သံတွဲ၊ တောင်ကုတ်၊ ဂွ နဲ့ အမ်းမှာ ရွေးကောက်ပွဲမလုပ်နိုင်ကြောင်း စကမ ဝန်ခံ

အာရက္ခတိုင်းမ်စ်(၂၈ ဒီဇင်ဘာ ၂၀၂၅)

ဒီကနေ့ ဒီဇင်ဘာ ၂၈ ရက်မှာ စတင်ကျင်းပတဲ့ ပါတီစုံဒီမိုကရေစီ အထွေထွေရွေးကောက်ပွဲကို ရက္ခိုင်ပြည်ရှိ အမ်း၊ သံတွဲ၊ ဂွ နဲ့ တောင်ကုတ်မြို့တွေမှာ မကျင်းပကြောင်း စကမ က ထပ်မံထုတ်ပြန်ခဲ့ပါတယ်။

အဆိုပါ ထုတ်ပြန်ချက်ကိုတော့ မနေ့က ဒီဇင်ဘာ ၂၇ ရက်၊ ညပိုင်းမှာမှ ထပ်မံ ထုတ်ပြန်ခဲ့တာလည်း ဖြစ်ပါတယ်။

ရွေးကောက်ပွဲများ ကျင်းပခြင်း မပြုမယ့် ပြည်သူ့လွှတ်တော်မဲဆန္ဒနယ် (၉) နယ်တွင် အမ်းမြို့နယ်တခုလုံး၊ သံတွဲမြို့နယ်တခုလုံး၊ ဂွမြို့နယ်တခုလုံး နဲ့‌ တောင်ကုတ်မြို့နယ်တခုလုံးတို့ ပါဝင်တယ်လို့ ဆိုပါတယ်။

ဆက်လက်ပြီး အမျိုးသားလွှတ်တော် မဲအများဆုံးရသူ အနိုင်ယူစနစ် (FPTP) မဲဆန္ဒနယ် (၂) နယ်မှာလည်း ရက္ခိုင်ပြည် အမျိုးသားလွှတ်တော် (မဲအများဆုံးရသူအနိုင်ယူစနစ်) မဲဆန္ဒနယ်အမှတ် (၆ )၊ အမ်းခရိုင်တခုလုံး ပါဝင်တယ်လို့ သိရပါတယ်။

ဒါ့အပြင် တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော် မဲအများဆုံးရသူအနိုင်ယူစနစ် (FPTP) မဲဆန္ဒနယ် (၉) နယ်တွင် ရက္ခိုင်ပြည်လွှတ်တော် (မဲအများဆုံးရသူအနိုင်ယူစနစ်) အမ်းမြို့နယ် မဲဆန္ဒနယ်မှ အမ်းမြို့နယ်တခုလုံး၊ သံတွဲမြို့နယ် မဲဆန္ဒနယ်မှ သံတွဲမြို့နယ်တခုလုံး၊ ဂွမြို့နယ် မဲဆန္ဒနယ်မှ ဂွမြို့နယ်တခုလုံး နဲ့ တောင်ကုတ်မြို့နယ် မဲဆန္ဒနယ်မှ တောင်ကုတ်မြို့နယ်တခုလုံး ပါဝင်တယ်လို့ UEC က ထုတ်ပြန်ထားပါတယ်။

အဆိုပါ မဲဆန္ဒနယ်တွေဟာ ရွေးကောက်ပွဲ ကျင်းပရန် အခြေအနေ မရှိတာကြောင့် ကျင်းပခြင်း ပြုမှာမဟုတ်ကြောင်း ပြည်ထောင်စုရွေးကောက်ပွဲကော်မရှင် ဥပဒေ ပုဒ်မ ၁၀ (စ) အရ ထုတ်ပြန်ခဲ့တာပဲ ဖြစ်ပါတယ်။