လုံခြုံရေးကြောင့် ရသေ့တောင်မှာ မိုဘိုင်းဖုန်းတွေကို AA သိမ်း

အာရက္ခတိုင်းမ်စ် (၂၄ ဇန်နဝါရီ ၂၀၂၅)

သတင်းပေး အချက်အလက်တွေကြောင့် လုံခြုံရေး ပေါက်ကြားပြီး တည်နေရာ အတိအကျကို လေယာဉ်နဲ့ ဗုံးကြဲခံခဲ့ရတဲ့အတွက် လုံခြုံရေးအရ ရသေ့တောင်မြို့နယ်မှာ အာရက္ခတပ်တော်က အများပြည်သူ အသုံးပြုနေတဲ့ ဖုန်းတွေကို သိမ်းဆည်းနေတယ်လို့ သိရပါတယ်။

စစ်ကောင်စီက စစ်တွေမြို့နယ်ကလွဲပြီး ရက္ခိုင်ပြည်က မြို့နယ်တွေအားလုံးကို ဖုန်းလိုင်းနဲ့ အင်တာနက်လိုင်းတွေကို ဖြတ်ထားပေမယ့် ရသေ့တောင်မြို့နယ်မှာ ဘင်္ဂလားဒေ့ရှ်နိုင်ငံရဲ့ ဖုန်းကဒ်နဲ့ အင်တာနက် သုံးလို့ရနေတာလည်း ဖြစ်ပါတယ်။

ဒါ့ကြောင့် မြေပြင်က အနေအထားတွေ လုံခြုံရေးအရ သတင်းအချက်အလက် ပေါက်ကြားသွားနိုင်တာကြောင့် အာရက္ခတပ်တော်က ရသေ့တောင်မှာ မိုဘိုင်းဖုန်းတွေကို သိမ်းဆည်းနေတယ်လို့ ရက္ခိုင်ပြည် ဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“ ရသေ့တောင်ဘက်မှာလေ နယ်မြေလုံခြုံရေးအတွက် အများသုံးဖုန်းကို ပြန်သိမ်းတယ်။ ဖုန်းတွေကို သိမ်းတယ် AA က။ ဘာဖြစ်လို့ သိမ်းလဲဆိုတော့ အဲဒီရသေ့တောင်မှာ ဘင်္ဂလာကဒ်နဲ့ ဘင်္ဂလာလိုင်း သုံးလို့ရတယ် ဘင်္ဂလာဖုန်းကဒ်နဲ့။ ဘာလို့ သိမ်းရတဲ့ အကြောင်းပြချက်ကို ပြောရမယ်ဆိုရင် ပြောပြတာ။ သူတို့က အဲဒီမှာ ဘင်္ဂလာလိုင်းရတယ်။ ဘင်္ဂလာဖုန်းရတယ်။ အဲဒီဘင်္ဂလာကဒ်နဲ့ သူတို့ သုံးလို့ရတယ်။ သုံးလို့ရတော့ မြေပြင်အနေအထားအရ စိုးရိမ်လို့ ကျောက်တော်တို့၊ မြောက်ဦးတို့မှာ ပစ်တဲ့နေရာ location ထောက်ပြီးတော့ location အတိအကျ ရထားတဲ့အတွက် ရသေ့တောင်ဘက်လည်း စိုးရိမ်လို့ အဲဒီလိုမျိုး လုပ်တယ်လို့ အန်တီကတော့ ထင်တယ်” လို့ ပြောပါတယ်။

ပြီးခဲ့တဲ့ ဇန်နဝါရီ ၁၈ ရက်မှာ မြောက်ဦးမြို့နယ်က စစ်သုံ့ပန်းတွေထားရှိတဲ့ အချုပ်စခန်းကို စစ်ကောင်စီတပ်က လေကြောင်းကနေ ၃ ကြိမ် ဗုံးကြဲတိုက်ခိုက်ခဲ့တာကြောင့် ကလေးငယ်တွေနဲ့ အမျိုးသမီးတွေ အပါအဝင် ၂၈ ယောက် သေဆုံးပြီး ၂၅ ယောက်လည်း ဒဏ်ရာ ရခဲ့ပါတယ်။

ဒါ့အပြင် ဇန်နဝါရီ ၈ ရက်နေ့မှာလည်း ရမ်းဗြဲမြို့နယ်၊ ကျောက်နီမော်ရွာမှာ လေကြောင်းနဲ့ ဗုံးကြဲခံရလို့ ကလေးနဲ့ အမျိုးသမီးတွေအပါအဝင် ၅၀ ကျော် သေဆုံးခဲ့ပြီး နေအိမ် ၅၀၀ ဝန်းကျင် ပျက်စီးခဲ့ပါတယ်။

ပြီးခဲ့တဲ့ ၂၀၂၄ ခုနှစ်၊ စက်တင်ဘာလကလည်း ရက္ခိုင်ပြည် ပေါက်တောမြို့နယ်အတွင်းက AA ရဲ့ အကျဉ်းစခန်းနဲ့ ဆေးရုံနေရာတွေကို စစ်ကောင်စီတပ်က လေကြောင်းကနေ ဗုံးကြဲခဲ့တာကြောင့် စစ်သုံ့ပန်း ၅၀ ကျော် သေဆုံးခဲ့ပါသေးတယ်။

အဲဒီလေကြောင်းနဲ့ ဗုံးကြဲခံရတဲ့ဖြစ်စဉ်တွေကို ကြည့်မယ်ဆိုရင် စစ်ကောင်စီတပ်က တည်နေရာ အတိအကျရလို့ ဖြစ်နိုင်ကြောင်း၊ ဒါကြောင့် နယ်မြေလုံခြုံရေးအရ အာရက္ခတပ်တော်က အများသုံးနေတဲ့ မိုဘိုင်းဖုန်းတွေကို သိမ်းဆည်းတာ ဖြစ်နိုင်တယ်လို့ ရခိုင်ဒီမိုကရေစီအဖွဲ့ချုပ် (ALD) မှ ပြောရေးဆိုခွင့်ရှိသူ ဦးမျိုးကျော်က အာရက္ခတိုင်းမ်စ်ကို ပြောပါတယ်။

“ အဲဒီကိစ္စက ကျနော်တို့ သိပ်ပြောလို့ မရဘူးဗျ။ မရဘူးဆိုတာက လုံခြုံရေးဒေသမှာ ဖြစ်နေတဲ့ဟာလေ။ ဒီရက်ပိုင်းမှာ ပြီးခဲ့တဲ့လက အကြောင်းတွေရော၊ ပြီးရင် ကျောက်တော်၊ မြောက်ဦး စသည်ဖြင့်လေ လေယာဉ်နဲ့ လာပစ်တဲ့ဟာကလည်း ဆက်တိုက်ဆက်တိုက်ပဲ။ ပြီးတော့ သူတို့ မြေပြင်သဘောသဘာဝအရတော့ မြေပြင်မှာ သူတို့ AA/ULA ရဲ့ အုပ်ချုပ်ရေးမှာ သူတို့ ဘယ်လောက် အဟန့်အတားဖြစ်လဲ။ သူတို့အတွက် ဘယ်လောက်အထိ လုံခြုံရေးကို ကာဗာလုပ်လဲဆိုတဲ့ဟာက စကားပြောပါလိမ့်မယ်။ တချို့တချို့တွေမှာတော့ လာပြီးပစ်လိုက်၊ ပစ်ခတ်လာတဲ့ဟာတွေကလည်း တကယ့်ကို မြေပြင်သတင်း အတိအကျရတယ်ဆိုတဲ့ ပုံစံမျိုး ဖြစ်တယ်ပေါ့နော် သူတို့ရဲ့ ပစ်မှတ်ထိတာ။ အဲဒါကြောင့်ပဲ သိမ်းတယ်လို့ ထင်တယ်။ အခုက တော်လှန်ရေး စစ်ဆင်ရေးကာလဆိုတဲ့အခါမှာ ကျနော်တို့ကတော့ လုံခြုံရေးနဲ့ ပတ်သက်လို့ ပြောဖို့က ခက်ပါတယ်” လို့ ပြောပါတယ်။

အာရက္ခတပ်တော်က ထိုးစစ်ဆင် တိုက်ခိုက်သိမ်းပိုက်ပြီး ထိန်းချုပ်ထားတဲ့ ရက္ခိုင်ပြည်ရဲ့ မြို့နယ် ၁၇ မြို့နယ်ထဲက ၁၄ မြို့နယ်ကို စစ်ကောင်စီက လေကြောင်းကနေ လာရောက်ဗုံးကြဲနေတာကြောင့် အရပ်သားပြည်သူတွေ ထိခိုက်သေဆုံးမှု အများအပြား ရှိနေတယ်လို့ သိရပါတယ်။