ကျောက်ဖြူ ကြတ္တိန်ရွာကို စကမ ထပ်မံ ဗုံးချ၊ ပြည်သူ ၃ဦး ဒဏ်ရာရ

အာရက္ခတိုင်းမ်စ် (၂၇ မတ် ၂၀၂၆)

ရက္ခိုပြည် ကျောက်ဖြူမြို့နယ် ကြတ္တိန်ရွာကို မတ်လ ၂၅ ရက် မနက်ပိုင်းတွင် စစ်ကော်မရှင်က ဒရုန်း (၂) စီးနဲ့ ထပ်မံ ဗုံးချတိုက်ခိုက်ခဲ့လို့ အရပ်သားပြည်သူ ၃ ဦး ဒဏ်ရာရရှိသွားတယ်လို့ ဒေသခံတွေထံမှ သိရပါတယ်။

မတ်လ ၂၅ ရက်က စစ်ကော်မရှင်ဟာ ဆူဆိုဒ်ဒရုန်း (၂) စီးနဲ့ ကျောက်ဖြူမြို့နယ် ကြတ္တိန်ရွာကို မနက် ၁၁ နာရီ ၂၅ မိနစ်တွင် (၁) ကြိမ်၊ ၁၁နာရီ ၃၅ မိနစ်တွင် (၁) ကြိမ်၊ နှစ်ကြိမ်တိုင်တိုင် ဗုံးချတိုက်ခိုက်ခဲ့တယ်လို့ သိရပါတယ်။

စစ်ကော်မရှင်ရဲ့ ဗုံးကြောင့် ဒဏ်ရာရရှိသွားသူတွေကတော့ ရက္ခိုင်ပြည် ကျောက်ဖြူမြို့နယ် ကြတ္တိန်ရွာနေ အသက် ၁၇ နှစ်အရွယ် မဖြူလှဝင်း၊ အသက် ၃၇ အရွယ် ဒေါ်မလုံး နဲ့ အသက် ၃၉ နှစ်အရွယ် ဦးမောင်မြအေးတို့ ဖြစ်ကြတယ်လို့ သိရပါတယ်။

အဆိုပါ စစ်ကော်မရှင်က ဗုံးချတိုက်ခိုက်ခဲ့လို့ မဖြူလှဝင်းမှာ ညာဖက်ပေါင်၊ ဒေါ်မလုံးမှာ ဘယ်ဖက်လက်နဲ့ ဦးမောင်မြအေးမှာ ညာဖက်ခြေသလုံးတို့တွင် ဗုံးစထိမှန်ပြီး ဒဏ်ရာရရှိခဲ့တယ်လို့ သိရပါတယ်။

အလားတူ စစ်ကော်မရှင်ရဲ့ ဗုံးကြောင့် ကြတ္တိန်ရွာက ဦးညွန့်သာရဲ့ နေအိမ် ၁ လုံး လည်း ဗုံးစထိမှန် ပျက်စီးသွားတယ်လို့ သိရပါတယ်။

စစ်ကော်မရှင်ဟာ ဖေဖော်ဝါရီလ ၁၇ ရက် ညနေပိုင်းကလည်း ကြတ္တိန်ရွာကို ဒရုန်းနဲ့ ဗုံး ၇ လုံး ကြဲချ တိုက်ခိုက်ခဲ့ပါသေးတယ်။

(ဓာတ်ပုံများ ပိုမိုကြည့်ရှုလိုပါက t.me/arakhatimes တွင် ကြည့်ရှုနိုင်ပါတယ်)
Photo – Arakan Princess Media