တောင်ကုတ်ကို AA သိမ်းပိုက်၊ စကခ ၅ ကို ဆက်လက် ထိုးစစ်ဆင်
အာရက္ခတိုင်းမ်စ် (၂၉ နိုဝင်ဘာ ၂၀၂၄)
ရက္ခိုင်ပြည် တောင်ကုတ်မြို့က အာရက္ခတပ်တော်မှ အလုံးစုံ သိမ်းပိုက်လိုက်ပြီး ကျန်ရှိနေသော စကခ (၅) ဌာနချုပ် နဲ့ စကခ (၅) လက်အောက်ခံ တပ်ရင်းဖြစ်တဲ့ ခမရ (၃၄၆) နဲ့ ခမရ (၅၄၄) တပ်ရင်းဌာနချုပ် စခန်းကို ဆက်လက် ထိုးစစ်ဆင်နေကြောင်း အာရက္ခတပ်တော်မှ သတင်းထုတ်ပြန်ခဲ့ပါတယ်။
“ နိုဝင်ဘာ ၄ ရက် မှ ၂၀ ရက်အတွင်း ၁၇ ရက်ကြာ ထိုးစစ်အပြီးတွင် သိမ်းပိုက်ရရှိခဲ့ပြီး တောင်ကုတ်မြို့တစ်ခုလုံးအား ၂၀၂၄ခုနှစ်၊ နိုဝင်ဘာ ၂၄ ရက်နေ့တွင် အလုံးစုံ ထိန်းချုပ်နိုင်ပြီ” လို့ အာရက္ခတပ်တော်က ဆိုပါတယ်။
အာရက္ခတပ်တော်မှ သိမ်းပိုက်ပြီးသော စစ်ကောင်စီရဲ့ စခန်းများမှာ တောင်ကုတ်တက္ကသိုလ် မောင်းတံဂိတ် နှင့် ရာဘာခြံရှိ စစ်ကောင်စီ စခန်းများ၊
တောင်ကုတ်တက္ကသိုလ်ကျောင်းဝင်းတစ်ခုလုံးအတွင်း စစ်ကောင်စီမှ အခိုင်အမာ စခန်းချနေထိုင်ခဲ့သော တက္ကသိုလ်ကျောင်းဆောင်များ၊
အာလိမ်ငါးဆင့်ဘုရားကုန်းတွင် တပ်စွဲထားသော စစ်ကောင်စီစခန်း၊ ဖုန်ညိုရွာ၊ ဘုန်းကြီးကျောင်းအနီး တောင်ကုန်း နှင့် ဖုန်ညိုတံတား အနီးပတ်ဝန်းကျင်တွင် တပ်စွဲထားသော စစ်ကောင်စီစခန်းများ၊ တောင်ကုတ်မြို့အဝင် စစ်ကောင်စီရဲ့ စကခ (၅) တပ်မဌာနချုပ် ဂိတ်စခန်း၊ တောင်ကုတ်မြို့၊ သိမ်တောင်ရပ်ကွက်၊ ဆုတောင်းပြည့်ဘုန်းကြီးကျောင်းဝင်းအတွင်းတွင် တပ်စွဲထားသော စစ်ကောင်စီစခန်း၊ ကြိုးကြာကွင်းဂိတ်ရှိ စစ်ကောင်စီစခန်း၊ ကိုင်းရှည်တံတားထိပ်ရှိ စစ်ကောင်စီစခန်း၊ သီရိဆေးရုံ၊ ဂုဏ်နေဒေါက်ကျင်းတွင် စခန်းချတပ်စွဲထားသော စစ်ကောင်စီ စခန်း နဲ့ တောင်ကုတ်မြို့အတွင်းရှိ တောင်ကုတ်မြိုမ ရဲစခန်း တို့ ဖြစ်ပါတယ်။
တောင်ကုတ်မြို့အခြေစိုက် အဓိကစခန်းကြီးများဖြစ်ကြတဲ့ စကခ (၅) တပ်မဌာနချုပ် နှင့် စကခ (၅) လက်အောက်ခံတပ်ရင်းများဖြစ်ကြသော ခမရ (၃၄၆) နှင့် ခမရ (၅၄၄) တပ်ရင်းဌာနချုပ် စခန်းများကိုလည်း တစ်ပြိုင်နက်တည်း ထိုးစစ်ဆင် တိုက်ခိုက်နေပြီလို့ အာရက္ခတပ်တော်က ဆိုပါတယ်။
တောင်ကုတ်မြို့တွင် ပိတ်မိနေသော အရပ်သားဒေသခံပြည်သူများကို အာရက္ခတပ်တော် က ကယ်ထုတ်ထားပြီး သူခိုးများ ကျန်ရှိနေသေးကြောင်းနဲ့ သူတို့မှာ တောင်ကုတ်မြို့ထဲက တန်ဖိုးရှိပစ္စည်းများကို ခိုးယူနေသဖြင့် အာရက္ခတပ်တော် က ဖမ်းဆီးအရေးယူနေကြောင်းလည်း ထုတ်ပြန်ချက်တွင် ပါရှိပါတယ်။
