အစိုးရသစ်က တစုံတစ်ရာ အသက်ရှူချောင်နိုင်ပေမယ့် ထင်သလောက် မလွယ်ကူ

အာရက္ခတိုင်းမ်စ် (၁၃ မတ် ၂၀၂၆)

စစ်ကော်မရှင်ကျင်းပတဲ့ ရွေးကောက်ပွဲကနေ ပေါ်ထွက်လာမယ့် အစိုးရသစ်အနေနဲ့ လက်ရှိ မြန်မာ့နိုင်ငံရေးအခင်းအကျင်းမှာ တစုံတစ်ရာ အသက်ရှူချောင်နိုင်ပေမယ့် ထင်သလောက် မလွယ်ကူဘူးလို့ တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။

“ကျမကြည့်တာတော့ ဒီရွေးကောက်ပွဲပြီးသွားတော့ ၃ ကြိမ်လုံးလည်းပြီးသွားရော သူတို့ကြေညာတာ မတ်လမှာ လွှတ်တော်ခေါ်မယ်။ ဧပြီလမှာ အစိုးရကြေညာမယ်ဆိုပြီး။ အဲဒီတော့ သူတို့အတွက်တော့ တစုံတစ်ရာ အသက်ရှူပေါက်လေး ချောင်သွားမယ်။ ဒါပေမယ့် ဒါက နိုင်ငံတကာဆက်ဆံရေးမှာပဲ ဖြစ်ဖြစ်၊ သူ့ရဲ့ နိုင်ငံရေးအရပဲဖြစ်ဖြစ် တစုံတစ်ရာ အသက်ရှူပေါက် ချောင်သွားမှာဖြစ်တယ်။ သူတို့ လိုချင်သလောက်တော့  အကုန်လုံးဝိုင်းပြီး အသိအမှတ်ပြုဖို့ဆိုတာတော့ မလွယ်ဘူး။ ဒါပေမယ့် တချို့ နိုင်ငံကြီးတွေပေါ့ တရုတ်တို့လို၊ ရုရှားတို့လို၊ အိန္ဒိယတို့လို အဲဒီလို အိမ်နီးနားချင်းနိုင်ငံတွေက အသိအမှတ် ပြုကောင်းပြုမယ်။ အာဆီယံကတော့ ခပ်တင်းတင်းပဲ ဖြစ်နေသေးမှာပဲ။ သူတို့ ထင်သလောက်တော့ မလွယ်ဘူး။ တစုံတစ်ရာတော့ အသက်ရှူချောင်သွားမယ်။ စီးပွားရေးအရတော့ သူတို့ ဖြေရှင်းနိုင်မယ်လို့ မထင်ဘူး။ ပိုမိုပြီးတော့ စစ်ရေးအရ သူတို့အစိုးရ ပိုမိုတရားဝင်ခိုင်မာဖို့အတွက် ပိုပြီး ကြမ်းကြမ်းတမ်းတမ်း လုပ်လာလိမ့်မယ် ထင်တယ်။ စစ်ရေးတွေကတော့ ပိုပြီးတော့ ကြမ်းတမ်းလာလိမ့်မယ် ထင်တယ်။ ဒီဘက်ကလည်း နေမှာမဟုတ်ဘူးလေ။ အခုလည်း တပ်ပေါင်းစုတွေဖွဲ့ ဘာတွေဖွဲ့ လုပ်နေကြပြီပဲ။ နောက် ပွင့်လင်းရာသီလည်း ရောက်ပြီဆိုတော့ စစ်ရေးအရတော့ ပိုပြီးတော့ ပြင်းထန်လာနိုင်တယ်။ အဲဒီတော့ ဗမာပြည်အရေးကတော့ သိပ်ပြီးတော့ အကောင်းမြင်စရာ မရှိဘူးပေါ့။ ပြည်သူလူထု ခါးစည်းခံရဦးမှာပဲ ဒုက္ခတွေကတော့” လို့ သူက ပြောပါတယ်။

လက်ရှိမှာတော့ စစ်ကော်မရှင်ဟာ ၂၀၂၅ ပါတီစုံဒီမိုကရေစီအထွေထွေ ရွေးကောက်ပွဲကို ဇန်နဝါရီလ ၂၅ ရက်မှာ အပြီးကျင်းပခဲ့ကာ မတ်လ ၁၆ ရက်မှာတော့ တတိယအကြိမ် ပြည်သူ့လွှတ်တော်၊ အမျိုးသားလွှတ်တော်နဲ့ တိုင်းဒေသကြီး/ပြည်နယ် လွှတ်တော်တွေကို စတင်ကျင်းပကာ လွှတ်တော် ဥက္ကဋ္ဌတွေ ရွေးချယ်တာနဲ့ သမ္မတ ရွေးချယ်တာတို့ကို လုပ်ဆောင်မယ်လို့ သိရပါတယ်။

စစ်အာဏာရှင်စနစ် ပြတ်ရေးခရီးဟာ ထင်သလောက် မလွယ်ပေမယ့်လည်း တဖြေးဖြေး ရှေ့တိုးဖို့ပဲ လိုကြောင်း၊ လက်ရှိမှာ စစ်အာဏာရှင်တွေဟာ အားနည်းနေပြီဖြစ်ကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။

“အဲဒီတော့ ကျမကတော့ ဒီလိုကြည့်တယ်။ ဒီစစ်အာဏာရှင်စနစ် ရှိနေသရွေ့တော့ ကျမတို့အတွက်ကတော့၊ ပြည်သူလူထုအတွက်က ထွက်ပေါက် မရှိဘူး။ စစ်အာဏာရှင်စနစ် မပြတ်ပြတ်အောင် လုပ်ရမှာပဲ။ အဲဒီလို လုပ်တဲ့အခါမှာတော့ နည်းလမ်းပေါင်းစုံပေါ့။ မြို့ပေါ်မှာနေတဲ့လူလည်း လုပ်နိုင်သလောက်လုပ်၊ တောထဲက လက်နက်ကိုင် ခုခံနေတဲ့လူတွေလည်း လုပ်စရာရှိတာလုပ်။ လူမျိုးစုဒေသတွေကလည်း ကိုယ်နဲ့သင့်တော်ရာ သင့်တော်ရာ လုပ်ကြရင် စစ်အာဏာရှင်စနစ်က အခုတောင် တော်တော် အားနည်းနေပါပြီ။ ဒါ တဖြေးဖြေး ကျမတို့ ရှေ့တိုးဖို့ပဲ လိုတယ်လို့ မြင်ပါတယ်။ ထင်သလောက်တော့ မလွယ်ဘူးပေါ့နော်။ နွေဦးတော်လှန်ရေး စစချင်း စစ်အာဏာရှင်စနစ် ပြုတ်ကျသွားမယ်ထင်တာ အဲဒီလောက် မလွယ်ပါဘူး။ ဒါပေမယ့် ကျမတို့ တော်လှန်ရေးက မနေ့တနေ့ကမှ စတာမဟုတ်ဘူးလေ။ တက်လိုက် ကျလိုက် ဖြစ်နေမှာပဲ။ ဆက်လက်ပြီး သွားလိမ့်မယ် ထင်ပါတယ်” လို့ သူက ပြောပါတယ်။

စစ်ကော်မရှင်ရဲ့ ရွေးကောက်ပွဲပြီး တက်လာမယ့်အစိုးရသစ်မှာ သမ္မတဟာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သာဖြစ်နိုင်ပြီး ကာကွယ်ရေးဦးစီးချုပ်နေရာမှာတော့ လက်ရှိ ဒုချုပ်ပဲဖြစ်မလား၊ တခြားဂျူနီယာတွေပဲ ဖြစ်မလားဆိုတဲ့အပေါ် အမျိုးမျိုး သုံးသပ်မှုတွေ ရှိနေပါတယ်။

လက်ရှိမှာတော့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ အစိုးရသစ်မပေါ်ခင်ကာလကြားမှာ ဥပဒေအသစ်တွေကို ထုတ်ပြန်လျက် ရှိနေပါတယ်။