အာရက္ခအားမာန် ရဲဘော်ကျော်ဟန်

တန်ဖိုးအရှိဆုံး ရေတကျိတ်

(အာရက္ခတပ်တော် ဗိုလ်မှူးကြီး ကျော်ဟန်၏ ဘဝပုံရိပ်များ – ၇ )

****

(ဌေးဝင်း)

နောက်နေ့ မိုးလင်းတော့ ငါက အိမ်သာ တက်ချင်တယ် ပြောလို့ သူတို့ ငါ့ကို အိမ်သာကို လိုက်ပို့တယ်။ အိမ်သာထဲမှာ ရေများ သောက်ရလေမလားဆိုတဲ့ စိတ်ကူးနဲ့ ပေါ့လေ။

သူတို့က မေးသေးတယ်။ မင်းက ထမင်းလည်း မစားရ.. ရေလည်း မသောက်ရဘဲနဲ့ ဘာလို့ အိမ်သာတက်ချင်တာလဲတဲ့။ ငါကလည်း တကယ် တက်ချင်လို့ ပါလို့ ပြန်ပြောတယ်။

အိမ်သာထဲရောက်တော့ ရေအိုးကလေး တလုံး တွေ့တယ်။ ဒါပေမဲ့ ရေတစက်မှ မရှိဘူး။ သူတို့လည်း ငါ့အကြံကို သိပုံရတယ်။ ငါဟာ အိမ်သာထဲက ရေကို သောက်ဖို့ ကြံစည်နေတယ် ဆိုတာကိုလေ။

အိမ်သာထဲမှာ ငါ သေးကို ညှစ်ပြီး ကြိုးစားပေါက်ကြည့်တယ်။ နည်းနည်းတော့ ထွက်တယ်။ ငါ့သေးတွေဟာ သွေးပုတ်လိုဘဲ နီညိုရောင် အရည်ပျစ်ပျစ်နဲ့ ဖြစ်နေတယ်။

ငါ အိမ်သာထဲက ပြန်ထွက်လာတော့ တပ်ကြပ်ကြီး လှမြင့်က

“မင်း အိမ်သာ ဘာလို့ တက်ချင်တယ်ဆိုတာကို ငါသိတယ် ဟေ့ကောင်။ မင်း ရေများ သောက်ရမလားဆိုပြီး တက်တာ မဟုတ်လား။ သောက်ကော သောက်ခဲ့ရသလား”

လို့ သရော်ပြုံး လှောင်ပြုံး ပြုံးပြီး ခနဲ့တယ်။ ပြီး သူ့လက်ထဲက တုတ်နဲ့ ငါ့ကျောကုန်းကို တချက် ခပ်ပြင်းပြင်း ရိုက်လိုက်သေးတယ်။

မနက် ကိုးနာရီလောက်မှာတော့ တပ်မှူး ခင်မောင်အေး ငါ့ကို လာစစ်တယ်။

ငါဟာ အဖမ်းခံရတဲ့ နေ့က ကိုယ်မှာပါလာတဲ့ အင်္ကျီနဲ့ လုံချည်နဲ့ဘဲ နေရတာ။ သူတို့ နှိပ်စက်မှု မျိုးစုံကို လူဟာ စိစိညက်ညက်ကြေအောင် ခံထားရသလို အဝတ်အစားတွေကလည်း ချွေးတွေပေ သွေးတွေစွန်းလို့ နံစော်ပြီး ညစ်ပတ် စုတ်ပြတ်နေပြီ။ ဒါကြောင့် ခင်မောင်အေးက သူ့တပည့်တွေကို

“ဟေ့ကောင်တွေ ဒီကောင့်ကို သန့်ရှင်းရေး လုပ်ပေးလိုက်”

လို့ အမိန့်ပေးတယ်။

အဲဒီနောက် တပ်ကြပ်ကြီး လှမြင့်ရယ် တပ်သား လှမိုးနဲ့ အခြားတစ်ယောက်ဟာ ငါ့ကို ရေချိုးတဲ့ အုတ်ကန်နားကို ခေါ်သွားပြီး ကိုယ်လက် သန့်စင်ပေးကြတယ်။ ရေချိုးပေးတဲ့ သဘောပေါ့။

ငါလည်း ရေကိုလည်း မြင်ရော သောက်ချင်စိတ်ကို ဘယ်လိုမှ တားလို့မရတော့ဘူး။ ဒါကြောင့် ငါဟာ ခါးလောက်မြင့်တဲ့ ရေကန်ပေါင်နားကို ကပ်ပြီး ရေထဲကို ခေါင်းကို တအားထိုးနှစ်လိုက်ပြီး ရေတကျိတ် ဝအောင် သောက်ချလိုက်တယ်။

ငါ အဲသလို ရေကို အငမ်းမရ ခေါင်းထိုးနှစ်ပြီး သောက်နေတုန်းမှာ ကြောကုန်းကို ဘုန်းကနဲ လက်ဝါးနဲ့ ရိုက်ချတာကို ခံလိုက်ရတယ်။

ပြီးတော့ လှမိုးက ငါ့ ခေါင်းကို အမြန် ရေထဲက ဆွဲဖော်ယူလိုက်တဲ့အချိန်မှာ အနားမှာရှိနေတဲ့ လှမြင့်က ပါးနှစ်ဘက်ကို ဘယ်ပြန် ညာပြန် ရိုက်ပြီးမှ

“ ငါလိုးမသား.. မအေလိုး. ရေခိုးသောက်တယ်။ ငါတို့ မင်းကို ရေတိုက်ဖို့ ခေါ်လာတာ မဟုတ်ဘူး။ သန့်ရှင်းရေး လုပ်ဖို့ ခေါ်လာတာ”

လို့ ရိုက်ပုတ် ဆဲဆိုရင်း ပြောသေးတယ်။

ဘာဘဲဖြစ်ဖြစ် ငါ ရေတကျိတ် ကောင်းကောင်း သောက်လိုက်ရတယ်။

အားရပါးရ မျက်နှာကို နှစ်ပြီး သောက်ချလိုက်တာ။ အဲဒီ ရေတကျိတ်ဟာ ဘဝမှာ အရသာ အရှိဆုံး တန်ဖိုးအရှိဆုံး ရေပါဘဲ။ အသတ် အပုတ်ခံ အနှိပ်စက် ခံနေရတဲ့ကြားက ခက်ခက်ခဲခဲ သောက်ခွင့်ရခဲ့တဲ့ ရေ။

သူတို့ ငါ့ကို သန့်ရှင်းရေး လုပ်ပြီးနောက် ပြန်ခေါ်လာကြတယ်။

အဲဒီနေ့မှာ အိမ်က ငါ့အတွက် လာပို့ထားတဲ့ အဝတ်အစားတွေကို ထုတ်ပေးတယ်။ ဒီအထဲမှာ ကုလားတရုပ်လို့ ခေါ်တဲ့ ခန္ဓာကိုယ် အတွင်းပိုင်းက ဒဏ်တွေကို သက်သာပျောက်ကင်းစေတဲ့ ဆေတွေနဲ့ အခြား ဒဏ်ကြေ လိမ်းဆေးတွလည်း ပါတယ်။ ဒါပေမဲ့ အဲဒါတွေကိုတော့ သူတို့ ငါ့ကို ထုတ်မပေးဘူး။ သုံးရက်မြောက်တဲ့နေ့မှာ အင်္ကျီနဲ့ လုံချည် လဲခွင့်ရတယ်။

အပိုင်း (၁) https://www.facebook.com/share/p/1CWxiK8gSn

အပိုင်း (၂) https://www.facebook.com/photo/?fbid=122168731622561727&set=a.122094637034561727

အပိုင်း (၃) https://www.facebook.com/photo/?fbid=122169819260561727&set=a.122094637034561727

အပိုင်း (၄) https://www.facebook.com/photo/?fbid=122170916168561727&set=a.122094637034561727

အပိုင်း (၅) https://arakhatimes.com/articels_mm/24984/

အပိုင်း (၆) https://www.facebook.com/share/p/16Z3A48Rk4/ တွင် ဖတ်ရှုနိုင်ပါတယ်။