တောင်မော်ကြီးရေတပ်စခန်း ကျဖို့ ကာကင်းတခုသာကျန်ရှိ

အာရက္ခတိုင်းမ်စ် (၉ ဇွန် ၂၀၂၆)

ရက္ခိုင်ပြည် ကျောက်ဖြူမြို့နယ် တောင်မော်ကြီးရေတပ်စခန်း ကျဖို့ ကာကင်းစခန်း တခုသာ ကျန်ရှိတော့တယ်လို့ ရွေးတုအစိုးက အသိအမှတ်ပြု VOM သတင်းဌာနက ဝန်ခံ ရေးသားထားပါတယ်။

“တိုက်ပွဲက ကျောက်ဖြူဘက်မှာဆို လက်နက်ကြီး ပစ်ခတ်သံတွေ နေ့ရော၊ ညပါ ကြား‌နေရတာ။ ဆူညံနေတာ နေ့တိုင်းပဲ။ အခုရက်ပိုင်းထဲ အရင်ကထက်ပိုပြီး တိုက်ပွဲ ပြင်းထန်လာတယ်။ လေကြောင်းကလည်း တောက်လျှောက် လာနေတယ်။ AA က တောင်မော်ဦး ရေတပ်စခန်းကို သိမ်းဖို့ပြင်နေတာ။ အဲဒီရေတပ်စခန်းရဲ့ ကာကင်းတွေကို တခုပြီးတခု သိမ်းနေတာ။ အခုဆို တောင်မော်ဦးကို ရဖို့ ကာကင်းတခုပဲ ကျန်တော့တယ်” လို့ သတင်းရင်းမြစ်တယောက်က ပြောပါတယ် ဆိုပြီး VOM က ရေးသားထားတာလည်း ဖြစ်ပါတယ်။

တောင်မော်ကြီးရေတပ်စခန်းရဲ့ ကာကင်းစခန်းတွေဖြစ်တဲ့ စံပယ်ရှောင်ကုန်း၊‌ ဒွေးချကုန်း၊ မျှော်ချောင်းကုန်းနဲ့ ရေနံသူကုန်းတို့ကို AA က ပြီးခဲ့တဲ့ ရက်ပိုင်းအတွင်း တိုက်ခိုက် သိမ်းပိုက်ထားတာဖြစ်ပြီး လက်ရှိမှာ နောက်ဆုံးလက်ကျန်ဖြစ်တဲ့၊ စစ်ရေးအရ မဟာဗျူဟာကျတဲ့ ရွာဟောင်းတောင် ဗျူဟာကုန်းစခန်းကို ဆက်လက် ထိုးစစ်ဆင်နေတယ်လို့ သိရပါတယ်လို့လည်း VOM က ရေးသားထားပါတယ်။

ပြီးခဲ့တဲ့ ရက်ပိုင်းတွေမှာလည်း စစ်ရေးအရ ရှုံးနိမ့်နေတဲ့ ရွေးတုအစိုးရတပ်ဟာ တိုက်ပွဲနဲ့ သက်ဆိုင်တဲ့ နေရာအပါအဝင် တိုက်ပွဲနဲ့ မသက်ဆိုင်တဲ့ စစ်ဘေးရှောင်တွေ နေထိုင်နေတဲ့ နေရာတွေကို ဂျက်ဖိုက်တာတွေနဲ့ လေကြောင်း တိုက်ခိုက်တာ၊ စစ်သင်္ဘောတွေက လက်နက်ကြီးတွေနဲ့ ပစ်ခတ် တိုက်ခိုက်တာ စတာတွေကို ဆက်တိုက် လုပ်ဆောင်ခဲ့တယ်။

အဲဒီလို တိုက်ခိုက်မှုတွေ လုပ်ဆောင်ခဲ့တဲ့အတွက် ဇွန်လ ၆ ရက်မှာ စစ်ဘေးရှောင်တွေ နေထိုင်နေတဲ့ သစ်ကတိုးကျေးရွာကို လေကြောင်း ဗုံးကြဲခံခဲ့ရတဲ့ အတွက် စစ်ဘေးရှောင်ပြည်သူ ၃ ဦးဟာလည်း ရွေးတုအစိုးရတပ်ရဲ့ လက်ချက်ကြောင့် ဒဏ်ရာ ပြင်းပြင်းထန်ထန် ရရှိခဲ့တာလည်း ရှိပါတယ်။

Arakan Responders for Emergency – ARE ရဲ့ သတင်းထုတ်ပြန်ချက်အရ ဧပြီလ ၁ ရက်ကနေ မေလ ၃၁ ရက်အထိ နှစ်လအတွင်း မှာ ရွေးတုအစိုးရတပ်ရဲ့ လေကြောင်းအပါအဝင် လက်နက်ကြီး ပစ်ခတ် တိုက်ခိုက်မှုကြောင့် အရပ်သားပြည်သူ ၉ ဦး သေဆုံးမှု ရှိခဲ့ပြီးတော့ ဒဏ်ရာရရှိသူ ၄၈ ဦး ရှိခဲ့တယ်လို့ ဖော်ပြထားပါတယ်။