ကျောက်တော်တွင် အသင်းတော် ၅ သင်း စုပေါင်းပြီး အီစတာပွဲတော် (ရှင်ပြန်ထမြောက်ပွဲ) ကျင်းပ

အာရက္ခတိုင်းမ်စ် (၈ ဧပြီ ၂၀၂၆)

ရက္ခိုင်ပြည် ကျောက်တော်မြို့နယ်တွင် ကျေးရွာ ၅ ရွာက အသင်းတော် ၅ သင်း စုပေါင်းပြီး အီစတာပွဲတော် (ရှင်ပြန်ထမြောက်ပွဲ) ကို ဧပြီလ ၇ ရက်က ကျင်းပပြုလုပ်ခဲ့တယ်လို့ သိရပါတယ်။

“ ကျောက်တော်မြို့နယ်အတွင်းက ခရစ်ယန်ဘာသာဝင်တွေ ရှိတဲ့ ကျေးရွာ ၅ ရွာက အသင်းတော် ၅ သင်း စုပေါင်းပြီး ကျင်းပတာပါ။ အီစတာပွဲတော် မလုပ်ဖြစ်တာ ၅ နှစ်ရှိသွားပြီ။ ဒီနှစ်မှ ပြန်လုပ်ဖြစ်တာပါ” လို့ ကျောက်တော်မြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။

အဆိုပါ အီစတာပွဲတော်ကို အာရက္ခတပ်တော် (ULA/AA) က တာဝန်ရှိသူတွေ တက်ရောက်ဂုဏ်ပြုခဲ့ကြပြီး ပွဲတော်အောင်မြင်စွာ ကျင်းပနိုင်ရေးအတွက် လိုအပ်တဲ့ ငွေကြေးတွေကိုလည်း ထောက်ပံ့ပေးခဲ့တယ်လို့ သိရပါတယ်။

ပွဲတော်တွင် သင်းအုပ်ဆရာ ၆ ယောက်နဲ့ သမ္မာကျမ်းစာဝေငှသူ ၁ ယောက် တက်ရောက်ခဲ့ပြီး ဆုတောင်းမေတ္တာပို့သခြင်း၊ ကျမ်းစာဝေငှခြင်းတွေ ပြုလုပ်ခဲ့ကာ ခရစ်ယာန်ဘာသာဝင် လူ​ငယ်တွေအနေနဲ့လည်း ခရစ်တော်ကို ဂုဏ်ပြုတဲ့ ဓမ္မတေးသီချင်းတွေ၊ တေးသရုပ်ဖော်အကတွေနဲ့ ဖျော်ဖြေခဲ့ကြတယ်လို့ သိရပါတယ်။

ခရစ်တော်ရှင် ပြန်ထမြောက်ခြင်း အီစတာပွဲတော်ကို ကမ္ဘာတဝန်းမှာရှိတဲ့ ခရစ်ယာန်ဘာသာဝင်တွေက အထွက်အမြတ်ထားရာ နေ့ထူးနေ့မြတ်ဖြစ်လို့ နှစ်စဉ် ဧပြီလရောက်တိုင်း အလေးအနက်ထား ကျင်းပပြုလုပ်လေ့ ရှိတယ်လို့လည်း သိရပါတယ်။