အာရက္ခတိုင်းမ်စ် (၂၀ ဇွန် ၂၀၂၆)
ပဲခူးတိုင်း ပန်းတောင်းမြို့နယ် ညောင်ကျိုးစခန်းကို ထိုးစစ်ဆင်လာတဲ့ ရွေးတုအစိုးရတပ်ကို လေလာတောင်ကြောတွင် အာရက္ခတပ်တော်နဲ့ ပူးပေါင်းမဟာမိတ်တပ်တို့ရဲ့ တိုက်ခိုက်ခြင်းကို ခံလိုက်ရတယ်လို့ သိရပါတယ်။
“ညောင်ခြေထောက် အခြေစိုက် ကပစ ၆ ကနေ ထွက်လာတဲ့ အင်အား ၁၀၀ ဝန်းကျင်ခန့် စစ်ကြောင်းဟာ ၂၇ မိုင်လမ်းဆုံကနေ တဆင့် လေလာတောင်ကြောကို ဖြတ်ပြီး တိုက်စစ်ဆင်လာခဲ့တာမှာ ကြားဖြတ်တိုက်ခိုက်ခံရတာလေ။ အသေအပျောက်များပြီး တပ်ပြန်ဆုတ်သွားပြီ” လို့ မြေပြင်စစ်ရေးသတင်းရင်းမြစ်တစ်ဦးက အာရက္ခတိုင်းမ်စ်ကို ပြောပါတယ်။
ဇွန်လ ၁၆ ရက်ကလည်း အင်အား ၁၀၀ ကျော်ပါတဲ့ ရွေးတုအစိုးရတပ် စစ်ကြောင်းတစ်ကြောင်းဟာ ညောင်ကျိုးစခန်း အနီးတစ်ဝိုက်ကို စစ်ကြောင်းထိုးလာလို့ တိုက်ပွဲတွေ ဖြစ်ပွားခဲ့ပါသေးတယ်။
ရွေးတုအစိုးရတပ်ဟာ မေလဆန်းက စတင်ကာ ကပစ ၆ ကနေ ညောင်ကျိုးကို လေလာတောင်ဖက်ကနေ ထိုးစစ်ဆင်နေတာလည်း ဖြစ်ပါတယ်။
ညောင်ကျိုးစခန်းကို ရွေးတုအစိုးရဟာ ၂၀၂၄ ခုနှစ်ကတည်း အာရက္ခတပ်တော်ထံ လက်လွှတ်ခဲ့ရပြီး ယခုအခါ ရွေးတုအစိုးရတပ် ဆုံးရှုံးခဲ့ရတဲ့ ညောင်ကျိုးစခန်း ပြန်လည်ရရှိရေးအတွက် တောက်လျောက် ထိုးစစ်ဆင် တိုက်ခိုက်နေတာလည်း ဖြစ်ပါတယ်။
ညောင်ကျိုးကို ထိုးဆင်ဖို့ ရွေးတုအစိုးရတပ် အထိုင်ချထားတဲ့ ကပစ ၆ ဟာ ပဲခူးတိုင်း ဥသျှစ်ပင်မြို့ ညောင်ခြေထောက်ရွာတွင် တည်ရှိပြီး လေသာတောင်၊ ဆင်လန်တောင်၊ စန်းပတ်လက်တောင် စတဲ့ စခန်းတွေနဲ့ ကာထားတာလည်း ဖြစ်ပါတယ်။
အဆိုပါ ကပစ (၆) တွင် လက်နက်ငယ်ကျည်ဆန်အခွံနဲ့ ကြေးပြားများကို ထုတ်လုပ်ပေးတဲ့ သံမဏိစက်ရုံကို တရုတ်ပညာရှင်များက တည်ဆောက်ပေးထားတာလည်း ဖြစ်ပါတယ်။
အလားတူ ဥသျှစ်ပင်မြို့ တောင်ဖက်တွင်လည်း စစ်ကော်မရှင်ရဲ့ ကပစ ၅ နဲ့ ကပစ ၉ တို့ အခြေစိုက်ထားတာလည်း ဖြစ်ပါတယ်။
75 comments