်းလျောက်ရတယ်လို့ သိရပါတယ်။ ပြည်မြို့ကို ထွက်ခွာလာသူတွေအနက် အချို့မှာ လမ်းခရီး ပင်ပန်းဒဏ်ကြောင့် လမ်းခရီးတွင် သေဆုံးမှုတွေ ရှိနေပါတယ်။
“ မနေ့က အဖမ်းခံထားရတဲ့ မိသားစုဝင်တွေက သွားထုတ်တာ သိန်း ၅၀ တောင်းတယ်။ မပေးနိုင်လို့ ဒီနေ့အထိ ပြန်မလွှတ်ပေးသေးဘူး” လို့ ပြည်မြို့ရောက် တောင်ကုတ်စစ်ဘေးရှောင် ၁ ဦးက အာရက္ခတိုင်းမ်းကို ပြောပါတယ်။
ရက္ခိုင်ပြည်မှာ တိုက်ပွဲတွေဖြစ်ပွားပြီးနောက် အလုပ်အကိုင်ရှားပါးမှု၊ ကုန်စည်စီးဆင်းမှု ရပ်တန့်မှုတွေကြောင့် ဒေသခံအချို့ဟာ ရက္ခိုင်ပြင်ပကို ထွက်ခွာမှုတွေလည်း ရှိနေတယ်လို့ သိရပါတယ်။
7 comments