အာရက္ခတိုင်းမ်စ် (၁၈ ဇွန် ၂၀၂၆)
အာရက္ခတပ်တော်နဲ့ ရွေးတုအစိုးရတို့ ထိရောက်တဲ့ ဆွေးနွေးမှုများ ပေါ်ပေါက်လာစေရန် ကြိုးပမ်းနေတယ်လို့ ဘင်္ဂလားဒေ့ရှ် နိုင်ငံခြားရေးဝန်ကြီး ခါလီလူရ် ရဟ်မန် (Khalilur Rahman) က ဇွန်လ ၁၇ ရက်တွင် ပြောခဲ့ပါတယ်။
အဆိုပါ စကားကို ဘင်္ဂလားဒေ့ရှ်လွှတ်တော်တွင် စစ်တကောင်း အမှတ် (၁၅) လွှတ်တော်အမတ် ရှာဂျာဟန် ချောင်ဒရီ (Shahjahan Chowdhury) က ဘင်္ဂလား – ရက္ခိုင်နယ်စပ်အရေးနဲ့ ဒုက္ခသည်အရေးကိစ္စတွေကို မေးမြန်းတာမှာ ပြန်လည် ဖြေကြားခဲ့တာလည်း ဖြစ်ပါတယ်။
ဘင်္ဂလားဒေ့ရှ် နိုင်ငံခြားရေးဝန်ကြီး ခါလီလူရ် ရဟ်မန်က ဒုက္ခသည် ပြန်ပို့ရေးဟာ ရက္ခိုင်ပြည်ရဲ့ လုံခြုံရေး၊ တည်ငြိမ်ရေးတို့နဲ့ သက်ဆိုင်နေပြီး ရက္ခိုင်ပြည်အတွင်း တည်ငြိမ်တဲ့ ပတ်ဝန်းကျင်တစ်ခု ဖန်တီးနိုင်ရေးအတွက် မြန်မာအာဏာပိုင်တွေနဲ့ အာရက္ခတပ်တော် အကြား ထိရောက်တဲ့ ဆွေးနွေးမှုတွေ ပေါ်ပေါက်လာစေဖို့ ဘင်္ဂလားဒေ့ရှ် အစိုးရက ကြိုးပမ်းဆောင်ရွက်နေတယ်လို့ ဖြေကားခဲ့ကြောင်း ဒေးလီးစတားသတင်းဌာနက ဖော်ပြထားပါတယ်။
အလားတူ ဘင်္ဂလားဒေ့ရှ်မှာ ရောက်ရှိနေတဲ့ မွတ်ဆလင်ဒုက္ခသည်တွေ နေရပ်ပြန်ပို့ရေးနဲ့ ကျယ်ပြန့်လှတဲ့ အကျပ်အတည်းတွေကို ဖြေရှင်းနိုင်ရေးတို့ဟာ ရက္ခိုင်ပြည်ရဲ့ လုံခြုံရေး အခြေအနေပေါ်မှာ အဓိက တည်နေတယ်လို့လည်း သူက ဆိုပါတယ်။
ဘင်္ဂလားဒေ့ရှ် နိုင်ငံခြားရေးဝန်ကြီး ခါလီလူရ် ရဟ်မန်က ဒုက္ခသည်တွေ နေရပ်ပြန်ပို့ရေးကိစ္စဟာ ထိရှလွယ် ရှုပ်ထွေးနေတဲ့ နိုင်ငံတကာ အရေးကိစ္စတစ်ခုလည်း ဖြစ်ပြီး ရက္ခိုင်ပြည်ရဲ့ လုံခြုံရေးအခြေအနေ နိုင်ငံတကာရဲ့ ဖိအားပေးမှုနဲ့ မြန်မာအစိုးရရဲ့ သဘောထားအပေါ် မှာ မူတည်နေတယ်လို့လည်း ပြောဆိုခဲ့ပါတယ်။
44 comments