အာရက္ခတိုင်းမ်စ် (၉ မေ ၂၀၂၆)
အာရက္ခတပ်တော်၊ ပူးပေါင်းမဟာမိတ်တပ်တို့နဲ့ စစ်ကော်မရှင်တို့ တိုက်ပွဲတွေ ဖြစ်ပွားနေတဲ့ ဧရာဝတီတိုင်းက အမှတ်စဉ် ၁ က စစ်မှုထမ်းတပ်သားသစ် ၉၀၀ နီးပါး ပျောက်ဆုံးနေတယ်လို့ သိရပါတယ်။
“ စစ်မှုထမ်းဥပဒေနဲ့ ပထမဆုံးအကြိမ် အတင်းအဓမ္မ ခေါ်ယူခံခဲ့ရတဲ့ လူငယ် ၉၀၀ ခန့်အနက် ၃ ဦးသာ နေရပ် ပြန်ရောက်ရှိသေးပြီး ကျန် ၈၉၇ ဦးမှာ ယနေ့တိုင် ပျောက်ဆုံးနေလို့ မိသားစုဝင်တွေ ထိတ်လန့် စိုးရိမ်နေကြတယ်” လို့ သတင်းအထူးတပ်ဖွဲ့-ပုသိမ်က ဆိုပါတယ်။
၂၀၂၄ ခုနှစ်၊ ဧပြီလက စတင်ကာ အသက် ၁၈ နှစ်ကနေ ၃၅ နှစ်အတွင်းရှိ လူငယ်များကို စစ်မှုထမ်းဥပဒေအရဟုဆိုကာ တပတ်စဉ်လျှင် မြို့နယ် ၂၆ မြို့နယ်မှ လူငယ် ၉၀၀ ခန့်ကို တပ်အင်အားဖြည့်တင်းရန် ခေါ်ယူခဲ့တာလည်း ဖြစ်ပါတယ်။
“ လက်ရှိတွင် အပတ်စဉ် ၁ က လူငယ်များအနက် ဝါးခယ်မမြို့နယ်က ၁ ဦး၊ ကန်ကြီးထောင့်မြို့နယ်က ၁ ဦး၊ ပုသိမ်မြို့နယ်က ၁ဦး စုစုပေါင်း ၃ ဦးသာ မိသားစုထံ ပြန်လည်ရောက်ရှိလာပြီး ကျန်တဲ့ လူငယ်တွေ ဘယ်နေရာကို ရောက်ရှိနေလဲ မသိရဘူး ဖြစ်နေတယ်” လို့လည်း သတင်းအထူးတပ်ဖွဲ့-ပုသိမ်က ဆိုပါတယ်။
လက်ရှိတွင် စစ်မှုထမ်းအပတ်စဉ် (၂၄) အထိ ရောက်ရှိနေပြီး ဧရာဝတီတိုင်းအတွင်းရှိ မြို့နယ်တခုလျှင် လူငယ် ၂၈ ဦးကနေ ၃၁ ဦးအထိ ပေးနေရဆဲဖြစ်တယ်လို့လည်း သိရပါတယ်။
အဆိုပါ စစ်မှုထမ်း သင်တန်းသားများကို ဧရာဝတီတိုင်း ပုသိမ်မြို့အခြေစိုက် အနောက်တောင်တိုင်းစစ်ဌာနချုပ် (နတခ) တွင် သင်တန်းပေးပြီး သင်တန်းဆင်းပါက စစ်မျက်နှာပြင်ကို တိုက်ရိုက်ပို့ဆောင်နေတယ်လို့လည်း သိရပါတယ်။
