မောင်တောတွင် မိုင်းနင်းမိလို့ အမျိုးသားတဦး ပြင်းထန်ဒဏ်ရာရ

အာရက္ခတိုင်းမ်စ် (၁၂ ဇန်နဝါရီ ၂၀၂၆)

ရက္ခိုင်ပြည်၊ မောင်တောမြို့နယ်တွင် မိုင်းနင်းမိလို့ အသက် ၃၀ အရွယ် မြို အမျိုးသားတဦး ပြင်းထန်ဒဏ်ရာရရှိသွားတယ်လို့ သိရပါတယ်။

ဒဏ်ရာရရှိသွားသူမှာ ဘူးသီးတောင်မြို့နယ်၊ တောင်ဘာဇာကျေးရွာနေ အသက် ၃၀ အရွယ် ဦးမောင်မောင်စိုး ဖြစ်ပါတယ်။

ဇန်နဝါရီလ ၁၀ ရက် ညနေ ၃ နာရီကျော်တွင် ဦးမောင်မောင်စိုးဟာ တဲဆောက်ရန် သစ်သွားခုတ်ပြီး ပြန်လာစဉ် မိုင်တိုင် (၅၀) အနီး နွားဈေးဟောင်းတွင် မိုင်းနင်းမိလို့ ဘယ်ဘက်ခြေမျက်စိတွင် အပြင်းအထန် ဒဏ်ရာရရှိသွားခဲ့တာလည်း ဖြစ်ပါတယ်။

“ ဘော်တူလာဈေးမှာ တဲဆောက်ဖို့အတွက် နွားဈေးဟောင်း မိုင်တိုင် ၅၀ ဂိတ်ကုန်းနားမှာ သစ်ခုတ်ပြီး ပြန်လာတာမှာ မိုင်းနင်းမိပြီး ဘယ်ဖက် ခြေမျက်စိအထက်က ပြတ်သွားတယ်” လို့ မောင်တောမြို့ဒေသခံတဦးက အာရက္ခတိုင်းမ်စ်ကို ပြောပါတယ်။

ရက္ခိုင်ပြည်တွင် စစ်ရေးအရ ရှုံးနိမ့်သွားတဲ့ စစ်ကော်မရှင်ဟာ သူစွန့်ခွာသွားတဲ့ နယ်မြေတွေမှာ မြေမြှုပ်မိုင်းများစွာ မြှုပ်နှံထားခဲ့ပြီး အာရက္ခတပ်တော်အနေနဲ့ မိုင်းရှင်းလင်းရေးနဲ့ မိုင်းအန္တရာယ် အသိပညာပေးများ လုပ်ဆောင်နေတယ်လို့ သိရပါတယ်။