ကျောင်းသား ၅၀ သေဆုံးနိုင်တဲ့ ဒီပဲယင်းမြို့နယ်ကို စစ်ကောင်စီရဲ့ လေကြောင်းဗုံးကြဲမှု

အာရက္ခတိုင်းမ်စ် (၁၂ မေ ၂၀၂၅)

စစ်ကိုင်းတိုင်း၊ ဒီပဲယင်းမြို့နယ်၊ အိုးထိန်းတွင်းကျေးရွာ စာသင်ကျောင်းကို စစ်တပ်က လေယာဉ်နဲ့ ဗုံးကြဲချခဲ့တာကြောင့် ဆရာ၊ ဆရာမ ၂ ဦးနဲ့ ကလေး ၁၀ ယောက် အပါအဝင် ကျောင်းသားကျောင်းသူ ၅၀ ဝန်းကျင် ထိခိုက်သေဆုံးနိုင်တယ်လို့ ဒီပဲယင်းမြို့နယ်က ကူညီကယ်ဆယ်ရေးလုပ်ဆောင်သူတွေထံကနေတဆင့် သိရပါတယ်။

ဒီနေ့ မေလ ၁၂ ရက် မနက် ၉ နာရီ ၅၅ မိနစ်ဝန်းကျင်အချိန်မှာ ဒီပဲယင်းမြို့နယ်၊ အိုးထိန်းတွင်းရွာ​ စာသင်ကျောင်းကို စစ်တပ်က လေယာဉ်နဲ့ ဗုံးကြဲမှုကြောင့် လတ်တလောမှာ ကျောင်းတက်နေတဲ့ ကလေး ၁၀ ယောက်နဲ့ ဆရာ၊ ဆရာမ ၂ ယောက်အပါအဝင် ရုပ်အလောင်း ၁၃ လောင်း အတည်ပြုထားနိုင်ပြီး ကူညီကယ်ဆယ်ရေးတွေ ဆက်လက်လုပ်ဆောင်နေလျက် ရှိပါတယ်။

အဆိုပါ အိုးထိန်းတွင်းကျေးရွာရှိ စာသင်​ကျောင်းက အမျိုးသားညီညွတ်ရေးအစိုးရ(NUG)ရဲ့ ကြားကာလပညာရေးကျောင်းဖြစ်တယ်လို့လည်း သိရပါတယ်။

အဲဒီစာသင်ကျောင်းကို စစ်ကောင်စီက ‌အကြောင်းမဲ့ လေကြောင်းတိုက်ခိုက်ခဲ့တာဖြစ်ပြီး ထိခိုက်ဒဏ်ရာရရှိမှု အသေးစိတ်အခြေအနေတွေကို ဆက်လက်စုံစမ်းနေတယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ကလည်း အသိပေးထုတ်ပြန်ထားပါတယ်။

ဒီပဲယင်းမြို့နယ် အိုးထိန်းတွင်းရွာ လေကြောင်းတိုက်ခိုက်မှုဟာ စစ်ကိုင်းတိုင်းအတွင်း ဒုတိယမြောက်ကလေးသူငယ်သေဆုံးမှုအများဆုံးတိုက်ခိုက်မှုအဖြစ်မှတ်တမ်းဝင်ခဲ့ပြီး စစ်ကောင်စီဟာ ဒီနေ့ ၁ ရက်အတွင်းမှာပဲ စစ်ကိုင်းတိုင်းကို လေကြောင်းတိုက်ခိုက်မှု ၃ ကြိမ်ထက်မနည်းပြုလုပ်ခဲ့ပြီး အားလုံးဟာ စာသင်ကျောင်း၊ ဆေးခန်း စတဲ့ အရပ်သားပစ်မှတ်တွေချည်းဖြစ်ခဲ့ပါတယ်။

အကြမ်းဖက်စစ်ကောင်စီက မေလ ၆ ရက်နေ့မှ မေလ ၃၁ ရက်နေ့အထိ အပစ်အခတ်ရပ်စဲရေး ကြေညာထားပေမယ့်လည်း နိုင်ငံတစ်ဝန်းမှာ လေယာဉ်နဲ့ ဗုံးကျဲတိုက်ခိုက်တာ၊ လက်နက်ကြီးတွေနဲ့ ပစ်ခတ်တာ၊ အဆိပ်ငွေ့ဗုံးတွေ ကြဲ​ပြီး ထိုးစစ်ဆင်တာတွေကို လုပ်ဆောင်လျက်ရှိပါတယ်။

ဓာတ်ပုံများကို t.me/arakhatimes တွင် ကြည့်ရှုနိုင်ပါတယ်