ဂွမြို့နယ်တွင် စစ်ကျန်လက်နက် ဆော့ကစားလို့ သေဆုံး၊ ထိခိုက်သူ စာရင်း

အာရက္ခတိုင်းမ်စ် (၅ ဖေဖော်ဝါရီ ၂၀၂၅)

ရက္ခိုင်ပြည် ဂွမြို့နယ် တိုင်ကျိုးကျေးရွာတွင် ဖေဖော်ဝါရီ ၃ ရက်က စစ်ကျန်လက်နက်ကို ဆော့ကစားမိရာကနေ ပေါက်ကွဲသဖြင့် ၃ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ စစ်ဘေးရှောင်ကူညီရေးပူးပေါင်းအဖွဲ့ဂွမြို့နယ် က အာရက္ခတိုင်းမ်စ်ကို ပြောပါတယ်။

“ကလေးတွေက ဆော့စရာထင်ပြီး ဆုံ နဲ့ ထောင်းတာမှာ ပေါက်ကွဲပြီးတော့ ၃ ယောက် ဆုံးသွားပါတယ်။ ၂ ယောက် ဒဏ်ရာရသွားပါတယ်” လို့ ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့ က ကိုနိုင်အောင်လင်းက ပြောပါတယ်။

အဆိုပါ သေဆုံးသွားတဲ့ ၃ ဦးမှာ အသက် ၁၁ နှစ် အရွယ် မောင်အောင်မြတ်ကျော် (ဘ-ဦးဂွတို)၊ အသက် ၁၆ နှစ် အရွယ် မငယ်ငယ် (ဘ-ဦးဂွတို) နဲ့ အသက် ၃၂ အရွယ် ဦးဂွတို (ဘ-ဦးလုံးတုံး) တို့ဖြစ်ပြီး ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့ က ပို့ဆောင် သင်္ဂြိုလ်ပေးခဲ့တယ်လို့ သိရပါတယ်။

ဒဏ်ရာရရှိသူများမှာ အရွယ်မရောက်သေးတဲ့ ကလေးသူငယ် အသက် ၁ နှစ် အရွယ် မမီးလေး နဲ့ အသက် ၅ နှစ် အရွယ် မဆောင်းနှင်းဖြူ တို့ ဖြစ်တယ်လို့ သိရပါတယ်။

အလားတူ ဇန်နဝါရီလ ၁၈ရက်ကလည်း စစ်ကျန်လက်နက် ဆော့ကစားမိလို့ ဂွမြို့နယ် ကမ်းသာယာကမ်းခြေအနီး ကင်းပုံကျေးရွာက ကလေးငယ် ၁ ဦး သေဆုံးခဲ့ပါတယ်။

ဂွမြို့နယ်စစ်ပွဲကာလအတွင်း စစ်ကျန်လက်နက်ပစ္စည်းကြောင့် ထိခိုက်သေဆုံးသူ ကလေးသူငယ် (၂) ဦး နဲ့ လူကြီး (၂) ဦး စုစုပေါင်း (၄) ဦး ထိခိုက်ဒဏ်ရာရရှိသူ (၃) ထိ ရှိလာပြီဖြစ်တယ်လို့ ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့က ပြောပါတယ်။

စစ်ကောင်စီမှ စစ်ရေးရှုံးနိမ့်သဖြင့် ဆုတ်ခွာသွားချိန်တွင် ဂွခရိုင်အတွင်းတွင် မြေမြှုပ်မိုင်း အများအပြား မြှုပ်နှံခဲ့ပြီး ကျိန္တလီမြို့နယ်တွင် သူ့တို့ကိုယ်တိုင် မြှုပ်နှံထားတဲ့လို့ ထုတ်ဖော်ပြောဆိုခဲ့ပါတယ်။

မြေမြှုပ်မိုင်းနဲ့ စစ်ကျန်လက်နက်ပစ္စည်းများတွင် သက်တမ်းကုန်ဆုံးရက်မရှိပါ။ ထိုလက်နက်အစ္စည်းများ ပေါက်ကွဲမှုကြောင့် ခြေလက်တို့ ဆုံးရှုံးခြင်း၊ နား၊ မျက်စိများ ကန်းသွားနိုင်ခြင်းနဲ့ ဒဏ်ရာအလွန်ပြင်းထန်ပါက အသက်သေဆုံးခြင်းအထိပါ ဖြစ်နိုင်တယ်လို့ unicef က အသိပေးထားပါတယ်။

ပေါက်ကွဲလက်နက်ပစ္စည်းတွေဟာ အချိန်မခါမရွေး ပေါက်ကွဲဖို့အတွက် အဆင်သင့်ဖြစ်နေတာမို့ မိမိ မသိ၊ မမှတ်မိနိုင်သော ပစ္စည်းတစ်စုံတစ်ရာကို တွေ့ရှိပါက မချဉ်းကပ်ပါနဲ့။ မထိပါနဲ့။ မကိုင်ပါနဲ့။ နေရာမရွှေ့ပါနဲ့။ မီးမရှို့ပါနဲ့။ တစ်ခုခုနဲ့ ထုရိုက်တာမျိုး၊ ပစ်ပေါက်တာမျိုးလည်း လုံးဝမပြုလုပ်ပါနဲ့။ တွေ့ရှိပါက နီးစပ်ရာ တာဝန်ရှိသူများထံ အကြောင်းကြားပါ။ လို့လည်း unicef က တိုက်တွန်းထားပါတယ်။